Judas 1 - New Testament in Mixe of Mazatlán

Yajpókxu̶ñ

¹ U̶u̶ch Judas, je̱'e̱ Jesucristo tyuumbu̶ y je̱'e̱ Santiago pyuya'ay, cham u̶u̶ch je̱'e̱ naky nyajnijayu̶'u̶y je̱'e̱ mu̶dyiibu̶ je̱'e̱ Dios Teedy tzojku̶p ju̶wu̶u̶yu̶bu̶ñ y mu̶dyiibu̶ tu̶ wyin'ixyiiju̶ñ ajku̶xy, je̱'e̱ mu̶dyiibu̶ je̱'e̱ Jesucristo kweentu̶'ajtu̶bu̶ñ ajku̶xy.

² Wan je̱'e̱ Dios miich mu̶j ku̶je̱e̱ xypya'a''ayoogu̶xy, wan xyajjootkugu̶u̶ygyu̶xy y xychojkku̶xy xyjyu̶wu̶u̶ygyu̶xy.

Pu̶n je̱'e̱ anu̶u̶ yaj'u̶xpu̶jkku̶xpu̶ñ

³ “Mu̶gu'uktu̶jk mu̶dyiibu̶ u̶u̶ch ndzojkypy nju̶wu̶u̶ybyu̶ñ, je'emy u̶u̶ch du'un nja'amu̶na'añ ko nnijayu̶'u̶waangu̶xy neby je̱'e̱ aanu̶mu̶ ni'idzooku̶ñ u̶u̶ch y miich tu̶ nbaattu̶mu̶ñ ajku̶xy. Peru̶ cham u̶u̶ch je̱'e̱ adzijpu̶ñ nduñ nnijayu̶u̶ygyu̶xy ko nmu̶nukxta'agaangu̶xy ko mmu̶dajtku̶x je̱'e̱ mmu̶bu̶jku̶ñ y ka'p myajtu̶gooygyu̶xy je̱'e̱ mu̶dyiibu̶ je̱'e̱ Dios tu'ook xymyooygyu̶xu̶ñ, je̱'e̱ mu̶dyiibu̶ yajpaatku̶xpu̶ñ ma je̱'e̱ju̶ñ.

⁴ Tu̶ je̱'e̱ ja'ay nije̱' tyu̶gu̶u̶ygyu̶xy mu̶u̶d je̱'e̱ anu̶u̶ ma miich ajku̶xyu̶ñ, je̱'e̱ mu̶dyiibu̶ jékyu̶p yajnigápxku̶x ma je̱'e̱ Dios ñakyu̶ñ ko ayo'onduum ñú̶kxku̶xu̶ch. Ju̶bu̶kja'ay je̱'e̱ du'umbu̶ ja'ay ajku̶xy, myu̶naangu̶xy ko je̱'e̱ tu'ukpajkpu̶ Windzú̶n Dios may'ajt tu̶ tuñ mu̶u̶d u̶u̶ch ajtu̶m ajku̶xy y ko mu̶baad ku̶xyu̶ ju̶bu̶kpu̶ nduunu̶m ajku̶xy, mu̶dyiibu̶ ndimychojku̶mbyu̶ñ ajku̶xy y ka'p je̱'e̱ Dios y'ayuuk tyu̶y'ajt ku'ubu̶jku̶ ajku̶xy, je̱'e̱ mu̶dyiibu̶ tu'kpajk nni'igu'ubajk'ajtu̶m y nwindzu̶n'ajtu̶mbyu̶ñ ajku̶xy.

⁵ Oy miich ada mja'anejwu̶u̶ygyu̶xy, peru̶ nyajja'aymye̱jtzku̶xypy ja'adu'ook ko je̱'e̱ Windzú̶n Dios je̱'e̱ Israel ja'ay yajpu̶dzu̶u̶my jim Egipto naaxjooty, chi u̶x'aam yajku'udu̶gooy pu̶njaty najty ka'amu̶bu̶jku̶bu̶ñ ajku̶xy.

⁶ Y je̱'e̱ ángelestu̶jk mu̶dyiibu̶ je̱'e̱ tyuung ka'p yajkoptu̶gu̶u̶ygyu̶xy ma je̱'e̱ Dios najty tu̶ pyu̶da'agyiiju̶ñ y u̶xmajtzku̶xy je̱'e̱ y'ijttaakt, mach je̱'e̱ agoodztuum je̱'e̱ Dios wiinu̶u̶xu̶u̶ yaj'ijtu̶gu̶xyu̶ u̶xtu̶ koonu̶ je̱'e̱ xu̶u̶ tiempo myu̶baad'ádu̶ch mu̶naa je̱'e̱ Dios je̱'e̱ naaxwiiñjya'ay tu̶ydyúnu̶chu̶ñ.

