Terrtag 1 - Maktub Ta Kumkajir

Maktub terrtag a ndoo deg nya kɨmaj dum

¹ Terrtag lo Salomõ ngon Dabid, ngar kɨ Israel.

² Terrtag 'nten i kɨtakad ndoo deg ad gerɨn terr kɨ nyandoo, na kad gerɨn ne girr goosɨ tag tɔ.

³ Kɨtɔ ta nyandoo dɔ nyaɗa kɨgo lo terrt kɨ nyaɗa kɨdenesew kɨ takɨgang kɨgoɗobat kɨ nyaɗa kasɨnatap tɔ ho,

⁴ kɨta kad deg kɨ ngékumkɔrr al goosɨ tɔrr nya nat, kɨta kad basa nyager kɨ goosɨ ɗa nya kɨ ga dɔt goɗobat.

⁵ Kɨ de kɨ ngeterr oo dɔ, na a ngah nyager kɨdɔtdɔt; kɨ de kɨ ngegoosɨ ger girrnya'n oo dɔ, na a tee goosɨ kɔrrta ɗob,

⁶ kɨta ger girr terrta kɨ takɨmund, kɨ takel ngéterrg kɨ ta lod kɨyadɔ.

⁷ Ɓool Bɨraɓe i mbagɨr nyager; na ɓood deg kidɨn terr kɨ nyandoo.

Tag kɨkɔj kɨ tag kɨkug kel dɔ kũ mosɨ kɔt

⁸ Ngonɨm, oo dɔ nyandoo lo bɔwi. Ot nyàgo takɔj lo kõi kɔ.

⁹ Kɨtɔ a i jog kɨmaj dɔit, a i medkɔsɨ kɨ la kɔit tɔ.

¹⁰ Ngonɨm, ĩla ngéɗamajalg goolɨn a ne, ot ndig.

¹¹ Ĩla a elɨn anan: I ɗe, ad j'awɨn nat, kɨ j'umɨn lo, j'ũn mosɨ kɔ, j'a kɨ yan roj dulot kad kɨ tɔlɨn deg kɨ ta goto dɔdt;

¹² ad kɨ j'urɨnd kumkajir tube tit lo kɨ Koo, tit ngékud kam holɓe koit be;

¹³ j'a kɨ ngahn nyag kɨmajmaj kɨ gatd i ngãi kad kam kujg loj ɗoosɨn kɨ nyangahg;

¹⁴ i nda roi nat sej, kad jin tube j'aw kɨ ɓɔl nar kɨɗabe, a ne,

¹⁵ ngonɨm, ot kun ɗob nat sed. Ot nda njai dɔ ɗob kawdt.

¹⁶ Kɨtɔ ɓan nja ngɔd kad ɗan majal, awɨn Kanag kɨta kũ mosɨ kɔ,

¹⁷ kɨta gum kɨ ya takum yelt, i kari kɨndang,

¹⁸ na deg'n non i kɨta m'ɔsɨd kɨdɔd la umɨn ne lo, yan rod dulot kɨta tuj rod kɨ kɔsɨ dɔd.

¹⁹ Titbe la i ɗob lo deg kɨ nyur ngahnya ndɨ õd. Nyur ngahnya'n non a tɔ kohd.

Terr ndɨ kun deg kad oon dɔ ta lon

²⁰ Terr ndɨ ko kɨdɔ ɗobgt, un ndin kɨ dõ tɔ kam sukgt,

²¹ ndɨ ko kam natlogt, ndɨ elta kɨ tabit kand kam ɓebot, an:

²² Ngékumkɔralg, mbã ndɔ bãi a i ndigɨn kumkɔral losɨ a? Ngégo deg a nyan ta ɗa ronel dɔ go degt ndɔ ɗit a? Na ɓoodg ndɨ mbetɨn nyager a?

²³ I telɨn rosɨ, oon dɔ ndang kɨ m'ndangsɨn. Oon, m'a m'ũ ndilɨm dɔsɨt, m'a mad i gerɨn tag lom.

²⁴ Kɨtɔ m'kunsɨ, na i mbetɨn ko dɔ; m'la jim, na de mad kɨ tur go goto.

²⁵ Kɔjtag lom tube i turɨn go al, na i ndigɨn ndang kɨ m'ndangsɨ al.

²⁶ Mĩ tɔ m'a m'gosɨ lon tuj a tee dɔsɨt, m'a m'gosɨ lon nya kɨkootɓool a so dɔsɨt,

²⁷ lon nya kɨkootɓool a so dɔsɨt tit nélndii, na tuj a tee dɔsɨt tit nélbarwãi, lon kamkɔl kɨ jarongot a ɗen dɔsɨt tɔ ho.

²⁸ Kamla a kon kɨdɔmt, na m'a m'tur al; a sahmɨn, na a ngahmɨn al.

²⁹ Kɨtɔ mbetɨn nyager, na kɔtɨn ɓool Bɨraɓe al.

³⁰ Ndigɨn takɔj lom al, na kidɨn ndang lom.

³¹ A san kand nya dub lod, ad i so mut lod, a ndamɨn kɨ takɔj lod kɨdɔd.

³² Kɨtɔ so mut lo ngékumkɔralg tɔld, na ndɨ lom lo ɓoodg nujd.

³³ Na de'n oo dɔ ta lom a ne, a ndɨ kɨ kam kɨsokɨber, a ndɨ lom, a ɓool nya mad kɨmajal al.