NEHEMIA 11 - Common Language

Jerusalem khuaa awmte

¹ Hnam hruaitute chu Jerusalem khuaah an awm a, chhûng sâwm zêla chhûng khat chu Jerusalem khaw thianghlima awm tûrin ṭhumvâwrin an thlang a; mi dang erawh chu khaw danga awm tûrin thingtlâng khuaahte an kal a.

² Jerusalem khuaa awm tûra inpe peihte chu an ngaisâng hle a.

³ Israel rama khawpui deuhvah leh khaw tê deuhva awm puithiam te, Levia chi te, Tempul enkawltute leh Solomona chhiahhlawh thlahte chu an awmna khuaah mahni in ngeiah an awm a ni. Judai rama mi, mi lâr deuh deuh Jerusalem khuaa awmte chu hêng hi an ni:

⁴ Juda thlahte zînga mi: Zekaria tupa, Uzia fa Athaia; ani hi Juda fapa Pereza thlah a ni, a pute chu Amaria te, Sefatia te, Mahalalela te an ni.

⁵ Kolhozea tupa, Baruka fapa Maaseia; ani hi Juda fa Sela thlah zînga mi a ni. A pute chu Hazaia te, Adaia te, Joiariba te leh Zekaria te an ni.

⁶ Pereza thlah mi zali leh sawmruk leh pariatin Jerusalem khuaah in leh lo an nei.

⁷ Benjamina thlahte zînga mi: Joeda tupa Mesulama fa Salua; a pute chu Pedaia te, Kolaia te, Maaseia te, Ithiela te leh Jesaia te an ni.

⁸ Salua laichîn hnai Gabaia leh Salaia pawh Jerusalem-ah an awm. Benjamina thlah Jerusalem-a awm zawng zawng mi zakua leh sawmhnih leh pariat an ni.

⁹ Zikria fapa Joela chu an hotu ber a ni a, Hasenua fapa Juda chu hotu ber dawttu a ni.

¹⁰ Hêng puithiamte hi Jerusalem-ah an awm bawk: Joiariba fapa Jedaia leh Jakina.

¹¹ Mesulama tupa Hilkia fa Seraia. Ani hi a pute chu Zadoka te, Meraiota te leh Puithiam lalber Ahituba te an ni.

¹² He mite chi zariat leh sawmhnih leh pahnihin Tempulah rawng an bâwl ṭhîn. Pelaia tupa Jerohama fapa Adaia. Ani hi a pute chu Amazia te, Zekaria te, Pasura te leh Malkija te an ni.

¹³ An vaiin he chite hi an chhûngkaw hotute nên mi zahnih leh sawmli leh pahnih a ni. Ahzaia tupa, Azarela fa Amasaia. Ani hi a pute chu Mesilemota te leh Imera te an ni.

¹⁴ He chi hi mi za leh sawmhnih leh pariat an awm, sipai huai tak tak an ni. An hotu chu chhûngkaw hung tak zînga mi Zabdiela a ni.

¹⁵ Levia chi Jerusalem-a awmte: Azrikama tupa, Hasuba fa Semaia. Ani hi a pute chu Hasabia te leh Bunia te an ni.

¹⁶ Sabethaia leh Jozabada. Anni hi Levia chi, mi lâr tak, Tempul pâwn lam hna enkawltu an ni.

¹⁷ Asafa thlah, Zabdia tupa, Mika fapa Matania. Ani hi Tempul zaipâwl lâwm hla sak hruaitu a ni. Bakbukia: ani hi Matania puitu a ni. Galala tupa, Samua fa, Abda: ani hi Jeduthuna thlaha mi a ni.

¹⁸ Jerusalem khaw thianghlima Levia chi awm zawng zawng chu mi zahnih leh sawmriat leh pali an ni.

¹⁹ Tempul pulis Jerusalem-a awmte: Akuba te, Talmona te leh an chhûngte nên; an vaiin mi za leh sawmsarih leh pahnih an ni.

²⁰ Israel mi dang chu puithiamte leh Levia chi dangte nên Judai ram khawpui deuhvah te leh khaw tê deuhvah te mahni inah an awm a.

²¹ Tempul enkawltute chu Jerusalem khaw chhûng ‘ofel’ an tih laiah chuan a bingin an awm a ni: Ziha leh Gispa hovin hna an thawk ṭhîn.

²² Levia chite zînga an hotu ber Jerusalem-a awm chu Hasabia tupa, Bania fa Uzia a ni. A pute chu Matania te leh Mika te an ni. Asafa thlahte zînga mi a ni a, Tempula thil ri thei tumtu an ni.

²³ Ni tina an inthlâk kual dân tûr lal thupêk chu ziakin an dah ṭha a.

²⁴ Juda hnama mi, Zera thlah Mesezabela fa Pethahia chu Persia sawrkâra Israel mite aiawhtu a ni.

Khawpui leh khaw tê deuhva awmte

²⁵ Mi tam tak chu an huan ramah an awm thlih thliah a. Juda thlahte chu Judai ram khawpui Kiriat-arba-ah te, Dibon-ah te, Jekabzeel leh an khawperah te an awm ber a.

²⁶ Jesua khuaah te, Molada khuaah te leh Beth-pelet khuaah te,

²⁷ Hazar-sual khawpuiah te leh Beer-seba-ah leh a chhehvêl khuaah te an awm a,

²⁸ Ziklag leh Mekona khua leh a chhehvêl khuaah te.

²⁹ En-rimon-ah te, Zora-ah te, Jarmut-ah te,

³⁰ Zanoa-ah te, Adulam-ah te leh an chhehvêl khuaah te pawh an awm a. Lakis-ah leh a chhehvêl huanah te, Azeka leh a khawperah te an awm bawk a. Juda thlahte chu chhim lamah Beer-seba, hmâr lamah Hinom ruam inkâr ramah an awm ber a ni.

³¹ Benjamina thlahte chu Geba-ah te, Mikmas-ah te, Ai-ah te, Bethel-ah te leh an vêl khawperah te an awm a.

³² Anathot-ah te, Nob-ah te, Anania-ah te,

³³ Hazor-ah te, Rama-ah te, Zeboim-ah te, Nebalat-ah te,

³⁴ Hadid-ah te, Zeboim-ah te, Nebalat-ah te,

³⁵ Lod-ah te, Ono-ah te, themthiamho ruamah te an awm a.

³⁶ Judai rama awm ṭhîn Levia chi mi ṭhenkhat chu Benjamin-ho zîngah an awmtîr a.