⁷ Du'un neby je̱'e̱ ángelestu̶jk jyajtku̶xyu̶ñ, nandu'un je̱'e̱ Sodoma y Gomorra kajpt y je̱'e̱ winduuy wingonbu̶ kajpt jyajtku̶xy; ñayye̱jku̶gu̶xy ma je̱'e̱ ya'aydyu̶jk mu̶dtuundu̶goyu̶u̶ mu̶u̶d je̱'e̱ wiingpu̶ to'oxyu̶jk y to'oxyu̶jk mu̶u̶d je̱'e̱ wiingpu̶ ya'aydyu̶jk, y ñayye̱jku̶gu̶xy ma je̱'e̱ ju̶bu̶kpu̶ adzojku̶ñ, ñaymyu̶duundu̶gooyu̶gu̶xy je̱'e̱ ya'aydyu̶jk mu̶u̶d je̱'e̱ myu̶ya'aydyu̶jk y je̱'e̱ to'oxyu̶jk mu̶u̶d je̱'e̱ myu̶do'oxyu̶jk. Paady je̱'e̱ Dios chaachtyuungu̶xy mu̶u̶d je̱'e̱ ju̶u̶n y je̱' du'un ijxpe̱jt wu̶'u̶mgu̶x ma u̶u̶ch nigu̶xyu̶ ajtu̶m ajku̶xyu̶ñ ko jii je̱'e̱ ayoodaakt ma je̱'e̱ pokyjya'ay ñú̶kxku̶xyu̶ñ.

⁸ Nandu'un je̱'e̱ du'umbu̶ ja'ay anu̶u̶'ajtpu̶du̶jk myu̶naangu̶xy ko je̱'e̱ Dios tu̶ myu̶gápxu̶gu̶xy y ko paady mu̶baad ju̶bu̶k axu̶u̶g y'adu̶u̶tzku̶xy, yajtuundu̶gooygyu̶xypy je̱'e̱ ñi'kx kyopt mu̶u̶d je̱'e̱ ju̶bu̶kwinma'añ, y'u̶xtijku̶xypy je̱'e̱ Dios y'ane̱'e̱mu̶ñ y ñi'oj ñiyaaxu̶u̶ygyu̶xypy je̱'e̱ mu̶dyiibu̶ je̱'e̱ mu̶k'ajt jiiby tzajpjooty mu̶dajtku̶xpu̶ñ.

⁹ Je̱'e̱ arcángel Miguel, je̱'e̱ ángel mu̶dyiibu̶ je̱'e̱ mu̶j'ane̱'e̱mu̶ñ mu̶u̶d, ko najty je̱'e̱ mu̶jku'u mu̶dtziptúñ yajtzibu̶u̶yu̶ je̱'e̱ Moisés ñi'kx, ka'p je̱'e̱ mu̶jku'u ojy y ka'p poky'ijxy, je'eyu̶ je̱'e̱ du'un nu̶maay: “¡Je̱'e̱ Windzú̶n Dios miich xy'óju̶p!”

¹⁰ Peru̶ ada du'umbu̶ ja'ay ajku̶xy ñigapxypy ñimu̶dyaakku̶xypy je̱'e̱ ju̶bu̶k axu̶u̶g, je̱'e̱ mu̶dyiibu̶ ka'p nejwu̶u̶ygyu̶xyu̶ñ, y je̱'e̱ mu̶dyiibu̶ jya'anejwu̶u̶ygyu̶xypyu̶ñ du'un je̱'e̱ ijxku̶xy neby je̱'e̱ ju̶yujk animal ka'pu̶ jyoot wyinma'añ, y ko du'un y'adu̶u̶tzku̶xy ku̶'u̶m je̱'e̱ du'un ñayyajtu̶gooyu̶gu̶xy.

¹¹ ¡Ayo'onbaatku̶xu̶p je̱'!, je̱' ko je̱'e̱ Caín y'ijxpe̱jt panu̶kxu̶ ajku̶xy. Ko jyanch'ameeñu̶ch ajku̶xy paady je̱'e̱ ayuuk tu̶y'ajt tu̶ yajtu̶gooygyu̶xy neby je̱'e̱ Balaamu̶ñ, y du'un y'o'kku̶xu̶ch neby je̱'e̱ Coré y'o'kyu̶ñ ko je̱'e̱ Moisés ka'akapxymyu̶doogu̶xy.

