Efesios 1 - New Testament in Mixe of Mazatlán

Je̱'e̱ yajpókxu̶ñ

¹ U̶u̶ch Pablo, Jesucristo y'apóstol, je̱'e̱ Dios u̶u̶ch du'un tu̶ xyajmu̶dzóky, cham u̶u̶ch adaa naky nguexy jim ma je̱'e̱ Efesio kajptu̶ñ ma je̱'e̱ ja'ay ajku̶xyu̶ñ je̱'e̱ mu̶dyiibu̶ je̱'e̱ Dios jya'ay'ajtypyu̶ñ y je̱'e̱ mu̶dyiibu̶ je̱'e̱ Cristo Jesús mu̶bu̶jkku̶xpu̶ñ.

² Wan je̱'e̱ Dios u̶u̶ch je̱'e̱ nDeedy ajtu̶m y je̱'e̱ Windzú̶n Jesucristo je̱'e̱ oy'ajt may'ajt tuñ ma miich' ajku̶xyu̶ñ, y xyajjootkujk'ajtku̶xu̶ch.

Je̱'e̱ kunukxu̶ñ tzajpjootypyu̶ jim je̱'e̱ nbaattu̶m ma je̱'e̱ Crístoju̶ñ

³ Tzu̶k je̱'e̱ Dios u̶u̶baat kapxpaattu̶m ajku̶xy y je̱'e̱ nWindzú̶n Jesucristo Tyeedy ajtu̶m ajku̶xy, je̱' ko tu'ugyu̶ nyajpaatu̶m ajku̶xy ma je̱'e̱ Crístoju̶ñ tu̶ je̱'e̱ xykyunúkxu̶m ajku̶xy jiiby tzajpjooty mu̶u̶d je̱'e̱ kunukxu̶ñ ku̶xyu̶ mu̶dyiibu̶ jiiby tzajpjooty tzombu̶ñ.

⁴ Dios xywyin'ijx je̱'e̱ jékyu̶p ajtu̶m ajku̶xy neby mu̶baad tu'ugyu̶ nyajpaatu̶mu̶ñ ajku̶xy ma je̱'e̱ Crístoju̶ñ, ka'anu̶ je̱'e̱ naaxwiimbu̶ najty yajkojyñu̶, neby mu̶baad wyinduuy nyajpaatu̶mu̶ñ ajku̶xy oy wa'adz ma je̱'e̱ju̶ñ y jaybyokymyu̶u̶d. Je̱' ko xychojku̶m ajku̶xy,

⁵ tu̶ najty xyajniwinmayu̶u̶yu̶m ajku̶xy ko du'un xykyu'ubu̶gaanu̶m ajku̶xy neby je̱'e̱ kyu̶'u̶m'úngu̶ñ mu̶u̶d je̱'e̱ Jesucristo kyu̶xpu̶, du'un neby najty je̱'e̱ tu̶ nibu̶daagu̶'u̶yu̶ñ ko tu̶ xychojku̶m ajku̶xy.

⁶ Paady u̶u̶ch je̱'e̱ Dios je'emy n'u̶u̶baatku̶xy ngapxpaatku̶xy mu̶u̶d je̱'e̱ myu̶j'oy'ajt myu̶jmay'ajt mu̶dyiibu̶ mu̶u̶d xykyunukxy ajtu̶m ajku̶xy, mu̶u̶d je̱'e̱ y'ung je̱'e̱ mu̶dyiibu̶ oy chojkypy jyu̶wu̶u̶ybyu̶ñ.

⁷ Je̱' ko je̱'e̱ Dios mu̶j xychojku̶m xyjyu̶wu̶u̶yu̶m y tu̶ xyaj'awa'adzpu̶dzu̶u̶mu̶m mu̶u̶d je̱'e̱ y'ung ñe'pty je̱'e̱ mu̶dyiibu̶ te̱e̱m yojku̶ñ, y tu̶ je̱'e̱ nboky ngu̶dyeey xywyinmé̱kxu̶yu̶ ajtu̶m ajku̶xy.

⁸ Tu̶ je̱'e̱ Dios yajni'igu̶xu̶'u̶gy ko xychojku̶m xyjyu̶wu̶u̶yu̶m ajku̶xy, ko ku̶xyu̶ tu̶ xymyooyu̶m ajku̶xy je̱'e̱ wij'ajt ke̱j'ajt y je̱'e̱ joot winma'añ,

⁹ y nan tu̶ xyajnejwu̶u̶yu̶m je̱'e̱ mu̶dyiibu̶ ka'p pu̶n nejwu̶'u̶y ko xychojku̶m o neby najty je̱'e̱ ku̶'u̶m tu̶ nibu̶daagu̶'u̶yu̶ñ ko du'un tuna'añ.

