Kolosee 1 - Bibeli do fee

Í ce ŋa fɔɔ

¹ Amui Pɔlu, woo bɛi Jesu Kirisi na idɔɔbii Ilaaɔ̃, amu do Timɔtee inɛ nwa,

² à ce ŋɛ fɔɔ, iŋɛ inɛ nwa ilu naanɛ ŋa iyi Kirisi í cica ì jɛ tɛɛ ŋa si ilui Kolosee bɛ. Ilaaɔ̃ Baa nwa ku mu nŋɛ didɔ̃ do laakai ku sũ.

Pɔlu wa saabu Ilaaɔ̃ na iri nŋa

^3-4 Hai waati iyi à gbɔ bɛi ì dasi Jesu Kirisi naanɛ ŋa, do bɛi ì bi woo dasi Jesu naanɛ ŋa fei, à ya ka maa ce nŋɛ kutɔɔi waati kãma fei, ka maa saabu Ilaaɔ̃ Baai Lafɛ̃ɛ nwa Jesu Kirisi.

⁵ Waati iyi idei laabaau jiida iyi í jɛ ntɔu í sinti ku to wa bi tu ŋɛ, à jɔ̀ ì mà kpãa ku cɔ iyi ì nɛ ŋa. Si bɛɛbɛ, naanɛ ku dasi nŋɛ do kubi nŋɛ fei, í wai si kpãa ku cɔ iyi à jilɛ nŋɛ ikpa lele.

⁶ Laabaau jiidau wa fangaa bii fei nɔ wa naaò kuwee wa si andunya fei. Nɔ í la wa kɔ̃ɔsi si bɛi wa ce bi tu ŋɛu hai waati iyi ì gbɔ idei didɔ̃i Ilaaɔ̃u ŋa nɔ ì mà bɛi í yɛ ŋa do ntɔ.

⁷ Epafaasi, woo ce icɛ baakɔɔ nwaui í kɔ nŋɛ si. Wa ce icɛ na aranfãani nŋɛ, nŋu iyi í jɛ ilu naanɛ woo ce icɛi Kirisi.

⁸ Nŋui í sɔ̃ wa kubi iyi Hundei Ilaaɔ̃ í mu nŋɛ.

⁹ Na nŋu, hai waati iyi à gbɔ laabaau nŋɛ, waati kãma fei à ya ka maa ce nŋɛ kutɔɔi. À waa tɔɔ Ilaaɔ̃ ku jɔ̀ Hundeɛ ku mu nŋɛ bisi do laakai ku ba i mà idɔɔbiɛ ŋa mam mam.

¹⁰ Bɛɛbɛi isɛɛnɛ nŋɛ ŋa á jɔ ti inɛ ŋa iyi à jɛ ti Lafɛ̃ɛ, nɔ waati kãma fei i ya ce iyi á dɔ̃aa si ŋa. Nɔ i ya ce icɛ jiida ikã ikã fei ŋa, nɔ Ilaaɔ̃ ku mà nŋɛ ku kɔ̃ɔsi.

¹¹ À waa tɔɔ Ilaaɔ̃ ku mu nŋɛ gbugbã si mii fei do saabui gbugbãi yiikoɛ ku ba i yɔkɔ temua si mii fei ŋa, nɔ i ya maa leekĩ dim dim ŋa.

¹² I ya maa saabu Ilaaɔ̃ Baaba do inɔ didɔ̃ ŋa, nŋu iyi í jɔ̀ ì nɛ ikpɛ̃ si tubu iyi í jilɛa woo dasi naanɛ ŋa si inya kumá.

¹³ Do ntɔi í nya wa hai si awɔ gbugbãi ilu kuku nɔ í buba wa si bommai Amaɛ iyi í bi.

¹⁴ Do saabui Amaui í ya wa nɔ í kpa idei dulum du wa.

Yaasei Jesu takaɛ do icɛɛ

¹⁵ Inɛ gɔ kaa yɔkɔ ku yɛ Ilaaɔ̃. Amma Kirisi Amaɛu Ilaaɔ̃i, nɔ à yɔɔ, í nɔ í jɔɔi dee dee. Kirisiu í wɛɛi hai waati iyi a kù taka andunya.

