ṬAH HLA 3 - Common Language

Hremna, simna leh beisei tûr

¹ A thinur tianga vuak tuartu ka ni,

² Ênga kal lovin thimah min hruai.

³ Ni tin a kut ka tuar reng mai.

⁴ Min tichêr a, ka vuai then mai, Ka ruhte pawh min tihtliahsak.

⁵ Rilru na leh hrehawmin min tuam a,

⁶ Thi tawhte angin thimah min awmtîr hi.

⁷ Khaidiatin min phuar tlat a, Chhuak thei lovin min khung.

⁸ Ṭanpui dîla ka au a hre duh lo.

⁹ Ka kalkawngan lung bang a rem tlat a, a tiping zo ta e.

¹⁰ Savawm angin min châng ru a, Sakeibaknei biru ang hian.

¹¹ Ka kawngte chu hlîngin a hnawh khat a, Min chhun pem pheng phung mai.

¹² A thalngul a kuai a, min tin reng hi.

¹³ A bâwma thal ka thinhnûnah a bûr,

¹⁴ Mi zawng zawngin mi nuihzat a, Ni tinin hla min sak el ṭhîn.

¹⁵ Ning hlui khawpin thil khâ min intîr a, Thil hrehawm tak min tuartîr hi.

¹⁶ Ṭiau lung min ṭhialtîr a, Vaivutah min tâltîr hrep a ni.

¹⁷ Lungmuanga awm ka nei lo va, Nuam ka hre tawh hek lo.

¹⁸ Ka tuar ta ngang lo ve, Lalpa lakah ka beisei a bo ta.

¹⁹ Ka tuarna leh ka vahvaihna Hriat chhuah hi hrehawm tak a ni.

²⁰ Ka chhui ka chhuiin ka chau hnêp ṭhîn.

²¹ Hei hi ka hriat chhuahin ka bei a sei leh ṭhîn:

²² Lalpa ngilneihna leh a lainatna chu A chuai ngai lo.

²³ A thar zêl ṭhîn tûk tinin; A va rinawm tak êm!

²⁴ Lalpa hi ka neih chhun a ni a, Amahah chuan ka innghat ang.

²⁵ Amah nghâka zawngtute tân Lalpa hi zawng a ṭha a ni.

²⁶ Lalpan min chhandam hun tûr chu Nghah mai a ṭha.

²⁷ Naupan lai ngeia chhel zir a ṭha,

²⁸ Hrehawm hle mah se, ngawi renga Tuar ngat ngat tûr a ni.

²⁹ Kûna dawh mai tûr a ni a, Beidawn tûr a ni lo.

³⁰ Biangah min bêngin min diriam ṭhîn mah se, Dawh mai tûr a ni e.

³¹ Lalpa chuan min hnâwl hlen dâwn si lo.

³² Min tilungngai na a, ngil a nei êm mai a, Min lainat ṭhîn.

³³ Mihring tihlungngaih leh tihnat hi A duhzâwng a ni lo.

³⁴ Saltâng nghaisak chîngte,

³⁵ Chungnungbera hmuha hleih neih te leh

³⁶ Mi chan ai chhuhsak te hi Lalpa huatzâwng tak a ni e.

³⁷ Lalpan thu a pêk loh chuan tu thu nge hlawhtling ang?

³⁸ Chungnungbera kâ aṭang chuan Thu chhia thu ṭha a chhuak dâwn lâwm ni?

³⁹ Kan dam chhûng hian kan sual vânga kan tuarin Phunnawi tûr em kan nih?

⁴⁰ Kan awm dân hi chhûtin i fiah ang u khai, Lalpa lam i hawi ang u.

⁴¹ Vâna Pathian lamah thinlung hawngin I ṭawngṭai zâwk ang u.

⁴² “Thil sual tiin kan hawisan che a, Nangin min ngaidam lo va ni.

⁴³ Thinur takin min ûm zâwk a, Dîm hlek lovin min tihhlum hi.

⁴⁴ Chhûm chhah takin i inkhuh a, Kan ṭawngṭaina i hnên a thleng thei lo va ni.

⁴⁵ Hnam tin zîngah bawlhhlawh vawm khâwma min siam hi.

⁴⁶ Kan hmêlmaten diriam takin min au khum a,

⁴⁷ Thil râpthlâk leh hrehawm kan tuar,

⁴⁸ Chhiatpui kan tawh avângin Ka mittui hi a luang zawih zawih a ni.

⁴⁹ Bâng lovin ka ṭap ka ṭap mai dâwn,

⁵⁰ Vân aṭangin Lalpan min rawn bih, min hmuh hma chu,

⁵¹ Khawpuia kan fanute tuar ka hmuh chuan Min tilungchhia a ni.

⁵² Hmêlmate chuan a chhan awm hauh lovin Sava ang ziazângin min veh.

⁵³ A nung chungin khurah min thlâk a, lungin min dêng,

⁵⁴ Tuiin ka lu a rawn chîm chuan Ka thi dâwn ta emaw ka ti.

⁵⁵ Khur mawng aṭangin, Lalpa, ka rawn au che a,

⁵⁶ Ka au thâwm chu I ngaithla a, beng hup lovin ka rûm i lo hria a,

⁵⁷ Ka han auh tâk che chuan mi rawn hnaih a, ‘Hlau suh,’ mi ti.

⁵⁸ Lalpa, min rawn chhan a, ka nun i humhim ta.

⁵⁹ Lalpa, ka tuarna i hmu ta a, ka chungthu hi han rêl fel rawh.

⁶⁰ Phuba lâk tuma an inrâwn khâwm hi, I hmu reng ṭhîn a ni.

⁶¹ Lalpa, min diriam dân hi i hre reng a, Min phiar dânte lamin.

⁶² Min beitute chu nilêngin Ka chungchâng thu sawiin an phun sur sur,

⁶³ En teh, an ṭhut pawhin an din pawhin Hla min sak el.

⁶⁴ Lalpa, an thiltih ang zêlin thungrûl ang che.

⁶⁵ Ânchhia lawh la, beidawng rawh se,

⁶⁶ Thinrimin ûm nek teh, Lalpa, Vân hnuai ata tiboral rawh.”