Mbɛbusɛm 1 - BAEBOR

Mbɛbusɛm Ho Mfaso

¹ Israelhen Solomon, David ne ba no, ne mbɛbusɛm:

² Dɛ wɔmfa nhu nyansa na nkyerɛkyerɛ; Dɛ wɔmfa nhu ntseasee nsɛm mu;

³ Dɛ wɔmfa nya nkyerɛkyerɛ wɔ enyansadze mu, Wɔ ntseasee na atsɛmbu na nsɛntsenenee mu.

⁴ Dɛ wɔmfa nkyerɛ atsetsekwaa enyitsew, Dɛ wɔmfa mma aberantsɛ nyimdzee na adwenmutsewee:

⁵ Ama onyansafo eetsie, na n’adzesua akɔ sor; Na onyimdzefo dze eenya apam pa:

⁶ Dɛ wɔmfa nhu abɛbusɛm na akasabɛbu, Enyansafo nsɛm, na hɔn mbrɔme mu.

⁷ EWURADZE ho suro nye nyimdzee n’ahyɛse: Na nkwasea dze, wobu nyansa na nkyerɛkyerɛ enyimtsia.

⁸ Me ba, tsie w’egya ne nkyerɛkyerɛ, Na mma mmpow wo na ne mbra.

Afotu Ma Mbabun

⁹ Na wɔbɛyɛ enyimnyam abɔtsir ama wo tsir, Na wo kɔn mu ntweaban.

¹⁰ Me ba, sɛ ndzebɔnyɛfo daadaa wo a, Mma mmpen do.

¹¹ Sɛ wɔ dɛ, Bra ma yɛnkɔ, Ma yenkotu nhyɛ anokwafo do, Nyia odzi bem no, ma yɛnkɛtsɛw no kwa;

¹² Ma yɛnkɛmemen hɔn enyikan dɛ samanadze, Na emudzifo no, dɛ hɔn a wosian kɔ adakamona mu;

¹³ Na yebenya adze a ɔsom bo nyina, Yɛdze asadze bɛhyehyɛ hɛn adan amaama;

¹⁴ Bra, fa woho bɔbɔ hɛnho; Na hɛn nyinara yebenya foto kor a:

¹⁵ Me ba, mma nnye hɔn ntu kwan; Twe w’anan fi hɔn kwan do:

¹⁶ Na hɔn anan tu mbirika kɔ mbusu mu, Na hɔn ho yɛ har ka bɔgya gu.

¹⁷ Na kwa ara na wosua efir, Wɔ anoma biara enyim:

¹⁸ Woyinom ara wohue hɔnankasa hɔn bɔgyaa gu, Wɔtsɛw hɔnankasa hɔn nkwa.

¹⁹ Dɛm na obiara a ɔpɛ edzifodze n’akwan tse; Oyi ewuranom hɔn nkwa fi hɔ.

Nyansa Refrɛ

²⁰ Nyansa tseatsea mu dzendzen wɔ ɔbrɔn do: Ɔbɔ ne ndze mu wɔ papratamu;

²¹ Ɔkeka mu wɔ guado; Nkuropon ano, Kuropɔn no mu, na ɔka ne nsɛm dɛ:

²² Dabɛn ara na hom, ntsetsekwaa, hom bɛpɛ ntsetsekwaadze ekodu? Na atwetwesifo enyi bɛgye atwetwesi mu, Na nkwasea bekyir nyimdzee?

²³ Hom ndan homho mma me nkaenyim: Hom nhwɛ, mubohue mo sunsum ama hom, Mebɛda me nsɛm edzi akyerɛ hom.

²⁴ Osiandɛ mafrɛ na hom apow; Matsen me nsamu, na nyimpa biara ammfa annyɛ hwee.

²⁵ Na hom ebu m’apam nyina adze gyangyan, Na hom ammfa me nkaenyim biara annyɛ hwee;

²⁶ Emi so mebɛserew wɔ hom mbusu da no mu; Da a hom suro bɛba no, mibesi hom atwetwe;

²⁷ Da a hom suro bɛba dɛ ehum, Na hom mbusu bɛba dɛ ekyinehyia mframa, Da a ahohia na ahokyer bɛba hom do no a.

²⁸ Ɔno na wobosu afrɛ me, na munnkobua; Wɔbɔhwehwɛ me anapahema, na wonnkohu me:

²⁹ Osiandɛ wokyiir nyimdzee, Na wɔannsan mu ennyi Nyankopɔn ho suro ntsi:

³⁰ Wɔammfa n’apam biara annyɛ hwee; Wobuu ne nkaenyim nyina enyimtsia:

³¹ Dɛm ntsi wobedzi hɔnankasa hɔn kwan do aba, Na hɔnankasa hɔn nhyehyɛɛ amee hɔn.

³² Na mbatam hɔn ekyirsan boku hɔn, Na nkwasea hɔn prɔmprɔmyɛ asɛɛ hɔn.

³³ Na obiara a obetsie me no dze, ɔbɛtsena hɔ sɔkyee, Na no ho adwe no dɛ onnkosuro mbusu biara.