NEHEMIA 2 - Common Language

Jerusalem-ah Nehemia a kal

¹ Ni khat chu lal Artazerzia chuan a lal kum sawmhnihna, Nisan thlaah chaw a ei a, uain chu ka pe a, lungngai hmêl ka put a la hmu ngai lo.

² Chuvângin, “Engtizia nge i hmêl a va ngui ve? Lungngaih rûkna i nei em ni? I dam lo pawh a ni si lo,” tiin min zâwt a. Ka phu zawk a.

³ Lal hnênah chuan, “Lal chu dam reng rawh se; ka pa thlân awmna khawpui chu tihram a ni a, a kulh kawngkhârte a kâng zo vek si a, ngui lo thei em ka nih?” ka ti a.

⁴ Lal chuan, “Eng nge i tih duh?” min ti a. Vâna Pathian hnênah chuan ka ṭawngṭai ta a.

⁵ Lal hnênah chuan, “Lal remtih zâwng a niha, min duhsak takmeuh chuan Judai ramah min kaltîr la, ka pa thlân awmna khuaah ka han kal ang a, ka han siam ṭha ang e,” ka ti a.

⁶ Lalnu pawh a bulah a ṭhu a, lal chuan, “Eng chen nge i thang ang a, engtikah nge i lo kîr leh ang?” min ti a. Ka hâwn leh hun tûr ka hrilh a, lal chuan ka kal a phal ta a.

⁷ Lal hnênah chuan heti hian ka ti bawk: “Lalin rem a tih chuan Eufretis lui khawthlang lam bial awptute chu Judai ram ka thlen thlenga an biala ka kal phal tûrin hrilh ni sela.

⁸ Lal ngawpui vêngtu Asafa hnênah pawh Tempul luhna kawngkhâr tûr te, khawpui bangah te leh ka awmna tûr in sak nân thing min pe tûrin hrilh ni teh se,” ka ti a. Pathianin min awmpui avângin lal chuan ka dîl apiang chu rem a ti zêl a.

⁹ Lal chuan sakawr chungchuang mi sipai rual khat leh an hotute ka ruala kal tûrin a tîr a; Eufretis lui thlang lam ram bialah chuan kan kal ta a, ramawptute hnênah lehkha chu ka pe zêl a.

¹⁰ Beth-horon khaw mi Sanbalata leh Amon biala sawrkâr milian pakhat chuan an lo hriatin Israel mite ṭhatna tûra thawktu tûr lo kal chu an duh lo hle a ni.

¹¹ Jerusalem khua chu ka han thleng a, ni thum ka châwl a.

¹² Pathianin Jerusalem khaw tâna thil tih tûr min pêk chu tu mah ka hrilh lo. Zanlaiah ka tho va, ka ṭhian ṭhenkhatte nên kan chhuak a, ka chuanna sabengtung tih chauh lo chu chuanna tûr sakawr pakhat mah kan keng lo.

¹³ Zânah chuan khawthlang lam ruam panin kawngkaah khua kan chhuahsan a, chhim lam panin Dragon Tuikhur lamah kan kal a. Bawlhhlawh paihna Kawngka kan thleng a, kal pah chuan kulh bang chim chu ngun takin ka en zêl a; kawngkhâr kâng chhiate pawh chu ka en a.

¹⁴ Khawpui chhak lamah, hmâr lam panin kan kal zêl a; Tuikhur Kawngka leh lal tuikhuah kan va thleng a, ka chuanna sabengtung chu lung chim rem rum zîngah chuan a kal tlang thei lo va.

¹⁵ Chuvâng chuan, Kidron lui ruam lamah kan kal a, kulh bang chu ka thlîr zui zêl a. Ka kalna hnuah khân ka kîr leh a, Ruam luhna kawngkhârah khân khuaah chuan ka lût leh ta a.

¹⁶ Khuaa sawrkâr mi tu mahin khawiah nge ka kala, eng nge ka tih an hre lo. Ka Juda-pui, puithiam te, hruaitu te, sawrkâr mi te leh kan hna thawh tûr hmabâk thawktu tûrte hnênah pawh eng mah ka la sawi lo va ni.

¹⁷ An hnênah chuan heti hian ka han ti ta a: “Jerusalem kulh chu a chhe vek a, kawngkhârte lah a kâng zo va, thil ṭha lo tinrêngin min tlâkbuak ta a nih hi. Khawpui kulh hi i siam ṭha ang u khai. Heti taka nuihzatbûr hi kan ni dâwn lo nia,” ka ti a.

¹⁸ Pathianin min awmpui a, min ṭanpui dân te, leh lalin thu min pêkte chu ka hrilh ta a. Anni chuan, “Kulh bang chim i siam ṭha tak ang u hmiang,” tiin min chhâng a. Hna thawk ṭan tûr chuan an insiam ta a.

¹⁹ Beth-horon mi Sanbalata te, Amon mi Tobia te leh Arab mi pakhat Gesema ten kan thiltih tum chu an lo hriat chuan min nuihzatbûr a, hmusit takin, “Eng nge tih in tum vei le? Lal lakah hel in tum elo maw?” an ti a.

²⁰ Kei chuan, “Vân Pathianin min ṭanpui dâwn alâwm. A chhiahhlawhte kan ni a, kulh bang hi kan siam ṭha dâwn a ni. Jerusalem khaw chhûngah hian neih eng mah in nei lo va, Jerusalem mi nihna lah in nei ve hek lo,” tiin ka chhâng a.