Yuda 1 - Kilagano kya hino 1937

¹ Yuda, mbanda wa Yesu Kristo, nu ndongo wa Yakobo, kwa wala wakukemeleka, wakuganika nu Mulungu Dadi, na wakugoheka kwa Yesu Kristo:

² Lipyana kwinu ni kindamba ni kiganano kifuluke.

³ Wakuganika, apa nikayili mu kuyumbatika kuwalembela pa uyokosi wula tihasangana nawo, nahotwili lepa kuleka kuwalembela kuwakila mukangamale kuyimalila kiyitakiso kila kikafumbuliki kamonga waka kwa wawalafu.

⁴ Pakuya wakayingili pakugwala wandu wanunuyu, wala wakalembiki mwandi kwa lipaulo ili, wandu wawifu, wang’anamuse neema ya Mulungu witu kwa wafu, ni wankana Wakulinganisa witu wakape nu Bambo witu, Yesu Kristo.

⁵ Leka nilonda kuwakumbukisa, haka kamonga mumanya fyoha, kukita Bambo, pala akayokwili nsafi kipitile pa ndima wa Egupto, panyuma pake akawayaningi wala wangakela.

⁶ Na wakamalaika wala wagohiti lepa utwa wawe, koma wakalekiti pandu pawe pene, awagohiti ni wa migoyi ya miaka pasi pa lwisi mpaka pa kupaula kwa ligono likulungu.

⁷ Ngati umu Sodom ni Gomorrah, na makaya gakusyungutila mumu, ndawa wakahasangini nawo pakukita kiyaka kikitile, ni wakawukiti kukisa nyama ya kigeni, wawikika kwa ndingo, kuhumbusika kwa kuyambulisa kwa mwoto wa miaka.

⁸ Leka wiwilawila awa kawili pa kulota kwawe wawipisa nyama, ni wahepa utwa, ni wafijowela fya kukwisika blasfemia.

⁹ Koma Mikael malaika nkulungu, pakujowana ni diabolo akapindakini pa ntufi wa Musa, akasindimili lepa kumtolela mhalo wa blasfemia, koma akajowiti, Bambo akulakalile ngani.

¹⁰ Koma awa wafijowela blasfemia fila wafimanya lepa: ni fila wafiwalalila pa utamo wawe, ngati filugu fyangali malango, pa fifilafila wayanangiki.

¹¹ Malilo kwa awa pakuya wakagenditi pa ndila ya Kain, ni wakakimbili pakusoweka kwake Balaam kwa kupata njombe, ni wakatagiki pa mapindikano ga Korah.

¹² Awa wawa mabala pa fyakulya finu fya kuganana pala wayilisa nu mwenga, wakudima wayidimila wene pangali kuyogopa; mafundi gangali machi, gakutoleka waka uku ni uku nu mbepo; mikongo yakupulutuka, yangali fipambiko, yakufwa kawili, yakutupulika;

¹³ mayiga ga nyanja gangagona, gakututuma waka lihuluhulu lya lihamu lyawe: ndondo syakusowa, kwa sila kupilala kwawe lwisi bii kugohiki kwa miaka.

¹⁴ Nu Enok, wa saba kihumile pa Adam, akawalwetili awa kawili, kujowa, Mulolaye, Bambo akachiti na wawalafu wake maelfu,

¹⁵ kuwapaula woha, ni kuwapela mhalo woha awa mawifu pa makitiko gawe mawifu, gala wakagakiti pa uwifu.

¹⁶ Awa wawa wakunung’unika, wakuniongoneka waka, wakugendagenda kukisa manyonyelo gawe (ni pa ndomo walongela gakufuluka), kuwahikalila wandu kwa ndawa ya mbendo.

¹⁷ Koma mwenga, wakuganika, mukumbukile malowe gakajowiki palongolo na maapostolo wa Bambo witu Yesu Kristo;

¹⁸ kukita wakawajowili mwenga, Pa lukumbi lwa kumalakisa yawaye wa mameno, wakugendagenda kukisa manyonyelo gawe mawifu.

¹⁹ Awa wawa wakita mapatukano, wa pa nyama, nukuya nu Roho.

²⁰ Koma mwenga, wakuganika, wakwijengela panani pa kiyitakiso kinu kiwalafu nyamhope, wakusali pa Roho Mbalafu,

²¹ mwigohe mwawene pa kiganano kya Mulungu, kulolalela lipyana lya Bambo witu Yesu Kristo kwa kulama kwa miaka.

²² Ni muwapwelekele lipyana wangi, awa wakangachila;

²³ na wangi muwayokole kuwanyaka kipitile pa mwoto; na wangi muwapwelekele lipyana pakuyogopa; kuwipila haka mwingila ulekaliki mabala ga nyama.

²⁴ Leka kwa yombe uyu ahotola kuwalindalila nausi musikuwasika, ni kuwatamisa mwenga pa miho ga kukwisika kwake pangali filema pa kuyangala kukulungu,

²⁵ kwa Mulungu wakape Njokosi witu, pa Yesu Kristo Bambo witu, kuye kukwisika, ukulungu, makakala, ni chengo, kitumbulile pa miaka, ni mpaka hino, ni kwa miaka yoha. Amen.