1 Timote 1 - Maktub Ta Kumkajir

Lapia

¹ Mĩ Pol, mĩ ngombangkɨla lo Jeju Krist kɨgo mberkɨndat lo Luwah kɨ Ngekaj'j, kɨ Krist Jeju'n kɨ ndah kamj dɔat,

² m'ndang maktub 'nten mad Timote, ngonɨm kɨjeje kɨgo kadkam Luwaht. Kɨ Luwah kɨ Bɔw, kɨ Krist Jeju Bɨraɓe loj adɨn majkurr, kɨ kookumtondo kɨ kam kɨsokɨber.

Koo go ro maj dɔ nyandoot kɨ ngom

³ Tit'n m'ndɨjein, lon m'ndɨ m'awɨn dɔning Masedɔant ye, maj kad i ndɨ kam ɓebot kɨ Epesɨ. Deg madg ndɨn nõ ndɨ ndoon nya kɨ ngom, sumba kad i ndamber deg'n non kad nyan ta ɗa nya kɨ titbe.

⁴ Maj kad eld kɨ ot kɔrrɨn go sukɨdag kɨ girr kaag kɨ ngal, kɨta nyag'n non ndɨ teen kɨ deg kɨ gakɨnagt koon, na ndɨ ɔgɨn ɗa kɨla'n Luwah la jijt kad aw kɨ ketekete, ad i kɨla lamber ta kɨmaj kad deg adɨn kamd Luwah.

⁵ Na sumba kad i ndad mber titbe, kɨtakad tɔgɨn kam tart, tar kɨ tee kam ngarkamt kɨjanjoi, kɨ ndɨ hɔ de kɨ ta al, kɨtakad teen kɨ kadkam Luwaht kɨkanj ndokum.

⁶ Deg madg mbetɨn ɗob kɨmaj, ad udɨn mut kam tamajgt kɨ ta kɨ kel kɨ pãbe.

⁷ Ndigɨn kad nĩn ngéndoo deg mberkɨnda lo Luwah, na ĩn kɨɓe kɨ dɔd gerɨn girr ta lod'n ndɨ elɨn nõ al ho, gerɨn girr nyandoo'n ndɨ ndoon deg kɨ kam kɨmisɨmisɨ nõ al ho tɔ.

⁸ Na jĩ kɨ ger mberkɨnda lo Moij kɔikɔi, i nya kɨmaj; ĩla de ndɨ ɗan kɨla kɨ goɗobat.

⁹ J'oo maj, mberkɨnda i kɨta deg kɨro nõ Luwaht al, na i kɨta ngétɔidɔtag, kɨ ngémbikoodɔtalg, kɨta ngéɗanya kɨgo lo Luwaht al, kɨ ngéɗamajalg, kɨta ngékɔsɨgon Luwah al, kɨ ngékid nya kɨjaɓat, kɨta ngétɔl bɔwdg kɨ kõdg, kɨta ngétɔl deg.

¹⁰ Mberkɨnda i kɨta ngéɗakayag, kɨ ngéɓi kɨ dekɨdɨngãg, kɨta ngéɗaw deg, kɨ ngékeltakɨbalg, kɨ ngémanajg kɨ ngom, kɨ deg kɨ ngéɗanyag tube ngankodang kɨgo lo nyandoot kɨjaraw al;

¹¹ nyandoo kɨjaraw'n Luwah la jimt i Hoita kɨmaj lo Luwah kɨ Ngekɔsɨgon kɨ Ngekasɨ ta ndub.

Pol ɗa mersi Luwah kɨta ɗa maj loa

¹² M'ndɨ m'ɗa mersi Krist Jeju Bɨraɓe loj, ĩn adɨm tɔgɨn asɨ kad m'ɗan kɨla'n non. M'ndɨ m'ɗaa mersi tɔ dɔ koot'n oom ad m'asɨ kad ndahm ta kɨlaɓert lon,

¹³ ke neni, maɗi m'elta kɨmal dɔat, m'da roa ndo, m'taja kaa ne, Bɨraɓe oo kumtondo lom, kɨta kaglot'n non mad kamm Krist al ɓaitɔ, ad m'ger nya'n m'ɗa nõ al.

¹⁴ Na majkurr lo Bɨraɓe i kɨbo kɨtɔm ad m'adkam Krist ho, adɨm tar kɨ ɓai kokɨro Krist't ho.

¹⁵ Ta 'nten i ta kɨ jeje, asɨ kad deg taan kɨ log tube kɨ kan: Krist Jeju ɗe duniat kɨta kaj deg kɨ ngéɗamajalg. Na mĩ taa, mĩ ngeɗamajal m'tɔi deg tube,

¹⁶ na i kɨta 'nten la Luwah oon kumtondo lom ye, ndig kad Krist ɔjɨm kamkẽ lon, mĩ'n mĩ de kɨdasa lo ngéɗamajalg, kɨtakad i nyandaj kɨ ro degt tube'n a adɨna kamd nẽbe kɨ nõt ho, na ngahn kumkajir kɨ mbãkɨnõt ho.

¹⁷ Tajigla, kɨ dɔ Ngart kɨ ngendɨ mbãkɨnõt, kɨ dumkoi, kɨ dum kookɨkum, kɨ dɔ Luwaht kɨɗabe, kɨ kɔsɨgon kɨ tɔko i kɨ dɔat kohgt lo kohg. Amin.

¹⁸ Ngonɨm Timote, nyandoo'n m'ndɨ m'la jiit laten, kɨgo tat'n ngékelta kɨ ta Luwaht elɨn dan ne dɔi maɗi ye, maj kad i taa tag kɨ ta Luwaht'n non kɨtakad i ngah tɔg kamt ad ĩn nyakatg kad i ɗɔɔn ɗɔɔ kɨmaj,

¹⁹ kad i hɔ go kadkam Krist loi jɔgum kɨkanj kad kami hɔi kɨ ta dɔ majalt mad. Deg madg mbetɨn koo dɔ ta'n kamd ndɨ hɔd kɨ ta dɔt nõ, ad kadkam Krist lod nuj kɔ.

²⁰ Himene kɨ Alegjandɨr ĩn ku degt'n non. M'lad ji Sɨtant kɨtakad ĩn kɨ ndakɔj kad elɨn ta kɨmal dɔ Luwaht gog al.