Filemón 1 - New Testament in Mixe of Mazatlán

Je̱'e̱ yajpókxu̶ñ

¹ U̶u̶ch Pablo, pujxtu̶jk'u̶ñaaybyu̶ch je̱' gyu̶xpu̶ ko u̶u̶ch je̱'e̱ Cristo Jesús y'ayuuk tyu̶y'ajt ngapxwa'kxu̶, cham adayaaba naky nyajniguéxy kipxy mu̶u̶d je̱'e̱ nmu̶gu'ug Timoteo ajtu̶m, miich Filemón, mu̶dyiibu̶ oy nnaychojk nnayjyu̶wu̶u̶yu̶mbu̶ñ y mu̶dyiibu̶ kipxy tuunu̶mbu̶ñ,

² y je̱'e̱ mu̶bu̶jkpu̶du̶jk mu̶dyiibu̶ nayyo'oymyujku̶gu̶xp Dios o'owu̶dajtpu̶ ma je̱'e̱ mdu̶jku̶ñ, du'un neby je̱'e̱ nmu̶gu'ug Apia ajtu̶m je̱'e̱ to'oxyu̶jk y je̱'e̱ Arquipo mu̶dyiibu̶ je̱'e̱ Dios y'ayuuk tyu̶y'ajt nandu'un kapxwa'kxku̶xpu̶ñ.

³ Wan je̱'e̱ Dios u̶u̶ch je̱'e̱ nDeedy ajtu̶m y je̱'e̱ Windzú̶n Jesucristo oy'ajt may'ajt tuñ ma miich ajku̶xyu̶ñ y xyajjootkujk'ajtku̶xu̶ch.

Je̱'e̱ tzojk'ajtu̶ñ y je̱'e̱ mu̶bu̶jku̶ñ mu̶dyiibu̶ je̱'e̱ Filemón myu̶dajtypyu̶ñ

⁴ Je'emy u̶u̶ch je̱'e̱ Dioskujuuyu̶p nyeky ma u̶u̶ch je̱'e̱ nDiosu̶ñ mu̶u̶d miich kyu̶xpu̶ ko nja'aymye̱jtzpaady ko u̶u̶ch nDiosmu̶bu̶jktzóy.

⁵ Je̱' ko u̶u̶ch je̱'e̱ ayuuk tu̶ nmu̶doy neby je̱'e̱ ja'ay mdzoky mju̶wu̶'u̶yu̶ñ y neby je̱'e̱ windzú̶n Jesús tu'ug'aa tu'ugjoot mu̶bu̶kyu̶ñ y neby ku̶xyu̶ mdzoky mju̶wu̶'u̶yu̶ñ pu̶njaty je̱'e̱ Dios mu̶duungu̶xpu̶ñ.

⁶ Y nmu̶bu̶jktzooybyu̶ch je̱'e̱ Dios ko miich mu̶dyiibu̶ kipxy tu̶ nmu̶bu̶jku̶m je̱'e̱ Windzú̶n Jesús, mwinju̶wu̶'u̶wu̶ch je̱'e̱ oy'ajtu̶ñ ku̶xyu̶ oy yajxón mu̶dyiibu̶ nmu̶dajtu̶mby mu̶u̶d je̱'e̱ Cristo Jesús kyu̶xpu̶.

⁷ Janch jootkujku̶ch y janch xondaakpu̶ch yam nyajpaady ko je̱'e̱ ja'ay mdzoky mju̶wu̶'u̶y. Dioskujuuyu̶p miich mu̶gu'ug, je̱' ko jim je̱'e̱ mu̶bu̶jkpu̶du̶jk pyudaj pyumayu̶u̶yu̶ñ tu̶ paatku̶xy ma miichu̶ñ.

Pablo may'ajt tu'ug yujkwa'añ ma je̱'e̱ Filemongu̶ñ mu̶u̶d je̱'e̱ Onésimo kyu̶xpu̶ mu̶dyiibu̶ ni'idoogyu̶ñ

⁸ Paady neby je̱'e̱ Cristo y'apóstolu̶ñ xyjya'apaatpu̶ch it neby n'ane̱'e̱mu̶chu̶ñ tii mu̶baad mduñu̶ñ.

