ṬAH HLA 1 - Common Language

Jerusalem retheihzia

¹ E khai! Khaw lûn tak ni ṭhîn chu A va chul ta teh ruai êm! Hnam tin ngaihsân ni ṭhîn chu Hmeithai ang a ni ta. Khaw ropui tak ni ṭhîn chu Chhiah khua a chang ta e.

² Zânahte pawh a ṭap tlawk tlawk a, A biangah mittui a luang nguah nguah, Amah ngaina ṭhîntu, thlamuantu rêng a nei lo ve, A ṭhiante chuan an bum, Hmêlma an chang zo ta.

³ Judai ram mite chu hrehawm tuarin salah an tâng, Hnam dang zîngah an awm darh a, Hahchawlhna rêng an hmu zo lo. Ûmtute chuan an nangchîng a, an chêp ta hle a ni.

⁴ Zion panna kawng chu a ṭhing ṭhuap a, Kût hmang tûr pawh an awm ta lo. Kawngkhârte chu a chhe zo va, A hlui ṭhuap mai a ni. Zai thiam nulate chu an chau zo va, Puithiamte pawh an rûm an rûm mai e.

⁵ Hmêlmate chu hotu-ah an chang a, An thaw a veng kher mai. An sual êm vângin Lalpan a hrem a ni, Hmêlmate chuan an fanaute salah an kawisak ta.

⁶ Zion ropuina chu a chuai zo ta, An hotute pawh chu sazuk ûm nek Ṭâmchhâwl chau hnêp ang mai an ni.

⁷ Jerusalem chuan hrehawm mangan a tuar hnuin, A hmânlai ropuina a hre chhuak a, Hmêlmaten an rawn lâk lai khân, Puitu rêng a nei lo. A chan chhe ta êm chu hmêlmaten an diriam e.

⁸ Jerusalem chuan thil sual a ti nasa êm a, A bawlhhlawh ta a ni. Ngaisâng ṭhîntute chuan an hmusit a, A saruak an hmuhsak avângin Zakin a rûm a, lehlam a hawi.

⁹ A bawlhhlawhna, a pawnfêna kai chu Thup tumna pawh a nei thei lo. A chhiat dân chu a râpthlâk êm êm a, Thlamuantu rêng an awm lo ve. “En teh, Lalpa, kan chan chhiatzia hi, Hmêlmate an dinchan tâk hi,”

¹⁰ A thil ṭha neih hmêlmaten an suam a, Hnam dang kal phal lohna Hmun Thianghlima an lût a thlîr reng mai.

¹¹ Ei tûr zawngin mite chu an rûm a, Intunnun nân an thil ṭha neihte chuan ei tûr an lei. “Lalpa, kan nêpzia hi, en teh,” an ti.

¹² Veivâkte hnênah chuan, “En teh u, Ka tuar anga tuar nasa hi awm ve maw, Lalpa thinurna ni a thleng a, ka tuar a nih hi.

¹³ Vânsâng aṭangin mei a rawn thlâk a, Min kâng ta a, min titlâwm ta a ni. Ka awh nân thang a kam a, A letlingin min khai, Awm ngaihna hre lovin ka chau nilêng.

¹⁴ Ka sual a ṭâwn khâwm a, amah ngeiin min awrhtîr a, A nghâwngkawl chu min bahtîr a, a rit êm a, ka chau zo ta. Lalpan hmêlma kutah min hlân ta a ni, Ka tluk lohte kutah chuan.

¹⁵ Kan zînga mi huaite Lalpan a thamlo hle, Min bei tûrin sipai tam tak a ko khâwm a, Kan tlangvâlte tihlum tûr leh Sâwrkhura grep rah sâwr anga, Kan nulate rap sâwr tûrin.

¹⁶ Chuvâng alâwm ka ṭah chiama, Ka mittui pawh a luan zung zung, Min thlamuan tûr an darh zo va, Min tiharh tûr an awm hek lo. Hmêlmate chu an chak tâk avângin ka fate chu an hawihai ta.

¹⁷ Zion chuan bân a phar vêl a, Thlamuantu rêng a hmu zo lo, Jakoba chu Lalpan a vêla mite a huattîr a, Jerusalem chu bawlhhlawh angin an ten a ni.

¹⁸ Lalpa zawng a dik a, a thu ka awih lo zâwk a ni, Mi tinrêngin ka thu hi ngaithla teh u, Ka tuar nasatzia en teh mah u, Kan nula leh tlangvâlte chu salah an tân tâk hi.

¹⁹ Min hmangaih ṭhîntute ka han au va, Min lo bum reng alâwm, Intihharh nân ei tûr an zawng lai chu, Puithiamte leh kan upate tualah an tlu hlum e.

²⁰ Lalpa, ka tuar dân hi en teh, Ka sa huai huai a, lung lêm ka nei thei lo. Ka sual vâng a ni e, pawi ka va han ti êm! Khandaih avângin tualah lusûn an pung. In chhûngah hripui a lêng.

²¹ Ka rûm thâwm hi ngaithla teh u, Thlamuantu rêng ka nei lo ve, Min tuartîr a ni tih ka hmêlmaten An han hriat chuan an lâwm êm êm, I hun tiam chu han thlentîr la, Keimah ang hian tuar ve rawh se.

²² An thil sual tihte chu hmu ve tawh la, Ka sual vânga min hrem ang hian hrem ve ang che, Hrehawm tuarin ka chauh hnêp hi.”