कुलुस्सियो 1 - मंडयाली नंऊँआं नियम

नमस्कार

¹ हांऊँ पौलुस, ये चिठ्ठी लिख्दा लगिरा। होर आस्सा रा विस्वासी भाई तिमिथियुस मेरे साउगी आ। परमेसरा री इच्छा ले ही हांऊँ मसीह यीसू रा चुणिरा चेला आ।

² हांऊँ ये चिठ्ठी कुलुस्स सैहरा रे मन्झ रैहणे वाले मसीह रे पवित्र होर सच्चे विस्वासी भाई बैहणा रे कठे लिखी करहा। हांऊँ प्रार्थना करहा कि आस्सा रा बापू परमेसर तुस्सा जो अनुग्रह होर सांति देंदा रहे।

धन्यावादा होर प्रार्थना

³ जेबे हमेसा आस्से तुस्सा रे कठे प्रार्थना करहे, आस्से आपणे प्रभु यीसू मसीह रे बापू यानि परमेसरा रा धन्यावाद करहा ऐं।

⁴ क्यूंकि आस्से सुणिरा कि, तुस्से मसीह यीसू पर विस्वासा करहे, होर तुस्से सभ परमेसरा रे पवित्र लोका किन्हें प्यार करहे।

⁵ तुस्सा रा ये प्यार होर विस्वास तेस आसा री वजहा ले आ, जो तुस्सा रे कठे स्वर्गा मन्झ रखिरा। तुस्से एस आसा रे बारे मन्झ पैहली बारी तेबे सुणेया जेबे तुस्से खुसी री खबरा री सच्चाई पर विस्वास कितिरा था।

⁶ ये खुसी री खबर जिहां तुस्सा रे बीचा मन्झ सुणाई गई, तिहां ही संसारा रे कई देसा मन्झ सुणाई जाई करहा ई, होर बौह्त लोक तुस्सा साहीं मसीह पर विस्वास करेया करहा ऐं। होर पैहले ध्याड़े ले ही तुस्से तेस सच्ची खबरा जो पुरे तरीके किन्हें समझी गये कि, किहाँ परमेसरे बड़ा अनुग्रह करी किन्हे मसीह पर विस्वास करणे वाल़ेया रे पापा जो माफ करी देआ।

⁷ तुस्से आस्सा रे लाडले भाई होर सहकर्मी इपफ्रासा ले एसरे बारे मन्झ उपदेस सिखिरा। से आस्सा री वखा तुस्सा रे कठे मसीह रा सच्चा सेऊआदार आ।

⁸ तिन्हें ई आई किन्हें आस्सो तेस प्यारा रे बारे मन्झ दसेया, जो पवित्र आत्मे तुस्सा सभी जो दितिरा; जेसरे ज्रीए तुस्से एक दूजे किन्हें प्यार करहा ऐ।

आत्मिक ज्ञाना रे कठे प्रार्थना

⁹ इधी कठे जेस ध्याड़े ले आस्से तुस्सा रे बारे मन्झ सुणिरा आ, आस्से हमेसा तुस्सा रे कठे प्रार्थना होर विनती किती। आस्से प्रार्थना करहे कि परमेसरा री आत्मा तुस्सा जो ज्ञान होर समझा दे कि तुस्से तेसरी इच्छा जो पूरी तरहा समझी जाओ।

¹⁰ ताकि तुस्से परमेसरा री इच्छा रे मताबक आपणी जिन्दगी जी सको। तेबे तुस्सा हर गल्ला मन्झ प्रभु खुस करणा। जेस ले तुस्सा हमेसा हर किस्मा रे भले काम करी सको, होर तुस्से हमेसा परमेसरा जो जाणने मन्झ बढ़दे जाओ।

¹¹ हांऊँ प्रार्थना करहा कि परमेसर आपणी महिमा री सक्ति रे मताबक तुस्से सभ किस्मा री सामर्था ले मजबूत करहे। ताकि जेबे तुस्से परेसानिया जो सहे तेबे हर तरहा ले धीरज होर सबर दसी सको। होर खुसी किन्हें भरी जाऊआ।

¹² होर बापू परमेसरा रा धन्यावाद करदे रहा, जिन्हें तुस्से एस लायक बणाए कि, तेस विरासता रे साझीदार हो, जो परमेसरे आपणे पवित्र लोका जो प्रयासे रे राज्य मन्झ देणे रे कठे त्यार कितिरा।

¹³ क्यूंकि तिन्हें ई आस्सा जो सैताना री सक्ति ले छुड़ाई किन्हें आपणे लाडले मह्ठे रे राजा मन्झ लेई किन्हें आया।

¹⁴ आपणे मह्ठे रे बलिदान रे ज्रीए परमेसरे आस्से छुड़ाए यानि आस्सा रे पाप माफ करी दिते।

मसीह रे ज्रीए मेल मिलाप

¹⁵ परमेसरा जो कोई नी देखी सकदा, पर जेबे तेसरा मह्ठा माह्णुं रे रूपा मन्झ आया ता तिन्हें संसारा रे लोका जो दसेया कि परमेसर केह्ड़ा आ, क्यूंकि ये मह्ठा तेस साहीं आ। होर परमेसरे जो कुछ बणाया तेता पर मह्ठे रा सभी ले ज्यादा हक आ।

