San Mateo 1 - New Testament in Mixe of Mazatlán

Jesús myu̶j'áp myu̶jteedy

¹ Yaa du'un kuja'ay myiñ pu̶njaty je̱'e̱ Jesucristo myu̶j'ap'ajt myu̶jteedy'ajt. Je̱' je̱'e̱ myu̶j'ap'ajt myu̶jteedy'ajt je̱'e̱ David y je̱'e̱ Abraham:

² Abraham je̱' je̱'e̱ y'ung'ajt je̱'e̱ Isaac, je̱'e̱ Isaac je̱' je̱'e̱ y'ung'ajt je̱'e̱ Jacob, je̱'e̱ Jacob je̱' je̱'e̱ y'ung'ajt je̱'e̱ Judá y je̱'e̱ myu̶gue̱'e̱xktu̶jk.

³ Judá mu̶u̶d je̱'e̱ tyo'oxyu̶jk Tamar je̱' je̱'e̱ y'ung'ajtku̶x je̱'e̱ Fares y je̱'e̱ Sara. Je̱'e̱ Fares je̱' je̱'e̱ y'ung'ajt je̱'e̱ Esrom, je̱'e̱ Esrom je̱' je̱'e̱ y'ung'ajt je̱'e̱ Aram.

⁴ Aram je̱' je̱'e̱ y'ung'ajt je̱'e̱ Aminadab, je̱'e̱ Aminadab je̱' je̱'e̱ y'ung'ajt je̱'e̱ Naasón, je̱'e̱ Naasón je̱' je̱'e̱ y'ung'ajt je̱'e̱ Salomón.

⁵ Salomón mu̶u̶d je̱'e̱ tyo'oxyu̶jk Rahab je̱' je̱'e̱ y'ung'ajtku̶x je̱'e̱ Booz. Je̱'e̱ Booz mu̶u̶d je̱'e̱ tyo'oxyu̶jk Rut je̱' je̱'e̱ y'ung'ajtku̶x je̱'e̱ Obed. Je̱'e̱ Obed je̱' je̱'e̱ y'ung'ajt je̱'e̱ Isaí.

⁶ Isaí je̱' je̱'e̱ y'ung'ajt je̱'e̱ ane̱'e̱mbu̶ David, y je̱'e̱ ane̱'e̱mbu̶ David mu̶u̶d je̱'e̱ tyo'oxyu̶jk je̱'e̱ mu̶dyiibu̶ je̱'e̱ Urías najty tu̶ okto'oxyu̶jk'ajtpu̶ju̶ñ je̱' je̱'e̱ y'ung'ajtku̶x je̱'e̱ Salomón.

⁷ Salomón je̱' je̱'e̱ y'ung'ajt je̱'e̱ Roboam, je̱'e̱ Roboam je̱' je̱'e̱ y'ung'ajt je̱'e̱ Abías, je̱'e̱ Abías je̱' je̱'e̱ y'ung'ajt je̱'e̱ Asa.

⁸ Asa je̱' je̱'e̱ y'ung'ajt je̱'e̱ Josafat, je̱'e̱ Josafat je̱' je̱'e̱ y'ung'ajt je̱'e̱ Joram, je̱'e̱ Joram je̱' je̱'e̱ y'ung'ajt je̱'e̱ Uzías.

⁹ Uzías je̱' je̱'e̱ y'ung'ajt je̱'e̱ Jotam, je̱'e̱ Jotam je̱' je̱'e̱ y'ung'ajt je̱'e̱ Acaz, je̱'e̱ Acaz je̱' je̱'e̱ y'ung'ajt je̱'e̱ Ezequías.

¹⁰ Ezequías je̱' je̱'e̱ y'ung'ajt je̱'e̱ Manasés, je̱'e̱ Manasés je̱' je̱'e̱ y'ung'ajt je̱'e̱ Amón, je̱'e̱ Amón je̱' je̱'e̱ y'ung'ajt je̱'e̱ Josías.

¹¹ Josías je̱' je̱'e̱ y'ung'ajt je̱'e̱ Jeconías y je̱'e̱ myu̶gue̱'e̱xktu̶jk, je̱'e̱ mu̶'it tiempo mu̶naa je̱'e̱ Israel ja'ay mach yajnú̶kxu̶gu̶xyu̶ñ jim Babilonia.

¹² Y ko najty jim Babilonia mach tu̶ yajnú̶kxu̶gu̶xyu̶, jim je̱'e̱ Jeconías y'ung paatku̶xy y xu̶u̶mooygyu̶xy Salatiel, y je̱'e̱ Salatiel je̱' je̱'e̱ y'ung'ajt je̱'e̱ Zorobabel.

¹³ Zorobabel je̱' je̱'e̱ y'ung'ajt je̱'e̱ Abiud, je̱'e̱ Abiud je̱' je̱'e̱ y'ung'ajt je̱'e̱ Eliaquim, je̱'e̱ Eliaquim je̱' je̱'e̱ y'ung'ajt je̱'e̱ Azor.

¹⁴ Azor je̱' je̱'e̱ y'ung'ajt je̱'e̱ Sadoc, je̱'e̱ Sadoc je̱' je̱'e̱ y'ung'ajt je̱'e̱ Aquim, je̱'e̱ Aquim je̱' je̱'e̱ y'ung'ajt je̱'e̱ Eliud.

