Marko 1 - Kilagano kya hino 1937

¹ Ndumbulo ya evangel ya Yesu Kristo, Mwana wa Mulungu.

² Umu yilembekili pa wakulweta Isaya, Lola, nituma ntenga wangu palongolo pa kyene kyako, Yuyu yatendakese ndila yako;

³ Njowelo ya wakukuwa mu mapululu, Muwikile ngani ndila ya Bambo, Mugolosaye barabara yake;

⁴ Yohana akachiti, uyu akabatisi mu mapululu ni akawandisi ubatiso wa kupela kwa kulekelekesa sambi.

⁵ Ni wakapititi kwa yombe ndima woha wa Yudaya, na woha wa pa Yerusalem; ni wakabatisiki nuyombe mu nkuka Yordan, kufumbula sambi syawe.

⁶ Nu Yohana akafwatakiki nu lwagi lwa ngamila, nu lukoto lwa kikumba mu kiwuno mwake, na kyakulya kyake mapalasi ni uchi wa ku dasi.

⁷ Ni akawandisi, kujowa, Ahicha mwene mbafu kulutila nenga kunyuma kwangu, nukulinganila lepa nenga kuyinama ni kuwopola lugoyi lwa sapato syake.

⁸ Nenga niwabatisi mwenga pa machi: koma yombe yawabatise pa Roho Mbalafu.

⁹ Ni ikayili kukita pa magono gagalagala, Yesu akachiti kuhumila pa Nazareti wa Galilaya, na akabatasiki nu Yohana pa Yordan.

¹⁰ Na hino apa pa kufuwuka pa machi, akaweni mafundi gakachwiki, ni Roho ngati njiwa kiselalile pa yombe:

¹¹ ni njowelo kuhumila kunani, Wenga Mwanangu wakuganika, pa wenga niganasiki nyahope.

¹² Na hino apa Roho antaga kunja kuyingila pa mapululu.

¹³ Ni akayili mu mapululu magono makumi ncheche kugeseka ni Shetani; ni akayili pamonga ni filugu; na wamalaika wakantumakili yombe.

¹⁴ Na panyuma pa kufumbulika Yohana, Yesu akachiti mu Galilaya, kuwandisa evangel ya Mulungu,

¹⁵ ni kujowa, Lumemasiki lukumbi, ni utwa wa Mulungu uwandamila: mupelaye, ni mukelaye pa evangel.

¹⁶ Ni pa kuluta mu masekwa ga nyanja ya Galilaya, akambweni Simon ni Andrea nung’una wa Simon kulekela luwafu pa nyanja: pakuya wakayili wa kulowa somba.

¹⁷ Nu Yesu akawajowili, Muyichaye munyuma mwa nenga, ni yaniwakite wakulowa wandu.

¹⁸ Na hino apa wakalekiti njafu ni wakankisiti.

¹⁹ Ni apa akagenditi palongolo pachokope, akambweni Yakobo mwana wa Zebedayo, nu Yohana nung’una mundu, wombe kawili wakayili mu liboti kutendakesa njafu syawe.

²⁰ Na hino apa akawakemili: na apa wakandekiti dadi wawe Zebedayo mu liboti pamonga na wa lihengo, wakabiti munyuma mwake.

²¹ Ni wayingila mu Kapernaum; na hino apa pa sabato akayingili mu sunagoge ni akayigalisi.

²² Ni wakakangichi nyahope pa mayigaliso gake; pakuya akayigalisi ngati mwene chengo, nukuya ngati wakulembela.

²³ Na hino apa akayili mu sunagoge yawe mundu wa roho ya wafu; na akakuwiti kujowa,

²⁴ Kiki kwa tenga nu wenga, Yesu wa Nazareti? uchiti kutiyananga ati? Nikumanya wenga uyii wa nani, Mbalafu yula wa Mulungu.

²⁵ Nu Yesu akandakalili, kujowa, Utame kinunu, ni upite pa yombe.

²⁶ Na roho ya wafu kunkachula yombe ni kukuwa ni njowelo yikulungu, yikapititi pa yombe.

²⁷ Na wakaganaganiti woha, mpaka wakakotini yungi ni njini kujowa, Kiki iki? mayigaliso ga hino! kwa ndingo wa mwene chengo ataukila roho haka sya wafu, ni sinjufwanila.

²⁸ Ni ndumi ya yombe yikapititi hino apa poha poha pa ndima woha wa kusyungutila wa Galilaya.

²⁹ Na hino apa, pala wakapititi pa sunagoge, wakayingili mu nyumba ya Simon nu Andrea, pamonga ni Yakobo ni Yohana.

³⁰ Leka mkohano mundu Simon akayili mu kulwala kupyupa; na hino apa wantawalile fya yombe:

³¹ na pakachiti akankamwili kiwoko, na akanjimwisi; ni kupyupa kukandekiti, na akawatumakili wombe.

³² Leka pa kimihi, pala lijuwa likatipimi, wakantoliti watamu woha ni wa kukamulika ni madaimon.

³³ Ni likaya lya mfilimila likakokini pamonga pa ndyango.

³⁴ Ni akalwasiti wingi wakulwala ni fitamu fya misafi‐misafi, ni akatagiti kunja madaimon mingi; na akayitakili lepa madaimon kulongela, ndawa gakammanyiti.

³⁵ Nu lukela, pa kilo‐kilo, akayimwiki, nakapititi, nakabiti ku mapululu, nakasaliti kukula.

³⁶ Na Simon na wala pamonga nako wakankisiti;

³⁷ na wakankolili yombe, ni kunjowela, Woha wakulondalonda wenga.

³⁸ Leka awajowela, Tiwuke kungi kungi pa makaya ga papipi, nausi kukulakula kawili niwandise; pakuya kiyingalile pa iki nikapititi.

³⁹ Na akayingili mu masunagoge gawe pa Galilaya poha, kuwandisa ni kutaga kunja madaimon.

⁴⁰ Ni anchilila wa matana, kumpembesa, ni kunfugamila, ni kunjowela, Wona ulonda, uhotola kuniguyula.

⁴¹ Na pakatoliki ni lipyana, akatambalisi kiwoko kyake, nakankwafiti, nanjowela, Nilonda; uguyulike.

⁴² Na hino apa matana gakandekiti, ni akaguyuliki.

⁴³ Na akandakalili nyahope,

⁴⁴ na hino apa akantagiti kunja, na anjowela yombe, Lola usijowa kindu kwa mundu: koma ubitaye, wilase wa mwene kwa kasisi, ni ulekele kwa kuguyulika kwako fila akataukili Musa, kwa ulungamakiso kwawe.

⁴⁵ Leka akapititi, na akatumbwili kuyenesa muni, ni kuwandisa ndumi yake, mpaka Yesu akahotwili lepa kuyingila kawili pa likaya pa lulanga, koma akayili kunja pandu pa lipululu: ni wakanchilili kuhumila poha poha.