¹⁰ Je̱'e̱ mu̶dyiibu̶ ñiwinmayu̶u̶yu̶ñ ko tuna'añ, tyune̱e̱mby je̱' mu̶naa naty je̱'e̱ xu̶u̶ tiempo myu̶baad'ajtnu̶ju̶ñ, Dios yajku̶'u̶du̶gu̶'u̶we̱e̱mby je̱'e̱ Cristo ku̶xyu̶ je̱'e̱ ane̱'e̱mu̶ñ mu̶dyiibu̶ jiiby tzajpjooty yajpaatpu̶ñ y mu̶dyiibu̶ yaa naaxwiiñ yajpaatpu̶ñ.

¹¹ Tu̶u̶yu̶p najty je̱'e̱ Dios xywyin'ijxu̶m ajku̶xy wan tu'ugyu̶ n'ijtu̶mu̶ch mu̶u̶d je̱'e̱ Cristo y nbaattu̶mu̶ch ajku̶xy je̱'e̱ mu̶dyiibu̶ xymyo'owaamb ajtu̶m ajku̶xy, je̱'e̱ mu̶dyiibu̶ xypyaatp ajtu̶m ajku̶xyu̶ñ, du'un neby je̱'e̱ Dios ku̶'u̶m niwinmayu̶u̶yu̶ñ y du'un neby ku̶xyu̶ tuñu̶ñ, du'un je̱'e̱ tuñ neby je̱' ku'umáyu̶ñ.

¹² Y tu̶ du'un tuñ neby u̶u̶ch ajtu̶m ajku̶xy mu̶dyiibu̶ jayu̶jp tu̶ nmu̶bu̶jku̶mu̶ñ je̱'e̱ Cristo, mu̶baad ndzu̶naay njugy'ajtu̶m ajku̶xy neby je̱'e̱ Dios du'un u̶u̶baady kapxpaady y'ídu̶chu̶ñ mu̶u̶d je̱'e̱ myu̶j'ajtu̶ñ.

¹³ Y nandu'un miich ajku̶xy ko je̱'e̱ tu̶y'ajtpu̶ ayuuk tu̶y'ajt mmu̶doogu̶xy, ko je̱'e̱ aanu̶mu̶ ni'idzooku̶ñ yajkapxwa'kxy, y mmu̶bu̶jkku̶xy je̱'e̱ Cristo, mu̶'it du'un mdu'ugyu̶ju̶u̶y ajku̶xy mu̶u̶d je̱'e̱ Cristo. Y je̱'e̱ Espíritu Santo xyñidu̶y'ajt'ajtku̶xp ko je̱'e̱ Dios xyjya'ay'ajtku̶xy, je̱'e̱ mu̶dyiibu̶ je̱'e̱ Dios xyajwinwaanu̶u̶yu̶ñ ajku̶xy ko xymyo'owaangu̶xy.

¹⁴ Je̱'e̱ Espíritu Santo du'un je̱'e̱ neby je̱' tu̶ xykyujuuyu̶'ku̶mu̶ñ ajku̶xy ko nbadaanu̶m ajku̶xy je̱'e̱ mu̶dyiibu̶ je̱'e̱ Dios xymyo'owaamb ajtu̶m ajku̶xy ko naty je̱'e̱ xu̶u̶ tiempo tu̶ myu̶baad'ajtnu̶ mu̶naa je̱'e̱ Dios ku̶xyu̶ yaj'awa'adzpu̶dzu̶ma'añu̶ñ je̱'e̱ mu̶dyiibu̶ jya'ay'ajtypyu̶ñ, neby du'un u̶u̶baady kapxpaady y'ídu̶chu̶ñ mu̶u̶d je̱'e̱ myu̶j'ajtu̶ñ.

Pablo Dios mu̶bu̶jktzóy ko je̱'e̱ Dios je̱'e̱ mu̶bu̶jkpu̶du̶jk wijy'ajt ke̱j'ajt wan mo'oy

¹⁵ Je̱' ko nnejwu̶u̶ybyu̶ch ko miich tu̶ mmu̶bu̶jkku̶xy je̱'e̱ Windzú̶n Jesús y nan ko je̱'e̱ Dios jya'ay ku̶xyu̶ mdzojku̶ mju̶wu̶u̶yu̶ ajku̶xy,

¹⁶ paady u̶u̶ch je̱'e̱ Dioskujuuyu̶p jaboom jaboom nyeky ma je̱'e̱ Diosu̶ñ mu̶u̶d miich kyu̶xpu̶ ajku̶xy, nja'aymye̱jtzku̶xy ko u̶u̶ch nDiosmu̶bu̶jktzóy.

