Levitikɔs 1 - BAEBOR

Ɔhyew Afɔr Ho Nhyehyɛɛ

¹ Na EWURADZE frɛɛ Moses, na ofii ehyiadzibuw no mu kasaa kyerɛɛ no dɛ,

² Kasa kyerɛ Israelmba, na se hɔn dɛ, Sɛ hom mu nyimpa biara dze ayɛyɛdze rebrɛ EWURADZE a, hom mfa hom fiembowa, a wɔyɛ anantwi nye nguan mu bi, nyɛ hom ayɛyɛdze mbra.

³ Sɛ n’ayɛyɛdze yɛ ɔhyew afɔr a ofi anantwi mu a, ɔmfa onyin a onndzii dzɛm mbra ehyiadzibuw no n’abowano, ama aayɛ enyisɔ wɔ EWURADZE enyim ama no.

⁴ Na ɔmfa ne nsa nto ɔhyew afɔr no n’etsifi; na ɔbɔsɔ enyi dɛ mpata ama no.

⁵ Na onku nantwisaa no wɔ EWURADZE enyim: na Aaron mbabanyin, asɔfo no, mfa bɔgya no mbɛkyerɛ, na wɔmfa bɔgya no mpetse afɔrmbukyia no a ɔwɔ ehyiadzibuw no n’abowano no do nhyia.

⁶ Na ɔnyer abowa no, na ontwitwa no esinesin.

⁷ Na ɔsɔfo Aaron ne mbabanyin no mfa nyena ngu afɔrmbukyia no do, na wɔnsɔ gya wɔ do.

⁸ Na Aaron mbabanyin asɔfo no, mfa esinesin no, tsir no, nye seradze no, ngu yie wɔ nyena a ɔsɛw gya no afɔrmbukyia no do no do;

⁹ n’ayamudze nye ne ntwɛr dze ɔmfa nsu nhohor ho ana: na ɔsɔfo no nhyew ne nyinara wɔ afɔrmbukyia no do, ma ɔnyɛ ɔhyew afɔr, mekyerɛ ogya afɔr a oyi nka huanhuam ma EWURADZE.

¹⁰ Na sɛ n’ayɛyɛdze fi nguankuw, nkɔsɔw anaa mpɔnkye mu a, ɔmfa onyin a onndzii dzɛm mbra.

¹¹ Na onku no wɔ afɔrmbukyia no ne nkyɛn mu kwaamu afamu wɔ EWURADZE enyim: na Aaron mbabanyin, asɔfo no, mfa no bɔgyaa mpetse afɔrmbukyia no do nhyia.

¹² Na ontwitwa no esinesin, nka ne tsir nye ne seradze ho; na ɔsɔfo no nsiesie no yie ngu nyena no a ɔwɔ gya no a ɔwɔ afɔrmbukyia no do no do:

¹³ ayamudze nye ntwɛr no dze ɔmfa nsu nhohor ho ana: na ɔsɔfo no mfa ne nyinara mbra, na ɔmbɛhyew no wɔ afɔrmbukyia no do: ɔyɛ ɔhyew afɔr, mekyerɛ ogya afɔr a oyi nka huanhuam ma EWURADZE.

¹⁴ Na sɛ n’ayɛyɛdze fi nnoma mu na ɔdze robɔbɔ EWURADZE ɔhyew afɔr a, ɔno ɔmfa ntamram, anaa mborɔnomamba bi nyɛ n’ayɛyɛdze mbra.

¹⁵ Na ɔsɔfo no mfa mbra afɔrmbukyia no ho, na ɔntsew ne tsir, na ɔnhyew no wɔ afɔrmbukyia no do; na no bɔgyaa no nkyi ngu afɔrmbukyia no ho:

¹⁶ na onyi no totuaa nka no mu ifi no ho, na ɔntow nkyen afɔrmbukyia no nkyɛn wɔ boka afamu, wɔ mbrɛ nso no gu no:

¹⁷ na onsuan mu wɔ n’atsaban ho, na mbom mma ɔnntsew mu: na ɔsɔfo no nhyew no wɔ afɔrmbukyia no do, wɔ nyena no a ɔwɔ gya no do no do: ɔyɛ ɔhyew afɔr, mekyerɛ ogya afɔr a oyi nka huanhuam ma EWURADZE.