⁹ Peru̶ ni'igu̶ oy ko nyajmu̶ju̶'u̶gu̶ch je̱' ko ndzoky nju̶wu̶'u̶y. U̶u̶ch Pablo, tu̶ u̶u̶ch n'amu̶jja'ayu̶u̶yñu̶, y nbujxtu̶jk'u̶ña'ayu̶ch yam, je̱' gyu̶xpu̶ ko u̶u̶ch je̱'e̱ Cristo Jesús y'ayuuk tyu̶y'ajt ngapxwa'kxu̶.

¹⁰ Cham u̶u̶ch je̱'e̱ may'ajt tu'ug nyujkwa'añ ma miichu̶ñ mu̶u̶d je̱'e̱ Onésimo kyu̶xpu̶ mu̶dyiibu̶ u̶u̶ch du'un nju̶wu̶u̶by neby je̱'e̱ ku̶'u̶m'úngu̶ñ, je̱' ko je̱'e̱ Jesús ya tu̶ mu̶bu̶ky ma u̶u̶ch ya nbujxtu̶jk'u̶ña'ayu̶ñ.

¹¹ Je̱'e̱ tu̶u̶bu̶ xu̶u̶ tiempo ñaxy, je̱'e̱ Onésimo ni'idoogy je̱'e̱ tu̶ y'ity ma miichu̶ñ, je̱'e̱ mu̶dyiibu̶ ka'p tu̶ y'u̶mu̶doy tu̶ kyapxymyu̶doyu̶ñ, peru̶ jada'achám tunaamb kapxymyu̶dowaanu̶py je̱' ma miich y ma u̶u̶chu̶ñ.

¹² Cham u̶u̶ch je̱'e̱ ja'adu'ook ngue̱jxwimbíty ma miichu̶ñ: ku'ubú̶k oy yajxón du'un neby it naty u̶u̶chpyu̶ du'un xykyu'ubu̶jkpu̶ñ.

¹³ U̶u̶ch oy u̶u̶ch du'un tu̶ nja'atzóky ko u̶xyu̶py ya wyu̶'u̶my neby u̶u̶ch ya mu̶baad xymyu̶duñu̶ñ, neby it naty miichpyu̶ du'un xymyu̶duumbu̶ñ ma u̶u̶ch ya nbujxtu̶jk'u̶ña'ayu̶ñ, je̱' gyu̶xpu̶ ko u̶u̶ch je̱'e̱ Jesús y'ayuuk tyu̶y'ajt ngapxwa'kxu̶.

¹⁴ Peru̶ ka'p u̶u̶ch n'a'ixu̶'u̶y nnú̶kxyu̶ch nyajwu̶'u̶my pu̶nu̶ ka'p naty du'un jayu̶jp tu̶ mmu̶na'añ, ka'p u̶u̶ch ndzoky nu̶kxy tijaty adzip ama'ad mduñ; je̱' u̶u̶ch ndzojkypy ko u̶u̶ch oy'eemby xypyubé̱du̶ch mu̶u̶d je̱'e̱ mgu̶'u̶mdzojku̶ñ.

¹⁵ Wandu̶ je̱'e̱ Onésimo paady xykyu'ugueeky tu'ktiempo neby je̱'e̱ Windzú̶n Jesús mu̶baad mu̶bu̶kyu̶ñ y neby mu̶baad cham wiinu̶u̶xu̶u̶ wiinu̶u̶tiempo mu̶dajtnu̶ju̶ñ.

¹⁶ Y ka'p du'un cham m'okmu̶dajtnu̶ch neby je̱'e̱ tuumbu̶ ni'idoogypyu̶ju̶ñ, du'un je̱'e̱ mu̶dajtnu̶ch neby je̱'e̱ ka'pu̶ ñi'idoogyu̶chu̶ñ y neby je̱'e̱ mmu̶gue̱'e̱xk mu̶dyiibu̶ oy mdzojkypy mju̶wu̶u̶ybyu̶ñ. U̶u̶ch janch'óyu̶ch yu̶'u̶ ndzoky nju̶wu̶'u̶y, peru̶ miich jakni'igyu̶ je̱'e̱ cham mdzojknu̶ch mju̶wu̶u̶yñu̶ch ka'p dyu'unu̶ch neby je̱'e̱ wiing ja'ayu̶ñ, du'un mdzojknu̶ch mju̶wu̶u̶yñu̶ch neby je̱'e̱ mu̶dyiibu̶ je̱'e̱ Windzú̶n Jesús mu̶bu̶jkpu̶ñ.