¹⁷ Nmu̶bu̶jktzooybyu̶ch je̱'e̱ Dios, je̱'e̱ nWindzú̶n Jesucristo Tyeedy'ajtu̶m ajku̶xy, je̱'e̱ mu̶jpu̶ Dios Teedy, ko je̱'e̱ wijypyu̶ kejypyu̶ joot winma'añ wan xymyooygyu̶xy wan je̱'e̱ y'ayuuk mwinju̶wu̶u̶yu̶ch ajku̶xy y mnejwu̶u̶ygyu̶xu̶ch ni'igyu̶ oy.

¹⁸ Nmu̶bu̶jktzooybyu̶ch je̱'e̱ Dios ko je̱'e̱ mjoot mwinma'añ wan xyaj'anu̶u̶yu̶ ajku̶xy mu̶u̶d je̱'e̱ tyu̶y'ajt, wan mnejwu̶u̶ygyu̶xu̶ch je̱'e̱ mu̶dyiibu̶ mja'ay'e̱jxku̶xypyu̶ñ y tii gyu̶xpu̶ je̱'e̱ Dios tu̶ xywyin'ijxku̶xyu̶ñ, y janch mu̶j je̱' y janch oy je̱' je̱'e̱ pu̶da'agy je̱'e̱ mu̶dyiibu̶ je̱'e̱ Dios jya'ay myooybyu̶ñ,

¹⁹ y janch mu̶j je̱'e̱ myu̶k'ajt y ka'p nimu̶naa kyu̶xy tyu̶goy, je̱'e̱ mu̶dyiibu̶ tuumb ma je̱'e̱ njoot nwinma'añ ajtu̶m ajku̶xyu̶ñ, u̶u̶ch je̱' mu̶dyiibu̶ je̱'e̱ Cristo nmu̶bu̶jku̶mbyu̶ñ ajku̶xy. Y adaa mu̶k'ajt je̱' adaa je̱'e̱ mu̶dyiibu̶ je̱'e̱ Dios yajni'igu̶xu̶'ku̶ñ mu̶u̶d je̱'e̱ myu̶k myu̶jaa ku̶xyu̶ y myu̶k'ajtu̶ñ,

²⁰ ko je̱'e̱ Cristo yajjuugypyu̶jky y chi jiiby tzajpjooty a'oy'e̱e̱mby ane̱'e̱mbu̶ pu̶daaky ma je̱'e̱ Dios ñamu̶jku̶ñ,

²¹ y pu̶daaky ko je̱'e̱ mu̶k'ajt ku̶xyu̶ niwindzu̶n'ádu̶ch, je̱'e̱ ane̱'e̱mu̶ñ, je̱'e̱ mu̶daaku̶ñ y je̱'e̱ ku'umaayu̶ñ, y jakmu̶j ni'igyu̶ pu̶daaky ka'p du'un nipú̶nu̶ñu̶ba mu̶dyiibu̶ ya yajpaatp ma adayaaba naaxwiiñu̶ñ y ma je̱'e̱ mu̶dyiibu̶ miimb ku̶daakpu̶ñ.

²² Dios myooy je̱'e̱ Cristo je̱'e̱ ane̱'e̱mu̶ñ ku̶xyu̶ neby mu̶baad ku̶xyu̶ ane̱'e̱mda'ayu̶ñ, y tu̶ je̱'e̱ Cristo nandu'un ku̶'u̶m pu̶da'agy ma je̱'e̱ mu̶bu̶jkpu̶du̶jk ajku̶xyu̶ñ nigu'ubajk'ajtpu̶, wan je̱'e̱ mu̶bu̶jkpu̶du̶jk ku̶xyu̶ nigu'ubajk'ádu̶ch.

²³ Je̱'e̱ mu̶bu̶jkpu̶du̶jk du'un je̱' neby je̱'e̱ Cristo ñi'kxu̶ñ, ma je̱'e̱ Cristo myu̶k'ajt ku̶xyu̶ ka'pxy paattu̶ju̶ñ. Y je̱'e̱ Cristo je̱' je̱'e̱ mu̶k'ajt ku̶xyu̶ ka'pxy mu̶dajtp ma ku̶xyu̶ tijaty jii'ajtpu̶ñ.