¹⁶ क्यूंकि मसीह रे ज्रीए परमेसरे स्वर्गा होर धरती री सारी चीज़ा री रचना किती, हर एक देखी या अनदेखी चीज़ा री, होर सारी राजगद्दी, प्रभुता, प्रधानता, हक री भी रचणा किती, परमेसरे सारी चीजा तेसरे ज्रीए, तेसरे कठे बनाई गई ताकि संसारा रे लोक तेसरी बढ़ाई करहे।

¹⁷ होर मसीह ई सभ चीजा बनाणे रे पैहले था, होर मसीह ही सभ चीजा जो एक साउगी बणाई रखा।

¹⁸ मसीह ही कलीसिया रा मूंड आ; होर कलीसिया मसीह रा सरीर आ। सेई सुर्हू आ, होर मरिरे मन्झा ले जिउंदा हूंणे वाल़ा पैहला था; ताकि हर गल्ला मन्झ पैहली जगहा तेस जो ई मिले।

¹⁹ क्यूंकि बापू परमेसरा री खुसी एता मन्झ ई कि मसीह मन्झ सारी चीजा री भरपूरी वास करहे।

²⁰ परमेसरे आपणा मह्ठा भेजेया जो खून बहाई किन्हें क्रूसा प्रयाल्हे मरेया, तेसरे मरणे रे ज्रीए परमेसरे सब चीज़ा किन्हें जो स्वर्गा होर धरती मन्झ ई तिन्हा साउगी आपणा मेल मिलाप कितेया।

²¹ एक टैम था जेबे तुस्से बुरे कामा री वजहा ले परमेसरा ले लग थे होर तुस्सा रे मना मन्झ बैर था।

²² परमेसरे आपणे मह्ठे मसीह रा माह्णुं रे रूपा मन्झ आऊणें होर क्रूसा प्रयाल्हे तेसरे मरणे रे ज्रीए तुस्सा साउगी भी मेल मिलाप करी लया ताकि तुस्सा जो आपणे साम्हणें पवित्र होर निस्कलंक होर बेकसूर बणाई किन्हें हाजर करहे।

²³ पर तुस्से मसीह रे विस्वासा री नींऊँआं पर मजबूत बणी रहो। तेस आसा नी छाडो जो तुस्सा जो खुसी री खबरा सुणने पर मिलिरी, जेसरा प्रचार सारे संसारा रे लोका रे कठे पुरे संसारा मन्झ कितिरा। होर हांऊँ पौलुस एस खुसी री खबरा जो सुणाणे रा सेऊआदार बणेया।

कलीसिया रे कठे पौलुसा री मेहनत

²⁴ ऐबे हांऊँ खुस आ कि हांऊँ तुस्सा रे कठे दुःख सही सक्हा। होर इधी कठे भी खुस आ कि हांऊँ आपणे सरीरा मन्झ लगातार तिन्हा दुखा जो सहेया, जो मसीहे सहीरे थे। होर ये दुःख हांऊँ मसीह री कलीसिया रे कठे सहेया जो तेसरा सरीर आ।

²⁵ परमेसरे हांऊँ नियुक्त कितेया कि हांऊँ तुस्सा जो परमेसरा रे बचना जो पूरी तरहा समझाऊँ, होर एस वजहा ले ही हांऊँ कलीसिया रा सेऊआदार बणेया।

²⁶ परमेसरे आपणे बचना जो पुराणे जमाने ले होर पीढ़िया ले लुख्ही रैंहयां, पर ऐबे तिन्हें से बचन परमेसरा रे पवित्र लोका पर जाहिर कितिरा।

²⁷ क्यूंकि परमेसर चाहां था कि तेसरे लोक ये जाणी ले कि मसीह रे धन होर महिमा तुस्सा गैर-यहूदी लोका रे कठे भी हाई। होर लुख्ही री गल येई कि मसीह तुस्सा मन्झ वास करहा। होर एता ले आस्सो येह हिम्मत मिली कि आस्सा तेसरी महिमा रे साझीदार हूंणा।

²⁸ आस्से सभी लोका मन्झ मसीह रे बारे मन्झ प्रचार करहे। परमेसरे जो ज्ञान दितिरा तेस ले आस्से हर एक माह्णुं जो स्खाहें होर चतन्न करहा ऐं, ताकि आस्से एस गल्ला जो पक्का करी ले कि जेबे स्यों परमेसरा रे साम्हणें खड़े हूंणा ता हर एक मसीह मन्झ सिद्ध विस्वासी हूंणे।

²⁹ एस कामा जो पुरे करणे रे कठे हांऊँ मेहनत होर संघर्स करहा। होर एह्ड़ा हांऊँ, मसीह रे एस बडी सामर्था री वजहा ले करहा, जो तिन्हें मुंजो दितिरी होर मेरे मन्झ काम करहा ई।