Filemon 1 - Kilagano kya hino 1937

¹ Paolo, wa pa migoyi wake Kristo Yesu, nu Timoteo ndongo witu, kwa Filemon wakuganika witu ni wakuhenga lihengo pamonga nu tenga,

² nu kwa Apphia ndumbu witu, ni kwa Arkippo wakukita pa ngondo pamonga nu tenga, ni kwa kanisa ili liyii pa nyumba yako:

³ Neema kwinu ni kindamba kuhuma pa Mulungu Dadi witu nu Bambo Yesu Kristo.

⁴ Ninsengusa Mulungu wangu magono goha, kikitile kikumbukumbu kya wenga pa maluwo gangu,

⁵ kuyufwanila kiganano kyako, ni kiyitakiso kila uyii nakyo kwa Bambo Yesu, ni kwa wawalafu woha;

⁶ nausi kuhasangana kwa kiyitakiso kyako kuye kwene mahengo, pa kumanya kindu kiyi kyoha kinofu mgati mwinu, kwa Kristo.

⁷ Pakuya nikapatiti kiheko kikulungu ni kunyamasa pa kiganano kyako, ndawa mioyo ya wawalafu yikapumusili pa wenga, ndongo.

⁸ Mumu, haka niyogopa lepa mwa Kristo kutaukila wenga iki kiyii kyakunogela,

⁹ leka kwa ndawa ya kiganano mbanga nipembesa, pakuya nunuyu Paolo ngogolo, na hino kawili wa pa migoyi wake Kristo Yesu:

¹⁰ nikupembesa ndawa ya mwanangu,

¹¹ uyu nimhogwili pa mgoyi yangu, Onesimo, uyu mwandi akayili lepa kwako wa mbendo, koma hino wa mbendo kwa wenga na kwa nenga:

¹² uyu mwene ninkilawusili kwako, wuwu mwoyo wangu namwene:

¹³ uyu nikalonditi kungoha pamonga nu nenga, nausi pa mhalo wa wenga anitumakile pa migoyi ya evangel:

¹⁴ koma pangali maholo gako nikalonditi lepa kukita kindu; nausi unofu wako usiya kwa mbafu, koma kwa ndingo wa kuhagula wa mwene.

¹⁵ Pakuya pangi ndawa ya iki kwali akapatukiki kwa lukumbi, nausi unjupile ngani kwa miaka;

¹⁶ nakuya hino ngati mbanda, leka kulutila mbanda, ndongo wakuganika, muni muni kwa nenga, ni kwa wenga kulutila, pa nyama ni pa Bambo kwili.

¹⁷ Mumu wona uniwalange wakuhasangana na wenga, unjupe ngati nenga.

¹⁸ Koma wona akakuhokili pa kindu, pangi ayii ni nsigilo kwako, ukiwalange kwangu;

¹⁹ nenga Paolo, nilemba ni kiwoko kyangu namwene, yanilipe kawili: nausi nisikujowela kukita uyii ni nsigilo kwa nenga haka wa mwene kawili.

²⁰ Ena, ndongo, nikusangalukile mwa Bambo: upumuse mwoyo wangu mwa Kristo.

²¹ Pa kuhuwalila pa kuyufwanila kwako nikulembela, kumanya kukita yaukite haka kulutila kila nikijowa.

²² Koma ndemuko uniwikile ngani pakuhadisa baho: pakuya nihuwalila kukita kwa sala sinu yanipelewe kwinu.

²³ Epaphra, wa mu migoyi njangu mwa Kristo Yesu, akulamusa;

²⁴ nu Marko, Aristarko, Demas, Luka, wakukita lihengo pamonga nu nenga.

²⁵ Neema ya Bambo witu Yesu Kristo yiye pamonga nu roho winu. Amen.