MALAKIA 1 - Common Language

¹ Israel-te chungchânga Lalpa thuchhuak Malakia ziak chu

Lalpan Israel-te a hmangaih

² Lalpa chuan, “Ka hmangaih che u a ni,” a ti a. Nangni erawh chuan, “Engah khân nge min hmangaih?” in ti a. Esauva leh Jakoba chu unau an ni a, Tih hi Lalpa thuchhuak a ni. “Jakoba chu ka hmangaih a,

³ Esauva chu ka ngaina lo, A tlângte pawh ram rovah ka siam a, A rochan ram pawh thlalêr sihalte ka pe ta.”

⁴ Edom mite chuan, “Min lo tichhe tawh mah se, Kan khawpui hluite chu kan din thar leh mai ang,” an ti a. Mahse, Lalpa, Engkim Lalpa chuan heti hian a ti: “Din mah se, ka tichhe leh tho vang, ‘Suahsualna ram, kumkhaw Pathian ânchhe dawngho,’ an ti ang.

⁵ In mit ngeiin in hmu ang a, Lalpa chu Israel ram pâwnah pawh, ‘A va lo ropui êm!’ in ti ang.”

Lalpan puithiamte a hau

⁶ “Fapain a pa a chawimawi a, chhiahhlawhin a pu, Kei hi in pa ka ni a, engati nge min chawimawi loh? Kei hi in pu ka ni a, engati nge min ṭih loh?” Engkim Lalpa chuan a ti. “Puithiamte u, nangni hi in ni mi hmusittute chu.” ‘Engah khân nge kan hmuhsit che?’ in ti a,

⁷ ‘Ka maichâma chaw bawlhhlawh in hlanah hian.’ ‘Engtin nge kan tihbawlhhlawh che?’ in ti a. ‘Lalpa maichâm hi a lo nêp mang e,’ in tihah hian.

⁸ Ran mitdel inthawinaa hlan hi a dik maw? Ran kebai leh a silawng hlan pawh a dik maw? In ram rorêltu pe dâwn teh u, in chungah a lâwm ang maw? A hlim hmêl in hmu ang maw?” Engkim Lalpa chuan a ti.

⁹ “Tûnah, Pathian chu, min khawngaih tûrin ngên chiam teh u, Chutiang thil in hlan avângin A lo ngaihsak dâwn che u em ni?” Engkim Lalpa chuan a ti.

¹⁰ “Ka maichâm mei in tihalh hi a sâwt lo, In zînga pakhat hian ka Tempul kawngka khâr law law se a ṭha zâwk tûr! In chungah ka lâwm lo, in thilhlan pawh ka pawm dâwn lo,” Engkim Lalpa chuan a ti.

¹¹ “Ni chhuahna lam aṭanga a tlâkna lam thlengin, Hnam tin zîngah ka hming a ropui ta a ni. Hnam tinin ka hmingin rimtui an hâl ang a, Inthawina pawh an hlân ang, Hnamte zîngah ka hming a ropui ta si a,” Engkim Lalpa chuan a ti.

¹² “ ‘Lalpa maichâm chu a lo nêp mang e, Chuta ei tûr an hlante pawh chu a zahpuiawm.’ In tih hian ka maichâm in tibawlhhlawh a ni.

¹³ ‘A va ninawm êm!’ tiin hnâr in tum khum ta si a,” Engkim Lalpa chuan a ti. “Inthawina atân mi thil in lâksak, Ran kebai te, a silawng te ka lo pawmsak ang che u maw?” Engkim Lalpa chuan a ti.

¹⁴ “Ran hmêlhem lo Lalpa hnêna hlan in tiam a, A patuai ṭha tak nei reng bawk sia, A hmêlhem hlântu chuan ânchhia dawng rawh se, Lal ropui tak ka ni a, hnam tinin ka hming hi an ṭih a ni,” Engkim Lalpa chuan a ti.