Obadia 1 - BAEBOR

EWURADZE N’atsɛmbu Wɔ Edom Do

¹ Obadia n’enyido adzehu nye yi. Dza EWURADZE Nyankopɔn ka wɔ Edom ho nye yi. Yɛatse EWURADZE n’anosɛm, dɛ wɔasoma ahembɔfo kɔ amanaman mu, dɛ, Hom nsoɛr, na yentu nkɛhyɛ Edom do nye no nko.

² EWURADZE se Edom dɛ, hwɛ, mayɛ wo kakraba wɔ amanaman mu: na woebu wo enyimtsia papaara.

³ W’akoma no nkontompɔ adaadaa wo, ao ɔwo a etse abotan ntokur mu a wo tsenabea krɔn; ɔwo a eka no w’akoma mu dɛ, Woana botum dze me edwir famu?

⁴ Kaansa efow kɔ mbrɛ ɔkrɔn dɛ ɔkɔr, na sɛ edze nworaba ntamu kɛyɛ wo tsenabew mpo a, medze wo befi hɔ edwir, EWURADZE na ɔse.

⁵ Sɛ ewifo anaa edwotwafo baa wo do anadwe a, aso nkyɛ wonnkowia wo na woegya wo ase kakra? Sɛ wenyinaba tsetsewfo baa wo do bɛtsetseew w’aba a, aso nkyɛ wonnkegya aba a wodzi no mpɛpɛw?

⁶ Na ɔwo Esau dze, hwɛ mbrɛ woedua aprapra wo ndzɛmba ase na wɔasesaw w’akoradze a edze sumae no a! Ampaara, ɔayɛ wo pasapasa.

⁷ W’apambuafo nyina esunsun wo araa ekodu ɔhe do: nyimpa a wɔnye wo tse asomdwee mu no adaadaa wo, na woedzi wo do nyim; hɔn a wɔnye wo dzidzi esua w’ase efir; naaso ɔwo dze, innyim.

⁸ Aso nnyɛ da no mu, EWURADZE na ɔse, na mebɛsɛɛ enyansafo efi Edom, na ntseasee fi Esau bepɔw do?

⁹ Na Teman e, w’akatakyi bo botu araa, ma ekodu dɛ woboku obiara efi Esau bepɔw do.

Siantsir A Edom Benya Asotwe

¹⁰ W’etsiɔdzendze a edze yɛɛ wo nua Jakob ntsi, enyito bɛkata wo do, na woetwa wo akyen daa.

¹¹ Wɔ Da no a igyinaa nkyɛn, ma ananaben soaa n’ahodze kɔree, na ahɔho kɛhɛɛn no mbobokɛse mu, na wɔtwee Jerusalɛm ho tonto no mu no, nna ɔwoara so yɛɛ dɛ hɔn mu baako.

¹² Nkyɛ onnyi dɛ edan w’ekyir ma wo nua wɔ n’ahokyer da no mu; na inndzi Judamba eduwa dɛ hɔn atamfo sɛɛ hɔn ntsi; eso nkyɛ onnyi dɛ isi hɔn atwetwe wɔ hɔn ahohia da no mu.

¹³ Nkyɛ mma nnhɛn me man n’abobokɛse mu wɔ hɔn mbusu da no mu; ɛhɛɛ, nkyɛ onnyi dɛ edze enyigye hwɛ hɔn ahohia wɔ hɔn mbusu da no mu, eso nkyɛ mma hom mmfa hom nsa nnto hɔn ahodze do wɔ hɔn mbusu da no mu.

¹⁴ Onnyi dɛ nkyɛ igyina nkwanta do twitwa ne nyimpa a wofii nsa no; na nkyɛ mma nnyi no dɔm a wɔaka no mma wɔ ahokyer da no mu.

¹⁵ Na EWURADZE ne da no abɛn wɔ amanaman nyina do: Edom, dɛ mbrɛ ɔwo ayɛ no dɛmara na wɔdze bɛyɛ wo; wo ndzeyɛɛ bɛsan ebobua woara w’etsifi.

¹⁶ Na dɛ mbrɛ amandzehu boow me man Juda dɛ nsa wɔ me bepɔw krɔnkrɔn no do no, dɛmara so na ɔbɔbow amanaman nyina daa, ɛhɛɛ, wobehyia dza ɔkyɛn dɛm mpo, na amandzehu no bɛmen hɔn araa ma hɔn ase ahyew koraa.

¹⁷ Na Zion bepɔw do hɔ na hɔn a woefi nsa bɛtsena, na ɔbɛyɛ krɔnkrɔn; na Jakob fie bɛsan afa hɔn enyadze no edzi.

¹⁸ Na Jakob fie bɛyɛ ogya, na Josef fie ayɛ ogyaframee, naaso Esau fie dze, ɔbɛyɛ dɛ mburonan, na wɔbɛhyew wɔ hɔn mu, na wɔamemen hɔn: na obiara rennka mma Esau fie; EWURADZE na ɔaka.

¹⁹ Na Pomu afamufo no bɛfa Esau bepɔw no ayɛ egyapadze; na ɔbɔnmufo no bɛfa Filistiafo dze: na wɔbɛfa Samaria asaase na Efraim asaase edzi do: na Benjamin bɛfa Gilead edzi do.

²⁰ Na Israelmba dɔm yi ndɔmmumfo no bɛfa dza ɔyɛ Keenanfo dze no dze ekesi Zarefat; na Jerusalɛm ndɔmmumfo a wɔwɔ Sefarad no bɛfa Pomu afamu nkurow no edzi do.

²¹ Na agyefo bɔfow aba Zion bepɔw do na woebedzi Esau bepɔw no do; na ahendzi no bɛyɛ EWURADZE nankasa dze.