James 1 - BAEBOR

Nkyia

¹ James, Nyankopɔn nye Ewuradze Jesus Kraest akowaa, kyia mbusuakuw duebien a wɔapetse no.

Gyedzi na Nyansa

² Mo nuanom, sɛ hom kɔ nsɔhwɛ ahorow pii mu a, hom mbu no dɛw koraa;

³ na hom nhu dɛ hom gyedzi no nsɔhwɛ yɛ abotar ho edwuma.

⁴ Na hom mma abotar nwie n’edwuma yɛ pɛ, ama hom eedzi mu pirim a hom nnka ekyir wɔ biribiara mu.

⁵ Na sɛ hom mu biara ne nyansaa ka ekyir a, ombisa Nyankopɔn a ɔdze ma nyimpa nyina kwa na ɔnnka enyim no, na ɔdze bɛma no.

⁶ Na gyedzi mu na ma ombisa, mma ɔnnyɛ ekyingye wɔ biribiara ho: na nyia ɔgye kyim no tse dɛ po asorɛkye a mframa ridzi no akɔnaaba.

⁷ Na mma nyimpa a n’adwen ebien ebien, na ohihim n’akwan nyina mu no;

⁸ nndwen dɛ obenya Ewuradze hɔ biribi.

Hia nye Ahonya

⁹ Na wɔmma onua a ɔbrɛ adze no ndzi dɛw wɔ ɔma a wɔama no do no mu;

¹⁰ na ɔdzefo so dze, wɔ brɛ a wɔabrɛ no adze no mu; osiandɛ ɔbɛsen akɔ dɛ nkyɛkyɛr nhyiren.

¹¹ Na ewia dze ne hyehye fir na ɔhyew nkyɛkyɛr, na ne nhyiren po, na no su ne fɛw sɛɛ; dɛmara so na ɔtse wɔ ɔdzefo ho; n’edwumayɛ dzendzen mu no na ɔbɛpa.

Nsɔhwɛ

¹² Siarfo nye nyimpa a ɔsɔw nsɔhwɛ; na sɛ otum gyina enyim a, obenya nkwa ahenkyɛw a Ewuradze dze abɔ hɔn a wɔdɔ no no anohoba no.

¹³ Sɛ nsɔhwɛ ba obiara do a, mma ɔnnka dɛ, Nyankopɔn na ɔrosɔ me ahwɛ: na adzebɔn bi nntum nnsɔ Nyankopɔn nnhwɛ, na ɔnoara so mmfa bɔn nnsɔ obiara nnhwɛ.

¹⁴ Obiara a wɔsɔ no hwɛ no, ofi nankasa n’akɔndɔ a ɔdaadaa no twe no kɔ nsɔhwɛ mu.

¹⁵ Na sɛ akɔndɔ no nyinsen a, ɔwo bɔn; na bɔn no wie nyin a, ɔwo owu.

¹⁶ Mo nuanom adɔfo, mma wɔnndaadaa hom.

¹⁷ Akyɛdze pa nye adom adze a odzi mu nyina fi sor, ofi kan Egya no nkyɛn na osian ba, ɔno na nsakyer nye sunsum a ɔdandan dze ba nnyi no ho.

¹⁸ Ɔnam nankasa ne pɛ do na ɔdze nokwasɛm woo hɛn, ama yaayɛ n’abɔdze mu eduabakan no bi.

Setsie na Nyɛe

¹⁹ Hom ntse ase dɛm, mo nuanom adɔfo, dɛ, nyimpa biara nyɛ ntsɛm ntsie, nyɛ nyaa nkasa, nyɛ nyaa mfa ebufuw:

²⁰ osiandɛ nyimpa n’ebufuw nnyɛ Nyankopɔn tsenenee ho edwuma.

²¹ Dɛm ntsi hom nyi atantandze nye bɔn beberebe nyina ntow ngu, na hom mfa ɔdwe ngye asɛm a wɔatsɛw no hom mu a obotum agye hom akra nkwa no.

²² Na hom nyɛ asɛm no ayɛfo, na mma hom nnyɛ etsiefo nko nndaadaa homho.

²³ Na sɛ obi yɛ asɛm no ne tsiefo, na sɛ ɔnnyɛ ne yɛfo a, ɔtse dɛ nyimpa a ɔhwɛ n’enyim wɔ ahwehwɛ mu:

²⁴ na sɛ ɔhwɛ noho na ɔkɔ a, ntsɛmara na no werɛ efir nyimpa su kor a ɔyɛ.

²⁵ Na nyia ɔhwɛ adehyedzi mbra a odzi mu no mu, na ogyina do, na ɔnnyɛ otsiefo werɛfirnyi mbom ɔyɛ edwuma no yɛfo no, ɔno na wobehyira no n’adzeyɛ mu.

²⁶ Sɛ obi dwen noho dɛ ɔyɛ nyamesomnyi, na ɔammfa ewur annto ne tɛkyerɛma mu, na ɔdaadaa nankasa n’akoma a, dɛm nyimpa no ne nyamesom yɛ kwa.

²⁷ Nyamesom a no ho tsew na fi nnyi ho wɔ hɛn Egya Nyankopɔn, enyim nye dɛ, ebɔhwɛ ngyanka nye ekunafo wɔ hɔn ahohia mu, na ibeyi woho efi wiadze nkekaa mu.