Esther 1 - Ohiatonhseratokénti

Ionontí꞉io Vashti Iáh Tehonwawennaráhkwen Ne Ronontí꞉io Xerxes

^1-2 Tsi nón꞉we nihatientáhkhwa ne Ronontí꞉io Xerxes, eʼthó nón꞉we tkanatakweʼní꞉io ne Susa tsi nón꞉we ne Persia, énska tewenʼniáwe tánon tewáhsen tsá꞉ta kakorahseraké꞉ron tehasnonhsáhere, India tiotáhsawe tsi niió꞉re Ethiopia.

³ Ahsénhaton niiohserà꞉ke shihonontí꞉io waʼhakhwá꞉ren, akwé꞉kon wahshakohón꞉karon ne ronateríhonte. Ók ó꞉ni ne ronterí꞉ios ne Persia tánon Media eʼthó rón꞉neʼskwe, ók ó꞉ni ne ratikoráhshon tánon ne é꞉neken thonátteʼs tsi kakorahseraké꞉ron.

⁴ Iá꞉iaʼk niwenhnì꞉take tsi wahatená꞉iehste wahshakonaʼtón꞉hahse tsi niiokwáhtshe ne raonakeráhsera tánon tsi niiohskatsténion tsi nahò꞉ten ká꞉ien ne raonakerahserá꞉kon.

⁵ Tsi ó꞉nen ontóhetste, kí꞉ken ronontí꞉io ó꞉ia sahakhwá꞉ren ne nón꞉wa sahshakohón꞉karon nʼethó ratinákere tsi kaná꞉taien ne Susa, rotikwáhtshe ók ó꞉ni ne rotí꞉ten. Tsiahiáʼksera tsi wahontonʼwéshen eʼthó raoteʼèn꞉rakon ne ronontí꞉io.

⁶ Raoteʼèn꞉rakon kanatahserón꞉ni ne oròn꞉ia tánon karà꞉ken ioʼarenʼtónnion, kahwanerénkhon arihwawaʼkonhnéha ne kwáh kaniaʼtarí꞉io tánon kahwistarà꞉ken teiotweʼnonniánion eʼthó iotiienawá꞉kon karontó꞉ton kanenʼiarà꞉ken. Wanitskwahraʼtsheré꞉sonʼs ohwistanó꞉ron tánon kahwistarà꞉ken ionniá꞉ton eʼthó wahatiké꞉ron ateʼèn꞉rakon, tánon kwáh eʼthó kanenʼiarà꞉ken kéntsʼkaron, teiohstarátheʼs onekwènhtara kanenʼianó꞉rons, tsi naʼteiohterón꞉rote ne kaʼnistenhsherakweʼní꞉io ne onekórha tánon oròn꞉ia nikanenʼiò꞉tens.

⁷ Tsi tahonwén꞉non nahatihnekí꞉ra akwé꞉kon ohwistanó꞉ron ne teiontnekontáhkhwa, iáh tékeni ne shá꞉ka té꞉ken tánon ne ronontí꞉io iáh tehoní꞉on tsi ní꞉kon taháhtkaʼwe ne raohné꞉ka otsí꞉tsa.

⁸ Kwáh iáh tshiewató꞉ktha to ní꞉kon ahatihnekí꞉ra; ronontí꞉io wahshakónhnhaʼne ne ronwaióʼtenhse tsi aontahshakó꞉non akwé꞉kon nón꞉kwe tsi ní꞉kon tehonatonwentsó꞉ni.

⁹ Tsi nikarí꞉wes ronatonʼwéshen, kanónhskon tsi kén꞉teron Ionontí꞉io Vashti, aónha ionenhrón꞉ni tiokhwáhere ne konnón꞉kwe.

¹⁰ Tsatáhkhaton shiwenhniserà꞉ke tsi ronatekhwáhere ó꞉nen ronontí꞉io tsi rohnekí꞉ren tó꞉kenske tsi rotonhnháhere, iahshakó꞉nonke ne tsá꞉ta nihá꞉ti tehonwatineniatáhkwen né꞉ne kwáh ákta raónha ronwaioʼténhse, Mehuman, Biztha, Harbona, Bigtha, Abagtha, Zethar tánon ne Carkas.

¹¹ Wahshakónhnhaʼne akonwenhnónksa Ionontí꞉io Vashti, tánon aonnonhwaró꞉roke ne iotsistónion. Ne ionontí꞉io kwáh í꞉ken tsi ioiatáhskats, tánon ronontí꞉io tehotonhwentsó꞉ni ahatená꞉iehste kí꞉ken shakohonkará꞉wi tánon ne ratihsennowá꞉nenʼs.

