Matthew 1 - BAEBOR

Jesus Kraest N’egyanom Santsen

¹ Jesus Kraest, David ne ba, Abraham ne ba no n’ebusuasantsen nwoma.

² Abraham woo Isaak, na Isaak woo Jakob; na Jakob so woo Juda nye no nuanom;

³ na Juda nye Tamar woo Perez nye Zera; na Perez woo Hezron; na Hezron woo Ram;

⁴ na Ram woo Amminadab; na Amminadab woo Nahshon; na Nahshon woo Salmon;

⁵ Salmon nye Rahab woo Boaz; na Boaz nye Rut woo Obed; na Obed woo Jesse;

⁶ na Jesse woo Ɔhen David. Na David nye nyia nkyɛ ɔyɛ Uria yer no woo Solomon;

⁷ na Solomon woo Rehoboam; na Rehoboam woo Abija; na Abija woo Asa;

⁸ Asa woo Jehosafat; na Jehosafat woo Joram; na Joram woo Uzia;

⁹ na Uzia woo Jotam; na Jotam woo Ahaz; na Ahaz woo Hezekia;

¹⁰ na Hezekia woo Manaasɛ; na Manaasɛ woo Amon; na Amon woo Josia;

¹¹ na Josia woo Jekonia nye no nuanom wɔ aber wɔfaa hɔn ndɔmmum kɔr Babilɔn no.

¹² Na Babilɔn ndɔmmumkɔ ber no ekyir no, Jekonia woo Sealtiel; na Sealtiel woo Zerubabel;

¹³ na Zerubabel woo Abiud; Abiud woo Eliakim; na Eliakim woo Azor;

¹⁴ Azor so woo Sadok; na Sadok woo Akim; na Akim woo Eliud;

¹⁵ Eliud woo Eleazar; na Eleazar woo Matan; na Matan woo Jakob;

¹⁶ na Jakob woo Josef, Mary a ɔwoo nyia wɔfrɛ no Kraest no no kun no.

¹⁷ Afei ebusuasantsen a ofi Abraham do besi David do nyina yɛ ebusuasantsen duanan; na ofi David do besi Babilɔn ndɔmmumkɔ ber no do yɛ ebusuasantsen duanan; na ofi Babilɔn ndɔmmumkɔ ber no do besi Kraest no do yɛ ebusuasantsen duanan.

Jesus N’awoo

¹⁸ Na mbrɛ Jesus Kraest n’awoo tse nye yi: ber a wɔdze ne na Mary maa Josef dɛ n’esiwayer, na wonnyae nnhyiaa mu no, wohun no dɛ onyinsen dza ofi Sunsum Krɔnkrɔn mu no.

¹⁹ Na no kun Josef yɛ nyimpa tsenenee, na ɔmmpɛ dɛ ogu n’enyim ase bagua mu ntsi, ɔdween dɛ obegyaa no wɔ nsumaa mu.

²⁰ Na aber a ɔrodwen yinom ho no, hwɛ, Ewuradze bɔfoe yii noho kyerɛɛ no wɔ adaaso mu see dɛ, Josef, David ba, mma nnsuro dɛ ebɛfa wo yer Mary aba wo nkyɛn; na dza onyinsen no fi Sunsum Krɔnkrɔn mu.

²¹ Na ɔbɔwo babanyin, na ato no dzin Jesus, osiandɛ ɔno na ɔbɛgye ne man efi hɔn bɔn mu.

²² Na yinom nyina ayɛ hɔ, ma dza Ewuradze nam nkɔnhyɛnyi no do kae no aaba mu dɛ,

²³ Hwɛ, ɔbaabun benyinsen, na ɔawo babanyin, Na wɔbɔto no dzin Immanuel, (a ne nkyerɛase nye dɛ, Onyame nye hɛn wɔ hɔ.)

²⁴ Na Josef fii nda mu nyanee no, ɔyɛɛ dɛ mbrɛ bɔfo no hyɛɛ no no, na ɔkɛfaa ne yer baa ne nkyɛn;

²⁵ na ɔnnye no ennhyia mu araa dze kodur dɛ ɔwoo babanyin: na ɔtoo no dzin Jesus.