Марко 2 - Свето Евангелие 2008

ГЛАВА 2 (Зачало 7)

¹ По неколку дни, Он повторно влезе во Капернаум; и се чу дека е во една куќа.

² Веднаш се собраа мнозина, така што и пред вратата не можеа да се сместат; а Он им зборуваше.

³ И дојдоа при Него со еден фатен, кого што го носеа четворица;

⁴ па, како не можеа да се приближат до Него од народот, го открија и го раскопаа покривот од куќата, каде што беше Он, и ја спуштија постелката, на која лежеше фатениот.

⁵ А Исус, кога ја виде верата нивна, му рече на фатениот: – Синко, ти се простуваат гревовите твои!

⁶ Таму седеа некои од книжниците и помислија во срцата свои:

⁷ – Што хули Овој на Бога? Кој друг може да простува гревови, освен Единиот Бог?

⁸ Исус, веднаш, штом узна со Својот дух, дека тие така мислат во себе, им рече: – Зошто го помислувате тоа во срцата свои?

⁹ Што е полесно, да му кажам на фатениов: – ти се простуваат гревовите, или да речам: – стани, земи ја постелката своја и оди?

¹⁰ Ама за да знаете дека Синот Човечки има власт на земјата да ги простува гревовите, му рече на фатениот:

¹¹ – Тебе ти велам: стани, земи ја постелката своја и оди си дома!

¹² И веднаш стана, па штом ја зеде својата постелка, се појави пред сите, така што сите се восхитуваа и Го славеа Бога, велејќи: – Никогаш вакво чудо не сме виделе. Крај на неделата

(Зачало 8)

¹³ Пак излезе покрај морето, и сиот народ доаѓаше при Него, и Он ги поучуваше.

¹⁴ И кога одеше, го виде Левија Алфеев, кој седеше на царинарницата, и му рече: – Врви по Мене! Тој стана и тргна по Него.

¹⁵ А кога седеше Исус на трпезата во неговата куќа, заедно со Него седеа и учениците Негови, и многу цариници и грешници; бидејќи тие беа мнозина и врвеа по Него.

¹⁶ Книжниците и фарисеи те, штом Го видоа да јаде со цариници и грешници, им рекоа на учениците Негови: – Зошто со цариници и грешници јаде и пие?

¹⁷ Кога го чу тоа Исус, им рече: – Здравите немаат потреба од лекар, а болните. Не сум дошол да ги повикам праведниците, туку грешниците на покајание. Крај на саботата

(Зачало 9)

¹⁸ Учениците на Јована и на фарисеите постеа. И приоѓаа некои, па му велеа: – Зошто учениците Јованови и на фарисеите постат, а Твоите ученици не постат?

¹⁹ Исус им рече: – Зар можат сватовите да постат, кога младоженецот е со нив? За сето време, додека е со нив младоженецот, тие не можат да постат;

²⁰ но, ќе дојдат дни, кога ќе се оттргне младоженецот од нив и тогаш, во тие денови, ќе постат.

²¹ Никој не крпи стара облека со нова крпа; оти таа ќе се отшие од старото, и дупката ќе биде поголема.

²² И никој не става ново вино во стари мевови; инаку, новото вино ќе ги напукне мевовите и виното ќе истече, а и мевовите ќе се упропастат; туку ново вино треба да се тура во нови мевови. Крај на петокот

(Зачало 10)

²³ И се случи да минува во сабота преку нивјето, и учениците Негови, врвејќи, почнаа да кинат класје.

²⁴ А фарисеите Му рекоа: – Гледај, зошто учениците во сабота го прават тоа, што не треба да се прави?

²⁵ Но Он им рече: – Зар никогаш не сте читале што направи Давид, кога имаше потреба и огладне, самиот тој и оние, што беа со него?

²⁶ Откако влезе во домот Божји, при првосвештеникот Авијат, и ги изеде лебовите на предложението, коишто не смееше да ги јаде никој друг освен свештениците, а им даде и на оние, што беа со него.

²⁷ И им велеше: – Саботата е за човекот, а не човекот за саботата.

²⁸ Па така, Синот Човечки е господар и на саботата.