2 Peter 1 - BAEBOR

¹ Simon Peter, Jesus Kraest n’akowaa nye somafo, dze kɛma hɔn a wɔnye hɛn enya gyedzi a ɔsom bo yi bi, wɔ hɛn Nyankopɔn nye hɛn Agyenkwa Jesus Kraest tsenenee no mu.

² Adom nka hom na asomdwee ndɔɔ so mma hom wɔ Nyankopɔn nye Ewuradze Jesus ho nyimdzee mu.

Nyankopɔn ne Frɛ nye Dza Ɔwɔ mu

³ Nyankopɔn dze nankasa no tum, nam nyia ɔafrɛ hɛn rokɔ noara n’enyimnyam nye yieyɛ mu no, no ho nyimdzee do, ama hɛn biribiara a yehia wɔ abrabɔ nye nyamesompa ho.

⁴ Ɔnoara do na ɔnam akyɛ hɛn n’anohoba a ɔsoso akɛse akɛse a ɔsom bo; dɛ sɛ hom enya eguan mprɔwee a ɔnam akɔndɔ do ba wɔ wiadze mu no a, hom eedua iyinom do enya Nyamesu no bi.

⁵ Ampaara iyiara ntsi, hom mfa mbɔdzen nyina nka ho wɔ hom afamu, na hom mfa dza ɔsɔ enyi nka hom gyedzi ho; na nyimdzee nka dza ɔsɔ enyi ho;

⁶ na enyidahɔ nka nyimdzee ho; na penkyɛr nka enyidahɔ ho;

⁷ na nyamesompa nka penkyɛr ho; na enuadɔ nka nyamesompa ho; na dɔ mapa nka enuadɔ ho.

⁸ Na sɛ iyinom wɔ hom mu, na ɔdɔɔ so a, ɔremma hom nnyɛ enyiahafo, anaaso hɔn a wɔnnsow aba wɔ hɛn Ewuradze Jesus Kraest ho nyimdzee afamu no.

⁹ Na nyia iyinom abɔ no no yɛ onyifuranyi, na onntum nnhu ekyir, no werɛ efir no bɔn dadaw no no nhohoree no.

¹⁰ Dɛm ntsi, enuanom, hom mbɔ mbɔdzen mma hom frɛ na yi a woeyi hom no nsi pi: na sɛ hom yɛ yinom a, hom rimmfintsiw da:

¹¹ na dɛm na wɔbɛma hom kwan mbordo akɔ hɛn Ewuradze nye hɛn Agyenkwa Jesus Kraest ahendzi a onnyi ewiei no mu.

¹² Dɛm ntsi, kaansa hom nyim dada, na hom etsim nokwar a ɔwɔ hom hɔ no mu mpo a, meremma m’enyi mmpa do dɛ mebɛkaakaa hom wɔ yinom ho daa.

¹³ Na mubu no dɛ oye ara dɛ ber a metse ntamadan yi mu yi, medze nkaabɔ mikenyan hom,

¹⁴ wɔ ber minyim dɛ ɔrenkyɛr na woeyi mo ho ntamadan yi egu, dɛ mbrɛ hɛn Ewuradze Jesus Kraest so eyi akyerɛ me no.

¹⁵ Nyew, mobɔbɔ mbɔdzen, na mo nkɔree ekyir no, hom eetum akaa yinom dabaa.

Kraest N’enyimnyam ne Hyerɛn ho Dasedzi

¹⁶ Na nnyɛ anansesɛm a wɔma no nyansakwan mu, na yeedzi ekyir aka hom hɛn Ewuradze Jesus Kraest no tum nye ne mbae ho asɛm, na mbom yɛyɛ ho adasefo a yɛdze hɛn ankasa hɛn enyiwa hun ne kɛseyɛ.

¹⁷ Na onyaa enyimnyam nye enyidzi fii Egya Nyankopɔn nkyɛn ber a ndze bi fi abɔso enyimnyam no mu fiir dɛ, Oyi nye mo Dɔba a ɔsɔ m’enyi no.

¹⁸ Na dɛm ndze yi, hɛn a yɛnye no wɔ koko krɔnkrɔn no do no, yɛtsee dɛ ofi sor bae.

¹⁹ Na yɛwɔ nkɔnhyɛsɛm a ogyina hɔ pintsinn kyɛn dɛm, ɔno na sɛ hom hwɛ no yie, dɛ kandzea a ɔhyerɛn beebi a ɔyɛ sunkamm dze kesi dɛ adze bɛkye, na adzekyee nworaba no epue wɔ hom akoma mu a, nna hom reyɛ dza oye.

²⁰ Na hom ndzi kan nhu iyi, dɛ nyimpa biara nntum no nko nnkyerɛ Kyerɛwsɛm no mu nkɔnhyɛ ase.

²¹ Na nkɔnhyɛ bi nnduaa nyimpa pɛ do mmbaa pɛn: na mbom Nyankopɔn nam nyimpa do kasaa dɛ mbrɛ Sunsum Krɔnkrɔn no kyerɛɛ hɔn.