¹² Tsi ó꞉nen ne ronwaióʼtenhse waʼkonwahró꞉ri Ionontí꞉io Vashti tsi wahshakónhnhaʼne ne ronontí꞉io naontá꞉we, iáh teiohthontá꞉ton nʼethó iaiawé꞉non. Kwáh í꞉ken tsi wahoná꞉khwen ne ronontí꞉io.

¹³ Tsi nihoianerenhserò꞉ten ne ronontí꞉io enhshakoriʼwanón꞉tonhse ne shakotiʼnikonhrá꞉wis tsi nikaianerenhserò꞉tenʼs, né ká꞉ti ó꞉nen iahshakó꞉nonke ronónha ne ronaterién꞉tare tsi nakaié꞉ren.

¹⁴ Ne ká꞉ti kí꞉ken iotká꞉te shakoniahé꞉sen nahonwaʼnikón꞉ron, Carshena, Shethar, Admatha, Tarshish, Meres, Marsena tánon Memucan—tsá꞉ta nihá꞉ti ne kwáh é꞉neken tsi ronateríhonte tsi kanontiiohtsherá꞉ien ne Persia ók ó꞉ni ne Media.

¹⁵ Wahshakohró꞉ri kí꞉ken ronón꞉kwe, “Í꞉ʼi Wakenontí꞉io Xerxes, iakheiaténniehte ne iontióʼtenhse akonwahró꞉ri Ionontí꞉io Vashti tsi waʼkerihwá꞉ren, iáh teiotewennaráhkwen! Nahò꞉ten wá꞉ton ne kaianerénhsera tsi naietewaié꞉raʼse?”

¹⁶ Sók ne Memucan iahotewennontiéhten ne ronontí꞉io tánon ronaterihón꞉ton: “Ionontí꞉io Vashti wesatéhaʼte iáh í꞉se khok té꞉ken akwé꞉kon ó꞉ni ne ronaterihón꞉ton tánon akwé꞉kon ne ronón꞉kwe tsi nikanakeráhsera!

¹⁷ Akwé꞉kon ne konnón꞉kwe tsi kanakerahserá꞉ien enhonwatikén꞉ron ne iotiniákhon, tsi niiohsnó꞉re enkontirihwá꞉ronke tsi naká꞉iere ne ionontí꞉io. Enkonní꞉ron: “Ronontí꞉io Xerxes wahá꞉naʼne ne Ionontí꞉io Vashti nʼethó naontá꞉we raohén꞉ton tánon iáh teiohthontá꞉ton.”

¹⁸ Nó꞉nen ne rotiniákhon ne ronaterihón꞉ton ne Persia tánon Media enkontirihwá꞉ronke tsi nóntiere ne ionontí꞉io, enhonwatihró꞉ri ne iotiniákhon ohén꞉ton tsi niió꞉re enwatenhniseró꞉kten. Akwé꞉kon ne konnón꞉kwe iáh thaʼonsahonwatikwénienhste ne iotiniákhon tánon ne ronón꞉kwe enhshakotiná꞉khwaʼse ne rotiniákhon.

¹⁹ Tóka, Sanontí꞉io, enserienʼtí꞉io ahshianerenhserón꞉ni ne Vashti tóhsa nowén꞉ton aonsaioké꞉tohte raohén꞉ton ne ronontí꞉io. Enkahiá꞉tonke kaianerenhserá꞉kon ne Persia tánon Media, ne tóhsa nowén꞉ton taonsakaténion. Thó꞉ne akó꞉ren aonaktà꞉ke taonsaié꞉taʼne iakón꞉kwe ne sénha tionkweʼtaié꞉ri.

²⁰ Nó꞉nen ne enhshianerenhserísa akwé꞉kon tsi ni kowá꞉nen ne sanontiióhtshera eniotitó꞉kenhse kí꞉ken akwé꞉kon ne konnón꞉kwe enhonwatikwénienhste ne iotiniákhon tóka rokwáhtshe tóka ó꞉ni ró꞉ten.”

²¹ Ronontí꞉io tánon ne ronaterihón꞉ton kwáh í꞉ken tsi wahatirihwanón꞉weʼne, eʼthó nahá꞉iere ronontí꞉io tsi nahò꞉ten Memucan wahoʼnikón꞉ron.

²² Tsi kakorahseraké꞉ron ne ronontí꞉io raonontiióhtshera iahaterihwániehte tsi nihatiwennó꞉ten tánon tsi ní꞉ioht tsi ratihiá꞉tons ne raotikorahserá꞉kon, aieʼnikonhraién꞉tate akwé꞉kon ne ronón꞉kwe ratiiaʼtakweʼní꞉io ne raotinónhskon tánon tsi nahò꞉ten enthontá꞉ti ne enkáhawe.