Faelemɔn 1 - BAEBOR

¹ Paul, Kraest Jesus daduanyi, nye onua Timoti dze kɛma Faelemɔn hɛn dɔfo nye hɛn nyɛnko dwumayɛnyi,

² nye hɛn akyerɛbaa Afiya, nye hɛn nyɛnko sordaanyi Aakipus, nye asɔr a ɔwɔ wo fie no:

³ Adom nka hom nye asomdwee a ofir hɛn Egya Nyankopɔn nye Ewuradze Jesus Kraest hɔ.

Faelemɔn no Dɔ nye Gyedzi

⁴ Mekaa wo wɔ me mpaabɔ mu a, meda me Nyankopɔn ase daa,

⁵ osiandɛ metse wo dɔ a ewɔ wɔ ahotseweefo nyina ho, nye wo gyedzi wɔ Ewuradze Jesus Kraest mu no.

⁶ Mobɔ mpaa dɛ ndzepa nyina a ɔnam Kraest do wɔ wo mu no ho nyimdzee bɛma wo gyedzi ayamuyie ndwuma no ada edzi yie.

⁷ Mo nua, menya enyigye nye awerɛkyekyer kɛse wɔ wo dɔ ho, osiandɛ ahotseweefo akoma atɔ hɔn yamu wɔ ɔwo ntsi.

Paul Totɔ Serɛ ma Onɛsimɔs

⁸ Dɛm ntsi, kaansa meyɛ ndam pii wɔ Kraest mu dɛ mebɛhyɛ wo wɔ dza ɔsɛ ho a,

⁹ ɔdɔ ntsi mokotow serɛ wo mbom, emi Paul a meyɛ akɔdaa, na afei meyɛ Jesus Kraest daduanyi so:

¹⁰ mototɔ serɛ wo ma me ba a mawo no wɔ m’efiadze ndae mu,

¹¹ Onɛsimɔs (a nkan no nna no ho nnyi mfaso mma wo, na afei dze no ho wɔ mfaso ma emi nye ɔwo no).

¹² Ɔnoarankasa na masoma no wo hɔ bio, onyia a ɔtse dɛ mara m’akoma no a.

¹³ Na nkyɛ mepɛ dɛ misianka no me nkyɛn, ama oeedzi w’ananmu asom me wɔ asɛmpa no n’efiadze ndae no mu:

¹⁴ naaso mammpɛ dɛ migya wo ekyir yɛ biribiara, amma w’ayamuyie aannyɛ dɛ ofi nhyɛ mu, na mbom efi woara wo pɛ mu.

¹⁵ Na bi a iyi ntsi na ɔnye wo dzii mpaamu kakra, ama eenya no daa,

¹⁶ nnyɛ dɛ akowaa bio, mbom nyia ɔsen akowaa, onua dɔfo a oye ma me kɛse, na ankantam ɔwo, wɔ honam nye Ewuradze mu.

¹⁷ Dɛm ntsi sɛ ibu me dɛ nyɛnko pa dze a, gye no dɛ mankasa.

¹⁸ Na sɛ ɔayɛ wo bɔn biara, anaa ɔdze wo kaw bi a, fa yɛ mo nkontaa.

¹⁹ Marankasa Paul na medze me nsa rekyerɛw dɛ emi mara mubotua. Na woara wo kaw a edze me a wankasa wo ho mpo ka ho no dze, menka ho hwee.

²⁰ Nyew, onua, ma minnya wo ho mfaso wɔ Ewuradze mu; na m’ahom nka mo ho wɔ Kraest mu.

²¹ Ɔnam dɛ mowɔ awerɛhyɛmu wɔ wo setsie ho ntsi na merekyerɛw wo, minyim dɛ ebɛyɛ ma akyɛn dza mebisa yi mpo.

²² Afei so, siesie dabew bi ma me, na mowɔ enyisun dɛ ɔnam hom mpaabɔ ntsi, wɔdze me bɛsan abrɛ hom.

Nkyia a Odzi Ewiei

²³ Epafras, me nyɛnko daduanyi wɔ Kraest Jesus mu no kyia wo,

²⁴ Mark, Aristarkus, Demas, Luke, m’anyɛnkofo edwumayɛfo no kyiakyia wo.

²⁵ Ewuradze Jesus Kraest adom nka hom sunsum.