Roma 1 - Kilagano kya hino 1937

¹ Paolo, mbanda wa Yesu Kristo, wakukemeleka apostolo,

² wakupatuliwa kwa evangel ya Mulungu, yila akalagini palongolo pa wakulweta wake, pa malembo mawalafu,

³ ya Mwana mundu, uyu akahogoliki wa mbeyu ya Daudi kwa ndingo wa nyama,

⁴ nayombe akapatuliwi Mwana wa Mulungu ni mbafu, kwa ndingo wa roho ya uwalafu, pa kusyuka kwa wakufwa;

⁵ yuyu Yesu Kristo Bambo witu, pa yula tikayupiti neema nu uapostolo, kwa kuyufwanila kiyitakiso pa mihuku yoha, ndawa ya lihina lyake:

⁶ pa wala mwenga namu muyii wakukemeleka wake Yesu Kristo:

⁷ kwa woha wala wayii pa Roma, wakuganika nu Mulungu, wakukemeleka wawalafu: Neema kwinu ni kindamba kuhuma pa Mulungu Dadi witu nu Bambo Yesu Kristo.

⁸ Pakutumbula ninsengusa Mulungu wangu pa Yesu Kristo ndawa ya mwenga mwawoha, kukita kiyitakiso kinu kiwandasiki poha poha pa ndima woha.

⁹ Pakuya Mulungu ayii ndungumakiso wangu, yula nimhengela pa roho wangu pa evangel ya Mwana mundu, umu nenga nukukotoka lepa kuluwula mwenga, magono goha pa maluwo gangu kiluwile,

¹⁰ pangi hino kwali yanipatile mwanja unofu kuhicha kwinu pa kilondo kyake Mulungu.

¹¹ Pakuya nigana muni kuwawona mwenga, nausi niwapele kiyetulo kya neema kya kiroho, nausi mutamasike;

¹² kila kukita nenga pamonga na mwenga ninyamasike pa mwenga, ayi yoha pa kiyitakiso kya njini, kya mwenga ni kya nenga.

¹³ Leka nilonda lepa muye wangali kumanya, walongo, kukita kawili kawili nikapangiti luhala kuhicha kwinu (ni nikasiliwasiki mpaka hino), nausi niye ni kipambiko kingi pa mwenga kawili, ngati pa Mihuku wangi kawili.

¹⁴ Niyii ni nsigilo kwa waGriki ni kwa Wakuweweta kawili, kwa wene malango ni kwa wangali malango kawili.

¹⁵ Mumu, umu nihotolela, niyii tayari kuwandisa evangel kwa mwenga kawili muyii pa Roma.

¹⁶ Pakuya niwona lihamu lepa pa evangel: ndawa yiyii makakala ga Mulungu kwa kuyokola ayi yoha yuakela kikelile; kwa mYehudi pakutumbula, ni kwa mGriki kawili.

¹⁷ Ndawa ya yila ugolofu wake Mulungu ufunukulika pa kiyitakiso mpaka kiyitakiso: umu yilembikili, Leka wagolofu yawalame pa kiyitakiso.

¹⁸ Ndawa kudada kwake Mulungu kufunukulika kuhumila kunani pa unya mitafu yoha ni uwifu wa wandu, wala wasiwilisika fya chakaka pa uwifu;

¹⁹ ndawa kila kimanyike pa Mulungu kilasika pa wombe; pakuya Mulungu akakilasiti kwawe.

²⁰ Pakuya fila fyangawoneka fya yombe kitumbulile kuupanga ndima fiwonakili ngani, kuholakaseka pa fila fyapangiki, sisi mbafu syake sya miaka yoha ni umlungu wake; kukita waye wangali ni kigwalilo:

²¹ ndawa wombe, kummanya Mulungu, wankwisiti lepa ngati Mulungu, wansengwisi lepa; koma wakitiki mfuki wa waka pa maholo gawe, ni mwoyo wawe wangali malango ukalekaliki lwisi.

²² Pa kwiwalanga wene malango,

²³ wakitiki wahimu, ni wang’anamwili kukwisika kwake Mulungu wangawola kuya kihwanakiso kya kifwilifwili kya mundu wakuwola, ni kya fidege, ni kya nyama sya magulu ncheche, ni kya fyakukwawa.

²⁴ Mumu Mulungu akawafumbukisi pa manyonyelo ga pa mioyo yawe pa uwafu, kukita miwili yawe yiwe yangaginikika na wayawe:

²⁵ nawombe wafing’anamusa fya chakaka fya Mulungu kwa mageya, ni wakagwilikimbo ni kutumakila kapangiko kulutila Wakukapanga, uyu ayii wakupelewa kihomo miaka ni miaka. Amen.

²⁶ Kwa ndawa iyi Mulungu akawafumbukisi pa manyonyelo mawifu: pakuya wadala wawe wakang’anamwisi kutumila kwa matamilo gawe kwa kupindika mawikiko:

²⁷ na kawili wiwi, wagosi, kuleka kutumila kwa matamilo ga ndala, wakosanilaga pa manyonyelo yungi kwa njini, ngosi pa ngosi kukitila uwafu, ni kuyupa mugati mwawe njombe ya mahoko gawe yila yikawalinganili.

²⁸ Ni umu wakabeliti kuya nako Mulungu pa kumanya, Mulungu akawafumbukisi pa mwoyo uwifu, kukita fila fyanganogela;

²⁹ wakumema ni uwifu woha, usokosi, lunyonyelo, kuwipa, wakumema nu kuwina mwoyo, kusyangala, kutumbulana, kukonga, kwiwipisa mikuwu; wakupwepwelela,

³⁰ wa luhehu, wakuwipalika nu Mulungu, wa mihenje, wa kinywinda, wa kwihikalila, wakupanga malango mawifu,

³¹ wangali kuwayufwana wakuhogola wawe, nukuya na malango, wakukidumula kilago, wangali kuholalela, wangali lukolo:

³² wala nawombe wakumanyila ngani lipaulo lyake Mulungu, kukita wala wakitaga fya ntundu uwu walinganila kufwa, wafikita lepa ifi waka, koma wayitisingana kawili na wala wafikitaga.