Осија 1 - Свето Писмо: Стандардна Библија 2006 (со девтероканонски книги)

¹ Слово Господово што беше упатено до Осија, син Беериев, во деновите на јудејските цареви Озија, Јотам, Ахаз, Езекија и во деновите на израилскиот цар Јеровоам, синот Јоасов.

Семејството на Осија

² Почеток на словото Господово до Осија. Му рече Господ на Осија: „Оди и земи жена блудница, па роди деца од блудство; зашто оваа земја многу блудствува, откако отстапи од Господ.“

³ И тој отиде и ја зеде Гомер, ќерката на Дивлаим, која зачна и му роди син.

⁴ Тогаш Господ му рече: „Стави му име Јизреел, зашто уште малку и Јас ќе му се одмаздам на Јехуевиот дом за крв­та пролеана во Јизреел и ќе го укинам царството на Израил,

⁵ и во тој ден ќе го скршам лакот на Израил во долината Јизреел.“

⁶ Таа пак зачна и роди ќерка, и Тој му рече: „Именувај ја Ло-Рухама, зашто Јас веќе нема да го помилувам домот Израилев, и да им проштевам.

⁷ А домот Јудин ќе го помилувам и ќе ги спасам Јас, нивниот Господ Бог, не со лак, ниту со меч, ни со војска, ниту со коњи и коњаници.“

⁸ Потоа, откако ја одби од доење, од­ново зачна и роди син.

⁹ И Тој му рече: „Наречи го со името Ло-Ами, зашто вие не сте Мој народ, и Јас нема да бидам ваш Бог.“

Надеж за Израил

¹⁰ „Но бројот на синовите Израилеви ќе биде како песокот морски, кој не ќе може ни да се измери ниту да се изброи; и место да им речат – вие не сте Мој народ – ќе им се рече – вие сте синови на живиот Бог.

¹¹ И ќе се соберат синовите Јудини и синовите Израилеви заедно и ќе си пос­тават еден старешина и ќе излезат од земјата, зашто голем е денот на Јиз­ре­ел.