ṬAH HLA 2 - Common Language

Lalpan Jerusalem a hrem

¹ E khai! Lalpa thinurin Zion khua chu thimin a khuh tâk hi. Israel ropuina chu vân aṭangin leiah a paih thla a, A thinur ni-ah chuan a ke nghahchhan A theihnghilh ta a ni.

² Lalpa chuan dîm lo tawpin Judai ram khuate chu a tichhia a, A thinur a, an kulhte chu a tichim bawk. An ram leh an hotute a titlâwm ta.

³ A thinur so sâin Israel chakna chu a tichhia a, Hmêlma an lo kalin a pui duh lo, A vêl kâng fai vek ṭhîn meialh angin Jakoba chungah chuan a thinur chu a alh tâk hi.

⁴ Hmêlma angin a thal chuan a kâp a, An enchim loh fanaute chu a thah zawhsak. Zion khuaa inahte chuan a thinur mei a leih tâk hi.

⁵ Lalpa chu hmêlma ang mai a ni, Israel-te a lem zo va, An kulhte leh an in ropuite a tichhia a, Judai ram chhûngah lusûn rûnpui a thlentîr ta.

⁶ Huana bûk ram angin inkhâwmna inte chu a tiram zo ta a, Zion-ah chuan inkhâwmpui te, sabat serh te, An titâwp ta vek a, A thinur avângin lal leh puithiamte chu a hnâwl.

⁷ A maichâm chu Lalpan a rauhsan a, A Hmun Thianghlim a hawisan ta. A bangte chu hmêlma a ṭhiattîr a, Hlim taka kûtpui an hman ṭhinnaah khân, Hmêlma an haw haw dur dur mai.

⁸ Lalpan Zion kulh chu tihchhiat a tum tlat a, A chhe tûr chin a rîn fel a, A kut thlâk chu a na ngei mai, In sângte leh kulh bangte chu a chim rem rum.

⁹ A kawngkhârte thil chhe hnawkin a chhilh zo va, A kalhna thîr tlâwnte a bung rum mai. Lal leh miliante chu salah an tâng, Dân lah an inzirtîr tawh lo, Zâwlneite pawhin Lalpa inlârna rêng an dawng hek lo.

¹⁰ Zion khaw upate chu leiah ngawi rengin an ṭhu a, An lu vaivut phulin saiip an sin a, Jerusalem nulate chu leiah an kûn.

¹¹ Ka mittui avângin ka meng phe ruai a ni, Ka mite chan chau chu ka lainat êm êm a, ka lung a chhia a ni. Naupangte leh nausênte chu Tual zau laiah an thidang e.

¹² Rilṭâm leh tuihâlin an nute hmaah an ṭap a, Khawlaiah chuan hliam tuar angin an tlu, An nute malchungah an thi.

¹³ Aw Jerusalem, eng nge ka sawi tâk ang? Nang ang hi tu nge awm? Aw Zion nula, engtin nge ka thlamuan tâk ang che? A hliam tuar chu tuifinriat anga zau a ni a, Tu nge tidam thei ang?

¹⁴ Zâwlneite chuan thil ho leh dâwt an hmuhsak che a, I sim theih nân i sualte an tilang ngai lo, Inlârna an hmuhte chu Thil lawilo leh inbumna mai a ni.

¹⁵ Aw Jerusalem, i bula kalte chuan Kut bêngin an chek khum che; Lu an thing a, ‘Hei hi maw khaw mawi ber, Khawvêl chhuan chu!’ an ti.

¹⁶ I hmêlmaten an nuihzat che a, An faifûk a, an ha an ṭhial khum che, ‘Kan lem zo ta, kan duhthusâm thlen ni Kan hmuh tâk hi,’ an ti.

¹⁷ Lalpan a thiltum chu a ti ta a, Hmâna a sawi lâwk daih tawh chu a hlen ta a ni; Dîm hlek lovin a tichhia a, Hmêlmate chuan lâwmin in chungah bawp an khai.

¹⁸ Aw Jerusalem, i bangte chuan Lalpa au se, A chhûn a zân i mittui chu luipui ang luang rawh se, Bâng lêk lovin ṭap ṭap mai rawh.

¹⁹ Tho la, zankhuain Lalpa au rawh, Lalpa hmaah i thinlung chu tui angin leihbua la, Kawtthlêr tina rilṭâma chau i fate nun nân, Bân phar chungin dîl rawh.

²⁰ Lalpa, heti taka i sawisak tâkte hi, en teh, An fa pawmlaite sa an nuten an ei ang maw? Puithiam leh zâwlneite, Lalpa Hmun Thianghlimah an tualthi tûr em ni?

²¹ Kawtthlêrahte naupang leh tar an thi phung mai, Nula leh tlangvâl rual khandaihin an thi, I sâm buan e, lainat lovin.

²² Khâwmpui urhsûna kal khâwm angin, I thinur ni-ah chuan, Kil tin ata kan hmêlmate i ko khâwm a, Lalpa thinurna ni pumpelha him rêng kan awm lo, Kan fa pawm lai, kan chawi tleite, Hmêlmaten an that zo.