¹⁶ Nŋui í taka mii fei, nɔ mii fei í wɛɛi na iriɛ. Na saabuɛi Ilaaɔ̃ í takaò mii fei iyi í wa lele do ilɛ. Mii ŋa iyi à waa yɛ do iyi a kù waa yɛ fei, nŋui í taka ŋa. Hai gbugbãi lele ŋa do ilu iri ŋa do ilu yiiko ŋa do ilu gbugbã ŋa fei icɛi awɔɛi.

¹⁷ Kirisi njɛ í wɛɛ tã à bɛi à taka mii fei. Do gbugbãɛi í jɔ̀ mii fei í wa si agbɛɛ.

¹⁸ Igbɛɛ í yɛi bɛi ara, nɔ nŋu mɔi í jɛ iri. Nŋui í jɛ icui kuwɛɛ, nɔ nŋu mɔi í tako í jĩ hai si balɛ, ku ba ku jɛ sinte si mii fei.

¹⁹ Ilaaɔ̃ í bi nŋu ku wa si Amai nŋu mam mam.

²⁰ Bɛɛbɛ mɔi í bi inɛi andunya fei ku dɔ̃ do nŋu, hai mii iyi í wa ilɛ hee do iyi í wa lele fei. Í ce nŋu bɛi si waati iyi Amaɛ í ku nɔ í nikã njɛɛ si antaii jĩi ku gaauu nɔ í naaò laakai ku sũ wa.

²¹ Iŋɛ mɔ, baa do iyi ì jĩò Ilaaɔ̃ ŋa wo, nɔ lasabu laalɔ nŋɛ do kuce laalɔ nŋɛ ŋa à jɔ̀ ì jɛ mbɛɛɛ ŋa,

²² do nŋu fei, nsɛi Ilaaɔ̃ í jɔ̀ ì dɔ̃ do nŋu ŋa. Í ce nŋu bɛi si waati iyi í jɔ̀ Amaɛu í so arai amanɛ ku ba ku ku, ku ba i naa i leekĩ si wajuɛ ŋa hai nɛ dulum, riisi do taale gɔ ku maà wa si.

²³ Amma í gbe i temua ŋa si naanɛ ku dasi i leekĩ si dim dim ŋa. Nɔ si bɛi ì gbɔ laabaau jiidau ŋa iyi à sisia inɛi andunya fei, i maà ti i jɔ̀ a sinda ŋɛ hai si kpãa ku cɔ iyi wa jilɛ nŋɛ. Laabaau jiidau, amu Pɔlu, amui ǹ jɛ woo ce icɛɛ.

Icɛ iyi à dasi Pɔlu na irii igbɛi inɛi Jesu ŋa

²⁴ Nsɛi ǹ ya n nɛ inɔ didɔ̃ si ijuukpã iyi ǹ wa n yɛ na iri nŋɛ. Nɔ mii iyi í gaizia si wahala ŋa iyi Kirisi í nɛ ku yɛ, amui an tambɔɛ si aram na araɛ iyi í jɛ igbɛu.

²⁵ Nɔ Ilaaɔ̃ í cem woo ce icɛi igbɛu, si bɛi í jilɛɛm na iri nŋɛ, ku ba n sisi ideɛ mam mam.

²⁶ Ideu, asiii iyi í singaa inɛ fei hai ku kpɛ, amma nsɛi í nyisi inɛɛ ŋa.

²⁷ Í nyisi ŋai si na iyi í jɔ̀ wa bi a mà bɛi asiii nŋu í nɛ bɛɛrɛ do yiiko si anini dimi mmu ŋa. Asiiu wee. Kirisi í wa si ŋɛ, nɔ wa mu nŋɛ kpãa ku cɔ iyi iŋɛ mɔ aa ba ikpɛ̃ si amboei Ilaaɔ̃ ŋa.

²⁸ Idei Kirisii à waa sisi, nɔ à waa sɔ̃ inɛ fei ku ce laakai, nɔ à kɔ ŋa si cioɛ do bisi baa yooma fei. À waa ce bɛɛbɛi ku ba inɛ fei ku jĩa si anu akãɛ do Kirisi ka bɛi ka tusɛ ŋa bi Ilaaɔ̃.

²⁹ Na ŋɔi í jɔ̀ ǹ wa n ce icɛ do kookaai ǹ wa n jabu do gbugbãi Kirisi iyi wa ce icɛ sim.