Misee 1 - Bibeli do fee

¹ Aɔ̃ Lafɛ̃ɛ í ba Misee inɛi ilui Moresɛti ide ku fɔ, í jɔ̀ í ce kuyɛ si gãmɛi ilui Samari do ilui Zeruzalɛmu. Í ce kuyɛ ŋaui si waatii bomma ku jɛi Yotamu do Ahazi do Ezekiasi ilaalui ilɛi Zudaa ŋa.

Aɔ̃ Lafɛ̃ɛ í yɛ taalei inɛɛ ŋa

² Misee í ni, iŋɛ inɛi andunya ŋa fei, i sotĩ i gbɔ ŋa. Ilɛ do mii iyi í wa si fei ku ce laakai. Ilaaɔ̃ Lafɛ̃ɛ á naa hai si kpasɛ̃ kumáɛ ku na ku yɛ taale nŋɛ.

³ Aɔ̃ Lafɛ̃ɛ í fita wa hai si bi kuwaɛ, í kita wa, nɔ wa nɛ si geetei ilɛ ŋa.

⁴ Si isɛɛnɛɛ, iri kuta ŋa à waa yɔ, nɔ lɔɔma ŋa mɔ à ce iwo, wa yɔ wa bɛi fãfãi nyikɔ̃ iyi à lesi ina, do bɛi inyi iyi wa cã wa hai si geete.

⁵ Iyi bɛi fei, na kurarai tɔkui Zakɔbu ŋai, na irii dulum dii dimii inɛi Izirɛli ŋai. Kurara yoomai Izirɛli í ce. Kù jɛ ilui Samarii í jɔ̀ í coo? Yooi í fa Zudaa í kooɛ si iwɛ̃ ŋa ku tɔɔ. Kù jɛ ilui Zeruzalɛmui?

⁶ Aɔ̃ Lafɛ̃ɛ í ni, an jɔ̀ Samari ku kpɔò bomma ku baa ku jɛ sako, tengi bii aa ya lɔ jĩi ndii rezɛ̃ɛ ŋa. Kutai idĩɛ ŋau, an tale ŋai si lɔɔma, an jɔ̀ icui ileɛ ŋau a fita gbugbãa.

⁷ Aɔ̃ Lafɛ̃ɛ í ni, kuta ŋa iyi à gbe à jilɛ à ya maa tɔɔ fei, aa lɛgɛ ŋai. Amua ŋa iyi woo wee ŋau à ya gba fei aa dasi ina a jooi, nɔ iwɛ̃ ŋa iyi à wa si ilɛu do amua nŋa ŋa iyi à gbe fei, aa ko ŋai a nɛò ilɛ mmu a koo a maa sãaò woo weei iwɛ̃ mmu ŋa.

Wahala í ba Zeruzalɛmu

⁸ Amu Misee, an kpata n maa n weewea n maa n nɛ isɛ ngbɛ, nɔ n maa n nɛ basĩ. An maa n dɔ̃ anui bɛi ajaako, nɔ n maa n dɔ̃ anu bɛi taataa.

⁹ Ijuukpãi inɛi Samari ŋau í yɛi bɛi patapoo, nɔ wee í to hee si inɛi Zudaa ŋa, nɔ Aɔ̃ Lafɛ̃ɛ í jɔ̀ í to hee anu koofai Zeruzalɛmu si inɛɛ ŋau mɔ.

¹⁰ I maà fɔ ideu ilui Gati bi mbɛɛ nwa ŋa, i maà kpata ilui Akoo ŋa. Amma iŋɛ inɛi Bɛti-Leafara ŋa, i bimbili si ilùlù i nyisiò inɔ kufɔ nŋɛ ŋa.

¹¹ Iŋɛ inɛi Safii ŋa, aa mu ŋɛ arui a nɛò ŋɛ basĩ do anyɔ. Inɛi Saanaa ŋa a kaa jɛ a fita hai inɔ ilu nŋau. Bɛti-Esɛliu hai bii aa ba sobi ŋa wo, nŋu mɔ wa dɔ̃ anu do kukpatai iku.

¹² Inɛi Marɔtu ŋa à waa yaya na idei iri nŋa, domi ijuukpãu wa naai hai bi Aɔ̃ Lafɛ̃ɛ nɔ í to hee si anu koofai Zeruzalɛmu.

¹³ Iŋɛ inɛi Lakisi ŋa, i dĩa acĩ nŋɛ ŋa gaayi do sarɛti nŋɛ ŋa. Si ilɛi Siɔ̃ɔ, iŋɛi ì jɛ inɛ ŋa iyi à ce dulum sinte, domi si ŋɛi à yɛ kurarai inɛi Izirɛli ŋa.

¹⁴ Na ŋɔi í ce iŋɛ inɛi Zudaa ŋa aa fɛɛfɛ ŋɛi do inɛi Moresɛti-Gati ŋa. Ilaalui inɛi Izirɛli ŋau, inɛi Akuzibu ŋai à waa kaaba. Amma inɛi Akuzibu ŋau a kaa yɔkɔ a sobi ŋa.

¹⁵ Aɔ̃ Lafɛ̃ɛ í ni, an jɔ̀ inɛ ŋa a naa si inɛi Maresa ŋa igũ má. Inɛ ngbo ilu bɛɛrɛi Izirɛli ŋau aa sa a koo a manjii hee Adulamu.

¹⁶ I ja iri nŋɛ ŋa, i gbogooɛ ŋa, iŋɛ inɛi Zeruzalɛmu ŋa. I jɔ̀ iri nŋɛ ŋau a wɛɛ hai nɛ nto bɛi ti yembeeku, i kpata na ama nŋɛ ŋa iyi ì nɛ kubi nŋa jiida ŋau ŋa, domi aa nɛò ŋai hee ilɛ jĩijĩ hai bi tu ŋɛ.