Hosea 1 - BAEBOR

¹ Iyi nye EWURADZE n’asɛm a ɔbaa Beeri ba Hosea hɔ, wɔ Juda ahemfo Uzia, Jotam, Ahaz, na Hezekia nda mu, na Israelhen Jeroboam a ɔyɛ Joas ne ba no ne nda mu no.

Hosea Ne Jer Na Ne Mba

² Ber a EWURADZE nam Hosea do kasaa asɔpɔn no, EWURADZE see Hosea dɛ, Kɔ, kɛfa ɔbaa edwaman na ndwaman mba war: na asaase no efi EWURADZE nkyɛn rogor ndwamangor kɛse.

³ Nna ɔkɔree kɛfaa Diblaim ne babaa Gomer; na onyinsenii woo babanyin maa no.

⁴ Na EWURADZE kaa kyerɛɛ no dɛ, To no dzin Jezreel; osiandɛ aka kakra ma meebedzi Jezreel no bɔgyaa ho wer wɔ Jehu fi do, na maama Israel fi ahendzi no abɔ adze.

⁵ Na ɔbɛba dɛ da no mubobubu Israel egyen mu wɔ Jezreel bɔnsa mu.

⁶ Na onyinseen bio na ɔwoo babaa. Na EWURADZE see no dɛ, To no dzin Lo-ruhama a ne nkyerɛase nye nyia oennhu no mbɔbɔr: osiandɛ merennda ho nnhu Israel fi mbɔbɔr, na medze akyɛ hɔn bio.

⁷ Na mubohu Juda fi mbɔbɔr na magye hɔn nkwa, wɔ EWURADZE hɔn Nyankopɔn no mu, naaso menndze egyen, anaa afona, anaa akodze, mpɔnkɔ, anaa mpɔnkɔdofo.

⁸ Na otwaa Lo-ruhama enumfo no, onyinsenii, na ɔwoo babanyin.

⁹ Na EWURADZE see dɛ, To no dzin Lo-ammi ase nye dɛ ɔnnyɛ me man: osiandɛ hom nnyɛ me man, na mo so mennyɛ hom Nyankopɔn.

¹⁰ Naaso Israelmba hɔn dodow bɛyɛ dɛ mpoano anhwea a wonnsusu eso wɔnnkan; na ɔbɛba dɛ fakor a wɔsee hɔn dɛ, Hom nnyɛ me man no, wɔbɛse hɔn dɛ, Hom yɛ Nyame tseasefo mba.

¹¹ Na Judamba na Israelmba bɔbɔ mu ehyia na wɔahyɛ otsitsir kor ama hɔnho, na wɔafow efi asaase no do akɔ: na Jezreel da no bɛyɛ da kɛse.