Luka 1 - Kilagano kya hino 1937

¹ Pakuya wa mahele wakikamwisi kulemba ndumi sya fila fimalasiki pa tenga,

² umu wakafipelakili kwa tenga, wala wakayili walungamakiso na wakutumakila wa lilowe, kukaniwonakili wicho nenga kawili,

³ wakukisa ndila sya findu fyoha pangali kuhoka kitumbulile pakutumbula, kukulembela umu fikisili, bambo nnofu Teofilo;

⁴ nausi upate kumanya fya chakaka fya malowe gala ukayigilasiwi.

⁵ Pa magono ga Herode, mutwa wa Yudaya, akayili kasisi lihina lyake Zakaria, wa lipuga lya Abia: nu mhanu mundu wa wana wadala wa Harun, ni lihina lyake Elisabeti.

⁶ Leka woha awa wawili wakayili wagolofu pa miho ga Mulungu, wakugenda pa mimbi syoha ni mapawuliko ga Bambo wangahoka.

⁷ Na wakayili lepa nu mwana, ndawa Elisabeti akayili ngida, na woha wawili wakayili wagogolo pa magono gawe.

⁸ Leka yikayili kukita, pa magono ga kuwikika nyambiko pa miho ga Mulungu pa lukumbi lwa kuyupilana,

⁹ kwa nkuwu wa mahengo ga kasisi, kukandondalili kuyingila pandu papakape pa Bambo kukwelesa lubani.

¹⁰ Ni lipuga lyoha lya nsafi likayili mu kuluwa kunja pa lukumbi lwa lubani.

¹¹ Leka akambonakili malaika wa Bambo wakuyima pa kiwoko kya ndilo kya mathbahu ga lubani.

¹² Nu Zakaria akalipwiki mwoyo pala akambweni, nu woga ukangwilili.

¹³ Leka malaika akanjowili, Ukotoke kuyogopa, Zakaria; pakuya liluwo lyako liyufwaniki, ni mhanuwo Elisabeti yakuhogolele mwana, nawe yaunkemele lihina lyake Yohana.

¹⁴ Na yakiye kwako kiheko nu kuyangala; na wingi yawahekelele pa kuhogoleka kwake.

¹⁵ Ndawa yaaye nkulungu pa miho ga Bambo, na yanywe lepa mvinyo, haka mvinyo wa kuwawa; na yamene nu Roho Mbalafu, ena kihumile mu luleme lwa nyina.

¹⁶ Na wingi wa wana wa Israel yawakilawuse kwa Bambo Mulungu wawe.

¹⁷ Na yalongolele pa miho gake pa roho ni mbafu sya Eliya, kwikilawusa mioyo ya wakadadi kwa wana, na wala wangayufwa pa malango ga wakukita malinga; kuwikila ngani kwa Bambo nsafi wa kutendekeseka ngani.

¹⁸ Na Zakaria akajowiti kwa malaika, Kwa ndingo wuli yanimanye iki? pakuya nenga ngogolo, nu mhanu wangu nya malango pa magono gake.

¹⁹ Na akahigiti malaika, nakajowiti kwa yombe, Nenga na Gabriel, wakuyima pa miho ga Mulungu; na nikatumiki kulongela na wenga, na kukutolela ndumi sinofu isi.

²⁰ Na lola, yauye kinunu, nukuhotola lepa kulongela, mpaka ligono lila findu ifi yafipate kuya, ndawa ukela lepa malowe gangu, gala yagamalasike pa lukumbi lwake.

²¹ Nu nsafi ukayili mu kundolalela Zakaria, ni wakayili ni kuganagana pa kusyela yombe pa hekalu.

²² Leka pala akapititi, akahotwili lepa kulongela nawo: ni wakawalalili kukita aweni lingumbisi pa hekalu: nuyombe akayili mu kuwakinyila, na akayili kisiwasi.

²³ Ni yikayili kukita, baha gakamaliki magono ga kutumakila kwake, akabiti kwake.

²⁴ Leka panyuma pa magono aga Elisabeti mhanu mundu akayili nu luleme;

²⁵ ni akifihiti miesi mhano, kujowa, Wiwila anikitili Bambo pa magono gala akanilolalili, kuwusa kudogeka kwangu pa wandu.