¹² Xyajtzo'oydyuungu̶xp je̱'e̱ du'umbu̶ ja'ay ko tu'ugmúky mmu̶dkaay mmu̶d'uukku̶xy agu̶ mu̶bu̶jkpu̶du̶jk ko mxu̶u̶duungu̶xy, y kyaaygyu̶xy y'uukku̶xy xi'ig xon y ka'p xywyindzu̶gu̶u̶ygyu̶xy. Du'un je̱'e̱ ajku̶xy neby je̱'e̱ kweentu̶'ajtpu̶du̶jk mu̶dyiibu̶ ku̶'u̶m naygyweentu̶'ajtu̶gu̶xpu̶ñ. Du'un je̱'e̱ ajku̶xy neby jok ye̱e̱g mu̶dyiibu̶ nu̶u̶ ka'p mu̶u̶du̶chu̶ñ y du'uñyu̶ pyojnáxy. Du'un je̱'e̱ ajku̶xy neby kepy mu̶dyiibu̶ ka'p tyu̶u̶m'áty mu̶naa je̱'e̱ y'aatzu̶ñ, jayu̶jp y'ok'yajpúxy y chi tiktzjooty jyaktimyyajkupuxu̶'u̶y.

¹³ Du'un neby y'adu̶u̶tzku̶xyu̶ñ oy cho'oydyuunu̶ je̱'e̱ du'un, du'un y'awa'anu̶ch ajku̶xy neby je̱'e̱ mejy opyky y'awa'anda'agyu̶ñ ko mu̶kjaty jyanchpu̶du̶'u̶gy. Du'un je̱'e̱ ajku̶xy neby je̱'e̱ mu̶dza'a mu̶dyiibu̶ tu̶ tyu'udu̶gooygyu̶xyu̶ñ y y'ijtku̶xy tu̶goydyuum ma wiinu̶u̶xu̶u̶ mu̶j agoodztuumb y'ijtku̶xu̶chu̶ñ.

¹⁴ Nandu'un je̱'e̱ Enoc, je̱'e̱ Adán myu̶juxtujk najtzke̱'e̱xu̶'u̶bu̶, ñajtzkapxu̶u̶yu̶ je̱'e̱ Dios y'ayuuk ko je̱'e̱ ja'ay nigapxy myu̶naañ: “N'ijxu̶ch je̱'e̱ Windzú̶n Dios, ko je̱'e̱ y'ángelestu̶jk mil'aam mu̶dmiñ,

¹⁵ y tu̶ydyuna'añ je̱'e̱ naaxwiiñjya'ay ku̶xyu̶ y yajpokykya'awa'añ ku̶xyu̶ je̱'e̱ ju̶bu̶kja'aydyu̶jk ajku̶xy, mu̶u̶d je̱'e̱ ju̶bu̶kpu̶ mu̶dyiibu̶ tu̶ tuungu̶xyu̶ñ y mu̶u̶d je̱'e̱ jyu̶bu̶kja'ay'ajtu̶ñ ajku̶xy y mu̶u̶d je̱'e̱ ju̶bu̶k ayuuk mu̶dyiibu̶ je̱'e̱ Dios mu̶u̶d tu̶ ni'oj niyaxu̶u̶ygyu̶xyu̶ñ.”

¹⁶ Je̱'e̱ du'umbu̶ ja'ay anu̶u̶'ajtpu̶du̶jk janch ne̱'e̱mgu̶xp je̱', ka'p je̱'e̱ tii oy'ijxku̶xy y ku̶xyu̶ ni'oj niyaxu̶u̶ygyu̶xy, je̱'e̱ kyu̶'u̶mjootkujk'ajtu̶ñ je̱'e̱ je'eyu̶ y'u̶xtaaygyu̶xypy. Amu̶j jootmu̶j kyápxku̶xy myu̶dyaakku̶xy, oy je̱'e̱ ja'ay nigapx nimu̶dyaakku̶xy neby du'un ku̶xyu̶ tii ijxku̶x paatku̶xu̶chu̶ñ ma je̱'e̱ju̶ñ.

