Joel 1 - BAEBOR

Mbɛbɛw Sɛɛ Ekuadze

¹ Iyi nye EWURADZE n’asɛm a ɔbaa Petuel ba Joel hɔ no.

² Hom nkɔdaa, hom ntsie iyi, na hom asaase do atsefo nyina, hom nyɛ aso. Aso iyi bi aba da wɔ hom nda mu, anaaso hom egyanom nda mu?

³ Hom nka ho asɛm nkyerɛ hom mba, na hom mba nka nkyerɛ hɔn mba, na hɔn so hɔn mba nka nkyerɛ mbasantsen a odzi do.

⁴ Ekuadze a efuse gyae no, abɛbɛw edzi; na dza abɛbɛw gyae no, konyinko edzi; na konyinko ndzikaase no, esa edzi.

⁵ Asabokwafo, hom nnyan na hom nsu; na hom nsanomfo nyina, hom ntwa ewuo, wɔ nsa fenemfenem ntsi, osiandɛ woetwa efi hom anomu.

⁶ Na ɔman bi etu aba m’asaase do, hɔn ho yɛ dzen, na hɔn dodow nnyi ano; hɔn se tse dɛ gyata se, na wɔwɔ gyata kɛse ne nyepi se.

⁷ Ɔasɛɛ mo wenyindua, na ɔawaawaa m’adɔmbadua ho: ɔapɔr ho ahon egu, na ɔatow akyen; n’abaw ho ayɛ sakosako.

⁸ Twa ewuo dɛ ɔbaabun a ofura eyitam ma ne nkataasiaber mu kun.

⁹ Woetwa edziban afɔr na ɔnom afɔr efi EWURADZE fie; asɔfo, na EWURADZE asomfo no, robɔ mbubuw.

¹⁰ Kwaa asɛɛ, asaase ridzi nkɔmbɔ; na eburow asɛɛ, nsa fofor awew, ngo akɔ atwee.

¹¹ Ao ekuafo, hom enyi nwu, ao wenyin turehwɛfo, hom nka mbɔɔ, wɔ ewifua na atoko no ntsi; na haban mu ndɔbaa no ahera.

¹² Wenyindua akyenkyen, na adɔmbadua enyinyam; pɔmegranate ekutudua, abɛdua so, na aperdua, mekyerɛ haban mu ndua nyinara akyenkyen; osiandɛ enyigye ho ato wɔ adasamba mu.

¹³ Asɔfo, hom mfa eyitam mbɔ hom ho do, na hom nka mbɔɔ; afɔrmbukyia ho asomfo, hom ntwa ewuo; hom me Nyankopɔn n’asomfo, hom mbra mbɛda eyitam mu anadwe yi nyina: na edziban afɔr na ɔnom afɔr egyaa wɔ hom Nyankopɔn fie ba.

¹⁴ Hom ntu mbuadadzi nsi nkyɛn, hom mfrɛ baguabɔ krɔnkrɔn, hom mboa mpanyimfo na asaase no do atsefo nyina ano mbra EWURADZE hom Nyankopɔn fie, na hom nsu ntɔ EWURADZE do.

¹⁵ Ao da no a! Na EWURADZE ne da no abɛn, na ɔbɛba dɛ ɔsɛɛ a ofi otumfo no ne nkyɛn.

¹⁶ Ana wonntwaa edziban mmfii hɛn enyim, ana enyigye na ahosɛpɛw mmfii hɛn Nyankopɔn fie?

¹⁷ Aba aprɔw n’akɔfi ase; mputu adeda apanapan, asan ebubu; osiandɛ eburow akyenkyen.

¹⁸ Mbrɛ mbowa dua si apen a! Anyɛmbowakuw reberɛ, osiandɛ wonnyi edzidzibea; ɛhɛɛ, nguankuw ruhu amandze.

¹⁹ Ao EWURADZE, ɔwo na musu frɛ wo: na ogya ahyew sar do edzidzimbea, na ogyaframee ahyew hamu ndua nyinara.

²⁰ Nyew, hambowa rehaahaw kyerɛ wo: osiandɛ nsu nwora nyina awewew, na ogya ahyew sar do edzidzimbea.