¹⁵ Eliud je̱' je̱'e̱ y'ung'ajt je̱'e̱ Eleazar, je̱'e̱ Eleazar je̱' je̱'e̱ y'ung'ajt je̱'e̱ Matán, je̱'e̱ Matán je̱' je̱'e̱ y'ung'ajt je̱'e̱ Jacob.

¹⁶ Jacob je̱' je̱'e̱ y'ung'ajt je̱'e̱ José, je̱'e̱ María ñiya'aydyu̶jk, y je̱'e̱ María je̱' je̱'e̱ Jesús ung'ajt, je̱'e̱ mu̶dyiibu̶ Cristo yajtijpu̶ñ.

¹⁷ Majmé̱tzk najtzke̱'e̱xu̶'u̶ du'un paady; chonda'agy Abraham u̶xtu̶ David, y jakmajmé̱tzk najtzke̱'e̱xu̶'u̶; chonda'agy ma je̱'e̱ David u̶xtu̶ jibaad mu̶naa je̱'e̱ Israel ja'ay mach yajnú̶kxu̶gu̶xy jim Babilonia, y nan jakmajmé̱tzk najtzke̱'e̱xu̶'u̶; chonda'agy ma je̱'e̱ Israel ja'ay mach yajnú̶kxu̶gu̶xy jim Babilonia u̶xtu̶ jibaad ma je̱'e̱ Cristo mya'axung'ajtyu̶ñ.

Jesucristo mya'axung'áty

¹⁸ Du'un tyuunu̶ jyajtu̶ neby je̱'e̱ Jesucristo mya'axung'ajtyu̶ñ: María, je̱'e̱ Jesús tyaj, tu̶ najty je̱'e̱ kapxy'ajtku̶xy mu̶u̶d je̱'e̱ José ko pyu̶gaangu̶xy, peru̶ ka'anu̶ najty ñaybyudu̶gu̶u̶yu̶gu̶xy ko je̱'e̱ María y'ungjomu̶'ky mu̶u̶d je̱'e̱ Espíritu Santo myu̶k'ajtu̶ñ.

¹⁹ José, je̱'e̱ María ñiya'aydyu̶jk; tu'uda'agyjya'ay je̱'e̱ najty y ka'p najty je̱'e̱ María mayjya'ayjyooty xu̶'u̶wa'añ, chi wyinma'añbyaaty u̶xmadza'añ ayu'uch amechu̶ ka'p pu̶n yajnejwu̶'u̶wa'añ.

²⁰ Du'un najty tyajy myay tuna'añ du'un, ko je̱'e̱ Windzú̶n Dios y'ángel tu'ug ñayyajni'igu̶xu̶'ku̶ kuma'ayjyooty y ñu̶maayu̶: “José, David y'ok'ung y'ok'ana'k, ka'p mdajy mmay y ka'p mdzu̶gu̶'u̶y; mwinduumbú̶gu̶ch je̱'e̱ María neby je̱'e̱ mdo'oxyu̶jku̶ñ, je̱' ko je̱'e̱ ma'axúng mu̶dyiibu̶ pyade̱e̱mbyu̶ñ je̱'e̱ Espíritu Santo kyu̶xpu̶ je̱'.

²¹ Pyaadu̶py je̱'e̱ María y'ung; y Jesús myajxu̶u̶'ádu̶ch. Du'un xyu̶u̶'ádu̶ch je̱' ko je̱' je̱'e̱ jya'ay yajpokyñi'iwa'adzaamb.”

²² Adaa paady ada du'un ku̶xyu̶ tyuunu̶ jyajtu̶, wan du'un yajkuydyúnu̶ch neby je̱'e̱ Dios y'ayuuknajtzkapxu̶u̶ybyu̶ najty tu̶ nu̶ma'ayu̶ñ ko du'un myu̶naañ:

²³ “Ungjomu̶'u̶gu̶p je̱'e̱ to'oxy'ana'k mu̶dyiibu̶ ka'p ya'aydyu̶jk mu̶dtzu̶na'ayñu̶ju̶ñ, y yajma'axung'ádu̶py je̱'e̱ y'ung tu'ug, y Emmanuel myajxu̶u̶'ajtku̶xu̶ch” (mu̶dyiibu̶ du'un ayuuk wimbu̶dzu̶u̶mbu̶ñ: “Dios mu̶u̶d u̶u̶ch ajtu̶m ajku̶xy”).

²⁴ Ko je̱'e̱ José mya'aybyu̶du̶'ky, chi du'un kuydyuuñ neby je̱'e̱ Windzú̶n Dios y'ángel najty tu̶ ñu̶ma'ayiiju̶ñ, y mu̶'it je̱'e̱ María windumbu̶jky neby tyo'oxyu̶jku̶ñ.

²⁵ Peru̶ ka'p myaamujky pyokxmujky ajku̶xy neby je̱'e̱ pu̶kyjya'ay ajku̶xyu̶ñ; u̶xtu̶ koonu̶ je̱'e̱ María y'ung yajma'axung'ajty, je̱'e̱ mu̶dyiibu̶ je̱'e̱ José xyu̶u̶mooyu̶ñ Jesús.