Amos 1 - BAEBOR

¹ Iyi nye dza Amos a ɔwɔ Tekoa nguanhwɛfo mu no hunii wɔ Israel ho wɔ Judahen Uzia ber do, na Israelhen Jeroboam a ɔyɛ Joas ne ba no ber do, mfe ebien ansaana asaasewosow no reba no.

² Na ɔsee dɛ, EWURADZE fi Zion bɔpɔw, na oefi Jerusalɛm ama ne ndze do; na nguanhwɛfo no hɔn nguandzidzibea bedzi awerɛhow, na Karmel etsifi etwintwam.

EWURADZE N’atsɛmbu Wɔ Amanaman No Do

³ Mbrɛ EWURADZE se nye yi: Damaskɔs n’emumuyɛ ntaataado ntsi, merenndan ne ntsea no; osiandɛ wɔdze dadze ewuporow adze adwerew Gilead:

⁴ na mobɔto Hazael fie mu gya, na ɔahyew Ben-hadad ahemfie.

⁵ Na mubobubu Damaskɔs adaban, na metwa hɔn a wɔtse Aven bɔnsa mu no efi hɔ, na nyia okitsa ahempoma no efi Bɛt-eden: na Siriaman bɔkɔ ndɔmmum mu wɔ Kir, EWURADZE na ɔse.

⁶ Mbrɛ EWURADZE se nye yi: Gaza n’emumuyɛ ntaataado ntsi, merenndan ne ntsea no; osiandɛ wɔfaa ɔman no nyinara ndɔmmum, dɛ wɔdze hɔn rekɛhyɛ Edom nsa:

⁷ na mobɔto Gaza ɔfasu mu gya, na ɔahyew n’ahemfi no:

⁸ na mubotwa hɔn a wɔtse Ashdod no efi hɔ, na nyia okitsa ahempoma no efi Ashkelon: na madan me nsa etsia Ekron, na Filistiafo nkaa no ase ahyew, EWURADZE Nyankopɔn na ɔse.

⁹ Mbrɛ EWURADZE se nye yi: Taere n’emumuyɛ ntaataado ntsi, merenndan ne ntsea no; osiandɛ woyii ɔman no nyinara hyɛɛ Edom nsa, na wɔannkaa enuanom ahyɛmudzi no:

¹⁰ na mobɔto Taere ɔfasu mu gya, na ɔahyew n’ahemfi no.

¹¹ Mbrɛ EWURADZE se nye yi: Edom n’emumuyɛ ntaataado ntsi, merenndan ne ntsea no; osiandɛ ɔdze afona tsiiw no nua, na ɔtoow ayamuhyehye nyina gui, na n’ebufuw tsetseew adze mu daa, na odzii n’abohur ekyir daa:

¹² na mobɔto Teman mu gya, na ɔahyew Bozra ahemfi no.

¹³ Mbrɛ EWURADZE se nye yi: Ammonmba hɔn mbrato ntaataado ntsi, merenndan ne ntsea no; osiandɛ wɔapaapaa Gilead enyinsemfo mu, ma wɔdze aatrɛ hɔn he mu:

¹⁴ na mobɔto Rabaa ɔfasu mu gya, na ɔahyew n’ahemfi no, wɔbɛtse ɔko mu gyegyeegye, na ɔko no bɛyɛ dzen dɛ ehum wɔ ekyinehyia mframa da mu:

¹⁵ na hɔn hen bɔkɔ ndɔmmum, ɔno na n’asafohemfo bɔbɔ mu akɔ, EWURADZE na ɔse.