²⁶ Leka pa mwesi wa ntanda malaika Gabriel akatumiki kuhuma pa Mulungu ku likaya lya Galilaya, lihina lyake Nazareti,

²⁷ kwa bikira wa kuhongeka ni ngosi lihina lyake Yosefu, wa nyumba ya Daudi; lihina lya bikira yula Mariamu.

²⁸ Na akayingili kwake, nakajowiti, Salaam, wakumema nu neema, Bambo ayii pamonga nawe.

²⁹ Leka yombe akalipwiki mwoyo pa lilowe lila, na akaholiti kulamusa uku kuyii wuli.

³⁰ Na malaika akajowiti kwa yombe, Ukotokuyogopa, Mariamu: pakuya ukikolili neema kwa Mulungu.

³¹ Na lola, yauyime luleme, ni yauhogole mwana, na yaukemele lihina lyake YESU.

³² Yombe yaaye nkulungu, na yakemaleke Mwana wa Yula wa kunani nyamhope: nu Bambo Mulungu yampele kitihu kya dadi mundu Daudi:

³³ na yaaye mutwa panani pa nyumba ya Yakobo kwa miaka ni miaka; ni kumalika kwa utwa wake yakuye lepa.

³⁴ Leka Mariamu akajowiti kwa malaika, Iki yakiye wuli, ndawa ngosi nakumanya lepa?

³⁵ Na pakahigiti malaika akajowiti kwa yombe, Roho Mbalafu yakuhichile, ni mbafu ya Yula wa kunani nyamhope yakulekele kifwili: ndawa ya iki kawili kila yakihogoleke yakikemaleke kiwalafu, Mwana wa Mulungu.

³⁶ Na lola, Elisabeti ndongowo, yombe kawili ayimi luleme lwa mwana ngosi pa ugogolo wake: nu mwesi uwu wa ntanda kwa yula akemaleka ngida.

³⁷ Ndawa nukuya lilowe lya kuhumila pa Mulungu yalitame lyangali mbafu.

³⁸ Nu Mariamu akajowiti, Lola, mbanda wa Bambo; kunitamile kwa ndingo wa lilowe lyako. Na malaika akawukiti kundeka.

³⁹ Leka Mariamu akawukiti pa magono gala, nakagenditi ku ndima wa fidunda ni ukiki, ku likaya lya Yudaya;

⁴⁰ na akayingili mu nyumba ya Zakaria na akandamwisi Elisabeti.

⁴¹ Ni yikayili kukita baha na baha, pakayufwini Elisabeti kulamusa kwa Mariamu, kanyehe kakajumbiti mu luleme lwake;

⁴² nu Elisabeti akamemasiki nu Roho Mbalafu; na akakuwiti ni lilowe likulungu, nakajowiti, Nya kihomo wenga pa wadala, ni nya kihomo kipambiko kya luleme lwako.

⁴³ Na kuhumila kuliku niyii nakyo iki, kukita nyina wa Bambo wangu anihichile nenga?

⁴⁴ Pakuya lola, baha lilowe lya kulamusa kwako likayingili mu makutu gangu, kanyehe kakajumbiti mu luleme lwangu pa kiheko.

⁴⁵ Na wakusengwa yula akakeliti; pakuya yakuye kumalakisa findu ifi filongaliki kwa yombe nu Bambo.

⁴⁶ Nu Mariamu akajowiti, Wumi wangu umkwisisya Bambo,

⁴⁷ Roho wangu uhekalili pa Mulungu, Njokosi wangu.

⁴⁸ Pakuya auloliti uchoko wa mbanda wake: Pakuya lola, kitumbulile lilino fihogosi fyoha yafinikemele mwene kihomo.

⁴⁹ Ndawa mwene mbafu anikitili makulungu; Ni lihina lyake liyii pa lyakape.

⁵⁰ Ni lipyana lyake liyii mpaka fihogosi ni fihogosi Kwa wala wakunjogopa.

⁵¹ Akiti mbafu kwa kiwoko kyake; Awayambanisi wa kinywinda pa maholo ga mioyo yawe.

