Efeso 1 - Kilagano kya hino 1937

¹ Paolo, apostolo wa Yesu Kristo pa kilondo kyake Mulungu, kwa wawalafu wa pa Efeso, na wakukeleka mwa Kristo Yesu:

² Neema kwinu ni kindamba kuhuma pa Mulungu Dadi witu nu Bambo Yesu Kristo.

³ Wakupelewa kihomo Mulungu nu Dadi wa Bambo witu Yesu Kristo, uyu atipili kihomo kiyi kyoha mwa roho pandu pa kunani mwa Kristo:

⁴ ngati umu akatihagwili mwa yombe palongolo pa kuwikika ndima, tiye wawalafu ni wa nyelelele palongolo pake pa kugana:

⁵ akatipatulini palongolo kwa utamo wa wana mwa Yesu Kristo kwa yombe mwene,

⁶ kwa ndingo wa kulinganisa kilondo kyake, kwa malumbo ga kukwisika kwa neema yake, yila akatipungulili mwa Wakuganika yula:

⁷ pa uyu titama ni kukombola pa mwasi wake, kulekeleseka kwa mahoko gitu, kwa ndingo wa ukafi wa neema yake,

⁸ yila akayiyolokisi pa tenga pa luhala lwoha ni malango,

⁹ apa akatimanyisi kya kuhyetu kya kilondo kyake, kwa ndingo wa kwiganisa kunofu akakuwikiti mwa yombe,

¹⁰ kwa matendekeseko ga kifwilanilo kya ngumbi, kukokanisa pamonga fyoha mwa Kristo, ifi fya kunani, ni ifi fya pa ndima:

¹¹ pa yombe, mwa uyu tipatili lipwela kawili, apa tikapatuliki palongolo kwa ndingo wa kilondo kya uyu ahenga fyoha kwa ndingo wa malango ga kilondo kyake;

¹² nausi tiye kwa malumbo ga kukwisika kwake, tenga tihuwalili palongolo mwa Kristo: mwa uyu mwenga namu,

¹³ apa mukaliyufwini lilowe lya chakaka, evangel ya uyokosi winu, — mwa uyu, apa mukakeliti,

¹⁴ mukakomaliki nu Roho Mbalafu wa kilago, uyu ayii kiloseko kya lipwela litu, mpaka pa kukombola lipwela litu lya kugohela tawete, kwa malumbo ga kukwisika kwake.

¹⁵ Kwa ndawa iyi nenga nani, apa nikayufwini kiyitakiso kinu mwa Bambo Yesu, kiyingalile pa wawalafu woha, nukupumulila kusengusa ndawa ya mwenga,

¹⁶ kuluwula mahina ginu pa sala syangu;

¹⁷ kukita Mulungu wa Bambo witu Yesu Kristo, Dadi wa kukwisika, awapele roho ya luhala na mafunukuliko pa kummanyisa yombe;

¹⁸ miho ga mwoyo winu gamulikike, nausi mumanye kiki kiyii kihuwalilo kya kakemeleko kake, kiki kiyii kutopela kwa kukwisika kwa lipwela lyake pa wawalafu,

¹⁹ na kiki kiyii ukulungu wakulutila wa mbafu yake kwa tenga wakukela, kwa ndingo wa kuhenga kwa kukangamala kwa makakala gake, kula akahengiti mwa Kristo,

²⁰ apa akansyusiti pa wakufwa, ni akantamisi pasi pa kiwoko kyake kya ndilo pandu pa kunani, panani pa mautwa goha,

²¹ ni chengo, ni mbafu, ni usultani, ni lihina liyi lyoha lya kuluwulika, nukuya lyakape pa miaka iyi, koma pa yila yiyii mukuyicha panyuma:

²² ni akafiwikiti fyoha pasi pa njayo syake, ni akampili kuya mutu wa fyoha pa kanisa,

²³ lili liyii mbili wake, kifwilanilo kya uyu wakutwilisa fyoha pa fyoha.