Filipi 1 - Bibeli do fee

Í ce ŋa fɔɔ

¹ Amui Pɔlu do Timɔtee, awa woo ce icɛi Jesu Kirisi ŋa. À ce inɛ ŋa iyi Jesu Kirisi í cica à jɛ tɛɛ si ilui Filipi fei fɔɔ, hee do inɛ ŋa iyi à jɛ inɛ ngboi igbɛu do woo ce icɛi igbɛu fei.

² Ilaaɔ̃ Baa nwa do Jesu Kirisi Lafɛ̃ɛ nwa a mu nŋɛ didɔ̃ do laakai ku sũ.

Pɔlu í cea inɛi Filipi ŋa kutɔɔ

³ Ǹ ya n maa n saabu Ilaaɔ̃ waati kãma iyi ǹ ye gigi nŋɛ fei.

⁴ Si kutɔɔm ŋa fei iyi ǹ ya n maa n ce na irii iŋɛ fei, ǹ ya n cooi do inɔ didɔ̃,

⁵ si na iyi í jɔ̀ ì sobim ŋa n sisiò laabaau jiidau hai ajɔ sinteu hee ku baa nsɛi.

⁶ Ǹ wa n mà kãm kãm, Ilaaɔ̃ iyi í sinti icɛ jiidau ihɛ̃ si ŋɛ á maa cooi hee koo kpaò iriɛ si ajɔi kunyii Jesu Kirisi wa.

⁷ Nɔ í sĩa n ce lasabu nŋɛ bɛɛbɛ, domi ǹ nɛ kubi nŋɛ si idɔm. Ntɔ ntɔ, ì ya bam icɛ ku ce ŋa ile piisɔ̃ɔ ihɛ̃ do waati iyi ǹ nɛ aram wo ǹ ya n maa n sisi laabaau jiidau ku ba ku nɛ gbugbã ku maa koo nɔ ǹ ya n maa n jabu na iriɛ.

⁸ Ilaaɔ̃i í jɛ sɛɛdam iyi ǹ bi iŋɛ fei bɛi kubii Jesu Kirisi í yɛ.

⁹ Mii iyi ǹ wa n bee si kutɔɔm nŋui í jɛ kubi nŋɛ ku kɔ̃ɔsi ku maa koo nɔ kubi nŋɛu ku jɔ̀ kumà nŋɛ do bisi nŋɛ ku kɔ̃ɔsi,

¹⁰ ku ba i yɔkɔ i wũa mii ŋa iyi à jɛ jiida à re ŋa. Bɛɛbɛ mɔi aa jɛ inɛ kumá ŋa, nɔ si ajɔi Kirisiu i kaa nɛ taale kãma ŋa,

¹¹ nɔ icɛ jiida nŋɛ ŋa iyi ì waa ce ŋa na saabui Jesu Kirisiu ku kɔ̃, nɔ ku jɔ̀ inɛ ŋa a yɛ amboei Ilaaɔ̃ nɔ a maa saabuɛ.

Kirisi* nŋui í jɛ kuwɛɛ

¹² Kpaasim ŋa, ǹ bi i mà ŋa iyi mii iyi í bam nɔu ihɛ̃i í jɛ waju ku bɔi laabaau jiidau.

¹³ Ntɔ ntɔ, ciikui amanlu ŋau do inɛ ŋa iyi à gbe fei à mà iyi na irii Kirisii ǹ wa piisɔ̃ɔu ihɛ̃.

¹⁴ Ile piisɔ̃ɔ ku wam í mua kpaasi woo dasi Lafɛ̃ɛ Jesu naanɛ nkpɔ gbugbã í kɔ̃ɔsi à waa sisiò idei Ilaaɔ̃ do idɔ ku buba do wɔɔkɔ.

¹⁵ Ntɔi, inɛ gɔ ŋa à waa sisi idei Kirisi do igu do njɛ ku wã, amma inɛ gɔ ŋa à waa cooi do yaase jiida.

¹⁶ Inɛ nŋu ŋau à waa cooi do kubi domi à mà iyi ǹ wa ile piisɔ̃ɔ ihɛ̃i ku ba n jabu na irii laabaau jiidau.

