Mika 1 - BAEBOR

¹ Iyi nye EWURADZE n’asɛm a ɔbaa Morasnyi Mika hɔ wɔ Juda ahemfo Jotam, Ahaz na Hezekia ber mu, a ɔfa Samaria na Jerusalɛm ho no.

Samaria Na Jerusalɛm Do Kwadwom

² Aman, hom nyina hom ntsie; asaase na dza ɔwɔ mu nyina, hom nkyɛn aso; na EWURADZE Nyankopɔn ndzi dase ntsia hom; EWURADZE a ofi n’asɔrdan krɔnkrɔn mu no.

³ Na, hwɛ, EWURADZE fi ne tsenabea epue, na obesian, na oebetsiatsia asaase nsorɔnsorɔmbea do.

⁴ Na mbepɔw bɛnan wɔ n’ase, na mbɔnsa bɛpaapaa, dɛ mbrɛ hua nan wɔ gya enyim, dɛ nsu a woehue egu mbrɛ hɔ sian.

⁵ Iyi nyina Jakob mbrato ntsi a, na Israel fi ne ndzebɔn ntsi a. Jakob mbrato nye dɛn? Ana nnyɛ Samaria a? Na ebɛnadze nye Juda nsorɔnsorɔmbea? Ana nnyɛ Jerusalɛm a?

⁶ Dɛm ntsi mebɛyɛ Samaria dɛ hamu abokuw, na dɛ wenyin ture ntsetsɛweebea: na mubohue n’abo no egu bɔnsa no mu, na meyi ne fapem ato gua.

⁷ Na n’ehonyi a oegu nyina wobobubu no pɔsɔpɔsɔ, na wɔdze gya ahyew n’apɛdze nyina, na mayɛ n’abosom nyina afoafo: osiandɛ edwaman apɛdze na ɔdze aboa ano, na edwaman apɛdze na ɔbɛsan akɛyɛ.

⁸ Iyi ntsi na mubosu na metwa ewuo, na mibedzi kwatserkwa na adagyaw: mubosu dɛ mpataku, na medzi nkɔmbɔ dɛ nsohor.

⁹ Na n’epirakur ayɛ koannkɔ: na oebodu Juda; oebodu me man abobokɛse ano, edu Jerusalɛm.

¹⁰ Mma hom nnka no wɔ Gat, mma hom nnsu koraa: Bɛt-leafra na hom mfa homho mpirepirew huntuma mu.

¹¹ Safir ɔtsefo e, twa mu kɔ wɔ adagyaw na enyito mu oo: Zaanan ɔtsefo mmpuei mmbae. Bɛt-ezel ewuotwa bɛma hom egyinae abɔ hom.

¹² Na Marot ɔtsefo rotweɔn mber pa ahomtsew mu: osiandɛ mbusu fi EWURADZE hɔ aba Jerusalɛm abobokɛse mu.

¹³ Lakis ɔtsefo e, fa tseaseanam no se pɔnkɔ ɔhoɔharfo no oo: ɔno nye Zion babaa no bɔn ahyɛse; osiandɛ wohun Israel mbrato no wɔ wo mu.

¹⁴ Dɛm ntsi ebɛma Moresɛt-gat nkradzi akyɛdze: Akizib efi bɛyɛ ndaadaadze ama Israel ahemfo.

¹⁵ Maresa ɔtsefo e, medze nyia ɔbɛfa wo ayɛ enyadze no bɛba wo do oo: Israel enyimnyam bɛba araa ebodu Adullam.

¹⁶ Yɛ etsipaa, na yi wo ho nhwi wɔ mba a edɔ hɔn ntsi: ma w’etsipaa ntserɛw dɛ ɔpɛtɛkwaakye dze; osiandɛ ɔafa hɔn efi wo nkyɛn kɔ ndɔmmum.