Mu̶bu̶jkpu̶du̶jk yajwingápx yajju̶jpkapxu̶u̶ygyu̶xy

¹⁷ Peru̶ miich mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, ja'aymye̱jtzku̶x neby je̱'e̱ nWindzú̶n Jesucristo ajtu̶m ajku̶xy y'apóstol

¹⁸ xyñu̶maaygyu̶xyu̶ñ: “Ko naty je̱'e̱ xu̶u̶ tiempo kyu̶xaan tyu̶goyaanu̶, jii'ádu̶p je̱'e̱ ja'ay mu̶dyiibu̶ je̱'e̱ Dios jye̱' nixi'igu̶p yajxi'igu̶bu̶ñ, chu̶naaygyu̶xu̶ch jyugy'ajtku̶xu̶ch du'un neby je̱'e̱ ju̶bu̶kwinma'añ ku̶'u̶m ñayyajmu̶dzojku̶gu̶xyu̶ñ.”

¹⁹ Je̱'e̱ du'umbu̶ ja'ay je̱'e̱ mu̶bu̶jkpu̶du̶jk nayyajmu̶dzibu̶u̶yu̶gu̶xp: je̱'e̱ mu̶dyiibu̶ je̱'e̱ ñi'kx ju̶bu̶kpu̶ adzojkku̶xpu̶ñ, je̱'e̱ mu̶dyiibu̶ ya naaxwiiñ yajpaatpu̶ñ y ka'p je̱'e̱ Dios y'Espíritu mu̶dajtu̶ ajku̶xy.

²⁰ Peru̶ miich mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ygyu̶xypyu̶ñ, mmu̶dajtku̶x je̱'e̱ mmu̶bu̶jku̶ñ tu'ug'aa tu'ugjoot, je̱'e̱ mu̶dyiibu̶ je̱'e̱ Dios tu̶ xymyooygyu̶xyu̶ñ y ka'p m'u̶xtu̶gu̶'u̶wa'kku̶xy. Mu̶bu̶jktzoogu̶x je̱'e̱ Dios mu̶u̶d je̱'e̱ Espíritu Santo pyube̱jtu̶ñ.

²¹ Naygyweentu̶'ajtu̶gu̶x neby je̱'e̱ Dios xychojkku̶xy xyjyu̶wu̶u̶ygyu̶xyu̶ñ, y ja'ay'e̱jxku̶x je̱'e̱ xu̶u̶ mu̶naa je̱'e̱ nWindzú̶n Jesucristo ajtu̶m ajku̶xy mu̶u̶d je̱'e̱ pya'a''ayo'on je̱'e̱ jugy'ajt wiinu̶u̶xu̶u̶bu̶ xymyooyu̶mu̶chu̶ñ ajku̶xy.

²² Pa'a''ayoogu̶x pu̶njaty amuumdu'ugjoot ka'amu̶bu̶jkku̶xpu̶ñ.

²³ Pube̱jtku̶x nije̱' ka'pu̶ ayo'onduum ñú̶kxku̶xu̶ch, du'un neby du'umbu̶ ju̶u̶njooty myajpu̶dzu̶u̶mgu̶xyu̶ñ, y pa'a''ayoogu̶x pu̶n pokytyuungu̶xpu̶ñ, peru̶ naygyweentu̶'ajtu̶gu̶x ma je̱'e̱ du'umbu̶ ja'ay ajku̶xyu̶ñ u̶xtu̶ je̱'e̱ wyitpaad, je̱' ko du'un wyit tyukxy je̱'e̱ ajku̶xy neby du'umbu̶ tu̶ jyu̶bu̶kku̶'u̶yu̶ñ mu̶u̶d je̱'e̱ jyu̶bu̶ktzu̶naay jyu̶bu̶kjugy'ajtu̶ñ ajku̶xy.

Ku'umaayu̶ñ y yajpókxu̶ñ mu̶dyiibu̶ ku̶jxp maayñu̶byu̶ñ

^24-25 Je̱'e̱ tu'kpajkpu̶ Dios, u̶u̶ch nniwaambu̶ nyajtzookpu̶ ajtu̶m ajku̶xy mu̶k'ajt mu̶dajtp neby miich xykyweentu̶'ajtku̶xu̶chu̶ñ ka'pu̶ pokyjyooty mga'agu̶xu̶ch, y xyajwinguwa'agu̶u̶ygyu̶xu̶ch jaybyokymyu̶u̶d y xi'ig xon ma je̱'e̱ y'oy'ajt yajpaadyu̶ñ. Je̱' je̱'e̱ oy'ajt, je̱'e̱ mu̶j'ajt, je̱'e̱ mu̶k'ajt y je̱'e̱ ane̱'e̱mu̶ñ paattu̶p, mu̶u̶d je̱'e̱ nWindzú̶n Jesucristo kyu̶xpu̶ ajtu̶m ajku̶xy, jékyu̶p, jada'achám y wiinu̶u̶xu̶u̶. Jaanch adaa du'un.