⁵² Awusiti wene mbafu pa fitihu fyawe, Awanyanyamwili wala wayii pasi.

⁵³ Awatupilisi ni finofu wakuwona njala; Awapili wakafi mwanja mawoko ga waka.

⁵⁴ Antangatili Israel mpalo wake, Kukumbukila lipyana

⁵⁵ (Umu atawili ni wakadadi witu) Kwa Ibrahim nu mbeyu yake kwa miaka.

⁵⁶ Leka Mariamu akahweliti pamonga nuyombe ngati miesi yidatu, ni akakilawiki ku nyumba yake.

⁵⁷ Leka lukamalasiki lukumbi lwake Elisabeti lwa kusinda; na akahogwili mwana ngosi.

⁵⁸ Na wakayufwini wenesi wake na walongo mundu kukita Bambo akwisisye lipyana lyake pa yombe; ni wahekalili pamonga nako.

⁵⁹ Ni yikayili kukita pa ligono lya nane, wakachiti kukasilamusa kamwana kala; na wayili mu kukakemela Zakariya, kwa lihina lya dadi mundu.

⁶⁰ Nu nyina pakahigiti akajowiti, Lepa: koma yakemaleke Yohana.

⁶¹ Na wakajowiti kwa yombe, Payilepe yumonga wa walongowo wakukemaleka lihina ili.

⁶² Leka wakakinyili kwa dadi mundu, kukita ngaalonditi akemeleke lihina wuli.

⁶³ Ni pakaluwiti kapondo ka kulembela, akalembiti, Yohana liyii lihina lyake. Ni wakakangichi woha.

⁶⁴ Leka ndomo wake ukadinduliki hino apa, nu lulimi lwake lukawopwiki, na akalongili, kundumba Mulungu.

⁶⁵ Nu woga ukawagwilili woha wala wayili wenesi: ni pa ndima woha wa fidunda fya Yudaya fikalongaliki poha poha findu ifi fyoha.

⁶⁶ Na woha awa wayufwini wakafiwiki pa mioyo yawe, kujowa, Kiki kamwana aka yakiye? Ndawa kiwoko kya Bambo kikayili pamonga nuyombe.

⁶⁷ Nu Zakaria dadi mundu akamemasiki nu Roho Mbalafu, na akalwetiti, kujowa,

⁶⁸ Ahikaliki Bambo, Mulungu wa Israel; Ndawa alolalili nsafi wake ni kuwakombola.

⁶⁹ Na atutawisi linyelo lya uyokosi kwa tenga Pa nyumba ya Daudi nsafi wake

⁷⁰ (Umu akajowili pa ndomo pa wakulweta wake wawalafu wala wayili baho kitumbulile kuupanga ndima),

⁷¹ Uyokosi pa wa mitumba witu, na pa mawoko ga woha wakutiwipila;

⁷² Kumalisa lipyana kwa wakadadi witu, Kukumbukila malangano gake mawalafu;

⁷³ Kila andapalakisi dadi witu Ibrahim.

⁷⁴ Kutipela tenga kukita wona tiyokwiki pa mawoko ga wa mitumba witu, Tintumakile pangali woga,

⁷⁵ Pa uwalafu ni ugolofu pa miho gake magono goha ga kulama kwitu.

⁷⁶ Na wenga mwana, yaukemeleke wakulweta wa Yula wa kunani nyamhope: Ndawa yaulongolele pa miho ga Bambo kuwikila ngani ndila syake;

⁷⁷ Kumanyisa nsafi wake uyokosi Pa kuwalekelekesa sambi syawe,

⁷⁸ Ndawa ya mwoyo wa lipyana wa Mulungu witu, Mumu kiwumbu kuhumila kunani yakitilolalele tenga,

⁷⁹ Kuwamulikila wala wakutama pa lwisi ni pa kifwili kya kifwa; Kulongosa njayo situ pa ndila ya kindamba.

⁸⁰ Leka kamwana kakakuliti, ni kakakangamasiki pa roho, na akayili mu mapululu mpaka ligono lya kulasika kwake kwa Israel.