¹⁷ Inɛ ihɔ̃ ŋa mɔ à waa waazo idei Kirisi, kù jɛ do inɔ akã, amma do njɛ ku wãi. À tamaa bɛi aa kɔ̃ɔm si ijuukpãui si ile piisɔ̃ɔu ihɛ̃.

¹⁸ Bii í yɔkɔ lasabu nŋa kú jɛ laalɔ walakɔ kú jɛ jiida, kãmaɛ kù jɛɛm taale. Baa bii bɛirei nŋu de a sisi idei Kirisi. Inɔm í dɔ̃ á nɔ ku dɔ̃ ku maa kooi,

¹⁹ domi ǹ mà iri ku kpai iyi ihɛ̃ nŋui í jɛ faabam na saabui kutɔɔ nŋɛ, do sobii Hundei Jesu Kirisi.

²⁰ Mii iyi ǹ dasi idɔ nɔ ǹ wa n cɔ kpãaɛ kãm kãm nŋui í jɛ n maà n ce nkãma iyi á jɔ̀ anyɔ ku mum. Mii iyi ǹ bi nŋui í jɛ n nɛ wɔɔkɔ bɛi ǹ nɛ hai tako n maa n nyisiò kulai Kirisi bii ǹ wɛɛ si hunde walakɔ baa bii í jɛ ǹ ku mɔi.

²¹ Ntɔ ntɔ, bi tom bii ǹ wɛɛ, na irii Kirisii ǹ wɛɛ, bii ǹ nɔ ǹ ku mɔi, an ba riba.

²² Amma bii í jɛ kuwɛɛm si hunde á jɔ̀ n yɔkɔ n ce icɛ jiida, to, n kù mà iyi an cica.

²³ Lasabum wa fam ni do cingaa minji minji fei. Ǹ bi n nɛ n koo n wa bi Kirisi, domi iyi bɛi á sĩa ku re.

²⁴ Amma na aranfãani nŋɛi á sĩa ku re n maa n wa si andunya má.

²⁵ Na nŋu, ǹ mà iyi kù nɛ sika kãma an wɛɛ do iŋɛ fei na waju ku bɔ nŋɛ do inɔ didɔ̃ nŋɛ si naanɛ ku dasi nŋɛ.

²⁶ Si bɛɛbɛ aa ba kpãa i saabu Jesu Kirisi ŋa do inɔ didɔ̃ na irim si waati iyi an na n wa anini nŋɛ má.

²⁷ Nŋu de i ya jɔ̀ isɛɛnɛ nŋɛ ŋa ku yɛ bɛi laabaau jiidai Kirisi í fɔ. Bii ì waa ce bɛɛbɛ ŋa, bii ǹ naa bi tu ŋɛ, walakɔ baa bii n kù naa, n maa n gbɔ iyi ì waa leekĩ si dim dim ŋa, ì ya maa gbɔsi njɛ nɔ ì waa jabu do inɔ akã ŋa na laabaau jiidau iyi í jɛ icui naanɛ ku dasi nŋɛ.

²⁸ I maà jɔ̀ mbɛɛ nŋɛ ŋa a da zigi nŋɛ si nkãma. Nŋui á nyisi ŋa iyi aŋai à waa bɔ nfe ku ce, nɔ ku nyisi iŋɛ mɔ iyi ì wa si kpãai faaba ŋa. Iyi bɛ fei wa naai hai bi Ilaaɔ̃,

²⁹ domi Ilaaɔ̃ í ce nŋɛ didɔ̃ ì dasiò Kirisi naanɛ ŋa, amma kù jɛ baa iyi bɛ nŋu akã, í ce nŋɛ didɔ̃ má ì ya maa yɛò ijuukpã ŋa na iriɛ.

³⁰ Iŋɛ mɔ ì bam ku jabu ŋa si kujabu iyi ì yɛ ǹ ce ŋa wo nɔ ì waa gbɔ ŋa iyi hee nsɛi ǹ wa n mɔsi.