¹⁷ Pu̶nu̶ jaanch u̶u̶ch miich xymyu̶gu'ug'áty ko u̶u̶ch je̱'e̱ Windzú̶n Jesús nmu̶bu̶ky, ku'ubú̶k yu̶'u̶ Onésimo neby it naty u̶u̶chpyu̶ du'un xykyu'ubu̶jkpu̶ñ.

¹⁸ Pu̶nu̶ tu̶ jinjaty we̱njaty xymyu̶duundu̶góy, o pu̶nu̶ xymyu̶nukxy'ajtp we̱e̱nu̶, u̶u̶ch miich nmu̶gubé̱tu̶py.

¹⁹ U̶u̶ch Pablo, cham u̶u̶ch adaa naky nja'ay mu̶u̶d u̶u̶ch je̱'e̱ ngu̶'u̶mgu̶'u̶ ngu̶'u̶mleetra, u̶u̶ch miich nmu̶gubé̱tu̶py du'uñdyu̶ je̱'e̱ Onésimo xymyu̶nukxy'atyu̶ñ. Oy u̶u̶ch yam nga'a'u̶u̶baady nga'akapxpaady ko u̶u̶ch miich xymyu̶nukxy'aty ko je̱'e̱ Dios y'ayuuk tyu̶y'ajt tu̶ nyajmu̶bú̶ky.

²⁰ Mu̶gu'ug, tuunu̶gyu̶ch adayaaba mu̶jmay'ajt neby je̱'e̱ mu̶bu̶jkpu̶du̶jk mu̶dyiibu̶ je̱'e̱ Windzú̶n Jesús mu̶bu̶jkpu̶ñ; yajjootkugu̶u̶yu̶gyu̶ch je̱'e̱ n'aa njoot neby je̱'e̱ mu̶gu'ug mu̶dyiibu̶ je̱'e̱ Cristo mu̶bu̶jkpu̶ñ.

²¹ Nijayu̶u̶by, je̱' ko u̶u̶ch nejwu̶'u̶y ko m'u̶u̶mu̶dóy mgapxymyu̶doy, y nejwu̶u̶ybyu̶ch ko mdúnu̶py je̱'e̱ may'ajt ni'igyu̶, ni'igu̶ ka'p mu̶dyiibu̶ yam nyujkwaanu̶byu̶ñ.

²² Nandu'un yam nnu̶ma'ay: Tun je̱'e̱ may'ajt ni'ixu̶u̶yu̶gyu̶ch je̱'e̱ ja'ttaakt tu'ug, je̱' ko nju̶jp'ijxypyu̶ch ko pujxtu̶jkpu̶dzú̶mu̶bu̶ch tzojku̶, je̱' ko je̱'e̱ Dios miich mjanchmu̶bu̶jktzoogu̶xy mu̶u̶d u̶u̶ch kyu̶xpu̶, neby u̶u̶ch mu̶baad nu̶kxy ma miich ajku̶xyu̶ñ nu̶kxy ngu'ijxku̶xy nmu̶gápxku̶xy.

Pablo myu̶gu'ugtu̶jk yajpókxu̶ñ y kunukxu̶ñ jak'yajniguéxy

²³ Cham je̱'e̱ Epafras xyajpókxy, u̶u̶ch je̱'e̱ nmu̶bujxtu̶jkja'ay, je̱' gyu̶xpu̶ ko u̶u̶ch je̱'e̱ Cristo Jesús y'ayuuk tyu̶y'ajt ngapxwa'kxu̶ ajku̶xy,

²⁴ y nan xyajpókxp je̱'e̱ Marcos, je̱'e̱ Aristarco, je̱'e̱ Demas y je̱'e̱ Lucas, je̱'e̱ mu̶dyiibu̶ u̶u̶ch ya xypyube̱jtku̶xpu̶ñ ma je̱'e̱ Windzú̶n Jesús tyuungu̶ñ.

²⁵ Wan je̱'e̱ Windzú̶n Jesucristo oy'ajt may'ajt tuñ ma miich ajku̶xyu̶ñ. Jaanch adaa du'un.