DANIELA 3 - Common Language

Nebukadnezaran rangkachak milem biak tûr thu a pe

¹ Lal Nebukadnezaran rangkachak milim a siam a, a sân lam chu tawng sawmruk a ni a, a vâng lam chu tawng ruk a ni. Babulon biala Dura phaizâwlah milim chu a din a.

² A hnuaia lal tenau te, ramawptute leh biala sawrkâr hna thawk zawng zawng chu lal Nebukadnezara din milim serh ni chhim tûrin a chah khâwm a.

³ Milim serh hran ni chuan chûng lal tênau te, ramawptu te, thuneitu te, bial hotu te, tangka vawngtu te, rorêltu te, thuremtu te leh sawrkâr hna thawk zawng zawng te chu an lo kal khâwm a, milim hmaah chuan an ding ṭhup a.

⁴ Tlângauvin ring takin heti hian thu a rawn puang a, “Hnam tin, chi tin, ṭawng tin hmangte u,

⁵ tawtawrâwt an hâm ri in hria ang a, ṭingṭang te, perhkhuang te, bengbung te, phênglâwng te, rawchhêm te leh thil tum rîk theih chi dang te an rawn tum ang a; chûng thil chu an rawn tum veleh lal Nebukadnezara rangkachak milim hmaah in bawkkhup ang a, chibai in bûk tûr a ni.

⁶ Tu pawh, bawkkhupa chibai bûk duh lo chu meipuia paih tûr an ni,” tiin.

⁷ Tichuan, thil tum ri an hriat veleh hnam tin, chi tin leh ṭawng tin hmangte chu lal Nebukadnezara rangkachak milim hmaah chuan an kûn a, chibai an bûk ta a.

Lal thu awih lovah Daniela ṭhiante an puh

⁸ Babulon mi ṭhenkhatten chu chu Juda-te hêkna remchângah an hmang a,

⁹ lal Nebukadnezara hnênah, “Aw lalber, dam reng ang che.

¹⁰ ‘Tawtawrâwt te, ṭingṭang te, perhkhuang te, phênglâwng te, rawchhem te leh thil tum rîk theih chi dangte an tum rîk in hriat veleh rangkachak milim hmaah in bawkkhup ang a, chibai in bûk tûr a ni,

¹¹ a bûk duh lo tawh phawt chu meipuia paih tûr,’ tiin thu i pe a.

¹² Juda mi, Babulon bial ṭhenkhat hotua i dah Sadraka te, Mesaka te, Abednegoa te hian i thu rêng an ngai lo va, i pathiante chibai an bûk duh lo, i rangkachak milim hmaah pawh an kûn duh ve hauh lo,” an ti a.

¹³ Lal Nebukadnezara chu a thinur ta êm êm a, Sadraka te, Mesaka te, Abednegoa te chu a hmaa rawn hruai tûrin thu a pe a, anni chu lal hmaah chuan an rawn hruai a.

¹⁴ Nebukadnezara chuan, “Sadrak, Mesak, Abednego, ka pathian chibai in bûk duh lo va, ka milim din hmaah in kûn duh hek lo tih hi a dik em?

¹⁵ Tawtawrâwt te, ṭingṭang te, perhkhuang te, bengbung te, phênglâwng te, rawchhem te leh thil tum rîk theih chi dang an tum ri in hriatin ka milim siam hmaa bawkkhupa chibai in bûk duh chuan a ṭha a ni mai a, in bûk duh loh erawh chuan meipuia paih nghâl in ni ang. Pathian tuin nge ka kut ata chhan chhuak thei ang che u?” a ti a.

¹⁶ Sadraka te, Mesaka te, Abednegoa te chuan lal chu an chhâng a, “Aw lal Nebukadnezar, he thilah hian kan chhân che a ṭûl lo ve.

¹⁷ Ṭûl a nih chuan kan Pathian biak hian meipui ata min chhan chhuak thei asin, i kut ata pawh min chhan chhuak thei ang.

¹⁸ Min chhan loh pawhin, aw lalber, i pathiante chu chibai kan bûk chuang lo vang, rangkachak milim i din hmaah pawh kan kûn hek lo vang,” an ti a.

Daniela ṭhiante thi tûra tih an ni

¹⁹ Lal Nebukadnezara chu a thinur ta êm êm a, Sadraka te, Mesaka te, Abednegoa te avâng chuan a hmai a sen ṭeuh mai a. Meipui chu a ngai aia lêt sariha saa tuah tûrin thu a pe a.

²⁰ A sipai zînga chak chak chu Sadraka te, Mesaka te, Abednegoa te phuara meipuia paih lût tûrin thu a pe a.

²¹ An kawr te, diar te leh an silhfên dangte inbel vek chung chuan an phuar hlâwm a, meipuiah chuan an paih lût ta a.

²² Lal thupêk chu a khauh êm avâng leh meipui chu a sat êm avângin, Sadraka te, Mesaka te, Abednegoa te meipuia paihtute chu meialh chuan a hliau hlum ta a.

²³ Anni pathum Sadraka, Mesaka, Abednegoa te chu phuar hlâwm reng chungin meipuiah chuan an tla lût ta a.

²⁴ Lal Nebukadnezara chu mak ti zetin a tho thut a, thurâwntute hnênah chuan, “Phuar chungin mi pathum meipuiah kan paih lût a ni lâwm ni?” a ti a. Anni chuan, “Paih lût e, aw lalpa,” an ti a.

²⁵ “Mi pali phuar loh, meialh zînga vei vei ka va hmu si ve, na rêng an ti lo va, a palina phei chu Vântirhkoh hmêl pu a ni,” a ti a.

Ṭhian pathumte chhuah an ni

²⁶ Lal Nebukadnezara chu meipui kawngkhâr bulah chuan a kal a, “Sadrak, Mesak, Abednego, lo chhuak ula hetah hian lo kal teh u,” a ti a. Sadraka te, Mesaka te, Abednegoa te chu meipui aṭang chuan an lo chhuak a.

²⁷ Lal tênau te, ramawptu te, ram rorêltu te leh lal thurâwntu te chu an lo kal khâwm a, hêng mite taksa hi chu meiin a khawih lo va, an sam a kâng lo va, an silhfênte pawh a ût lo va, mei rim lah an nam hek lo tih an rawn hmu a.

²⁸ Nebukadnezara chuan, “Sadraka te, Mesaka te, Abednegoa te Pathian chu fakin awm rawh se. Ani chuan vântirhkoh a rawn tîr a, amah ringa a rawngbâwltute chu a rawn chhan chhuak ta a; lal thupêk awih duh lovin an taksa boral huamin an Pathian chauh lo chu Pathian dang an be duh lo a ni.

²⁹ Chuvângin, hetiang hian thu ka pe e: Sadraka te, Mesaka te, Abednegoa te Pathian sawichhetu hnam emaw, chi emaw, ṭawng chi hrang hmang emaw rêng rêng chu an kut leh an ke pawhsawmsak an ni ang a, an inte pawh tihram a ni bawk ang. Hetianga mi chhan chhuak thei Pathian dang tu mah an awm lo,” a ti a.

³⁰ Lal chuan Sadraka te, Mesaka te, Abednegoa te chu Babulon ram bial hotu zîngah a kaisântîr ta a.