Tito 1 - Kilagano kya hino 1937

¹ Paolo, mbanda wa Mulungu, ni apostolo wa Yesu Kristo, kwa ndingo wa kiyitakiso kya wakuhagulika wake Mulungu, ni kufimanyisa fya chakaka fiyii kwa ndingo wa kungwilakimbo Mulungu,

² pa kihuwalilo kya kulama kwa miaka, kula akakulagiti Mulungu, uyu ahotola lepa kudeta, palongolo pa ngumbi sya miaka ni miaka;

³ leka pa ngumbi sya yombe mwene akalilasiti lilowe lyake pa tangazo, iyi nikakamulasiki nayo kwa ndingo wa luwimbi lwa Mulungu Njokosi witu;

⁴ kwa Tito, mwanangu wa chakaka kwa ndingo wa kiyitakiso wakuhasangana mumu: Neema ni kindamba kuhuma pa Mulungu Dadi nu Kristo Yesu Njokosi witu.

⁵ Kwa ndawa iyi nikakulekiti pa Krete, nausi ugolose fila fikalemwiki, ni uwike wakulu‐wakulu pa likaya liyi lyoha, umu nenga nikakutaukili;

⁶ mundu wona ayi wangapisika mhalo, ngwanamundu wa ndala yumonga, wakutama na wana wakukela, awa wangapisika mihalo ya kutumbulana pangi ya likomo.

⁷ Pakuya askofu alinganila kuya wangapisika mbifu, kihwanakiso kya wakugoha fyuma fya Mulungu; nakuya wa kinywinda, nakuya wa kufyoma, nakuhwela pa ugimbi, nakutowana, nakugana mbendo ya lihamu;

⁸ koma wakuwakemelesa wageni, wakufigana finofu, wakwihotola pa maholo, wa malinga, mbalafu, wakwigoha;

⁹ kikamulile lilowe lya kiyitakiso ili liyii kwa ndingo wa mayigaliso, nausi aye wakuhotola kukila pa mayigaliso ga kusangalukisa, ni kuwapisa wa waka wa mapindikano.

¹⁰ Pakuya wayili wandu wa mahele wangali kwigoha wicho, wakujowa malowe ga waka waka ni wakusowesa, muni muni awa wa pa kusilimuka,

¹¹ milomo ya awa ilinganila kulekeka; wandu awa wabomola nyumba sya mfilimila, pa kuyigalisa fila fiwalinganila lepa, kwa ndawa ya mbendo ya lihamu.

¹² Akajowiti yumonga wa wombe, wakulweta wa wene, Wa Krete magono goha wa mageya, filugu fiwifu, maleme ga ukata.

¹³ Ulungamakiso uwu uyii wa chakaka. Kwa ndawa iyi uwapise mhalo udumuli, nausi wasangaluke pa kiyitakiso,

¹⁴ wasiyufwana sumu sya waka sya waYehudi, ni mimbi sya wandu awa wapatukeye pa fya chakaka.

¹⁵ Fyoha fiyii fiwalafu kwa wala wawalafu: koma kwa wala wawifu na wangali kukela pa waka kandu kawalafu; koma maholo gawe na chengo kyawe kya pa mwoyo kawili gayanangiki.

¹⁶ Wafumbula kukita wammanya Mulungu; leka pa makitiko gawe wankanila, pakuya wawifu, na wangayufwana, ni wangalingika pa lihengo liyi lyoha linofu.