Псалми 1 - Библија: Стариот и Новиот Завет Константинов

ПРВА КНИГА 1-41 Два пата 1. Блаженство на праведник

Давидов псалм.

¹ Блажен е човекот кој не оди по советот на нечесните, и не стои на патот на грешниците, и не седи во седиштето на потсмевачите;

² туку волјата му е во Господовиот Закон и за Неговиот Закон размислува дење и ноќе:

³ Тој е како дрво засадено покрај водни потоци, што донесува плод во свое време; неговите лисја никогаш не венат; сѐ што прави, во сѐ успева.

2. Гибел на нечесни

⁴ Нечесните не се такви, тие се како плева што ветерот ја разнесува.

⁵ Затоа нечесните нема да се одржат на суд, ниту грешниците во собранието на праведните.

⁶ Зашто Господ го знае патот на праведните; а патот на нечесните ќе пропадне.