HINDEI MAGƐNI A JƆN 1 - Ngowili Yekpei Numu Kpɛlɛɛ Va

¹ Bukui ji i yɛni a Yesu Kristi ngi hinda gɛngɔi yeevaa gɛngɔ lɔ. Ngewɔ i yeehindei ji magɛilɔ a ngie aako i hugɛ a ngi yengeblaa gbɔɔ yɛ wama wiema hugutungɔ. Kristi i ngi Malikei yoyoilɔ ngi yengemɔi Jɔn gama yeehinde jisia hugɛva a ngie,

² tawao Jɔn i na kpɛlɛɛ lɔ hugɛnga mbei i hulɔni. Ngi vaa gɛngɔi lɔ kɔloongɔ ngowili ma na i gbuani Ngewɔ gama kɛɛ tɔnyɛi ma na Yesu Kristi i magɛni.

³ Luba lɔ numui ma a kulɔma yiɛi jisia gaa kɛɛ nasia ma ta woolo ma tawao ta na wie nyɛingɔ hu; gbamaile yeendahou watii lukpengɔi gblanga.

Jɔn Lɔ Famɛi Yoyoma Sɔsii Wɔfleisia Gama

⁴ Nya, Jɔn, nya mia ngi kɔlɛi ji nyɛima sɔsii wɔfleisia gama ti Esia Lɔleihu: Ngauwanda kɛɛ ndiilɛli ti yɛ wu ma a gbua Ngewɔ gama, na i na haa, wɔɔ gbaa i na, tawao ngi walɛi hu, kɛɛ a gbua Ngafa Wɔfleisia gama ti looni ngi mahayɛi gulɔ,

⁵ kɛɛ Yesu Kristi, ngi jeli wuaamɔ lɔnyangɔi na haala Hindolo le i hiyeni haablaa lia tawao maha a ngie mahangeisia kpɛlɛɛ maahu ti dunyei hu. I ndoma gɛnga a mue, tawao a hee na i pieni i mu wuailɔ fo a ŋamɛi na i puni mu va mu jumbuisia va.

⁶ Kɛ i mu yɛnga a mahawu yila saagbua yengei wieva ngi Yewɔɛi kɛɛ ngi Kɛkɛ wɛ. Ngɔlɔya kɛɛ kpayei ti yɛ Yesu Kristi ma kunafɔ va! Amiina.

⁷ A kpe lɛ, ta gbe wama nja gbilisia hu! Numui kpɛlɛɛ ta ngi lɔlɔ, kpɛlingɔ nasia bɛɛ ma ti ngi bɔni a sɔlii. Nungaa gbi ti dunyei hu ta wɔɔlɔ ngi va. Tɔnyɛi mia a ji! Amiina.

⁸ Ndemɔi Ngewɔ wa yɛ, “Nya lɔ i lɔtoi nya ma tawao nyaa a gɛlɛ nya ma, nya ngi na haa, wɔɔ gbaa ngi na, tawao nya walɛi gbɔma hu.”

Hengei A Kristi

⁹ Nya Jɔn, wu ndewei mia a nge, tawao ji mua Yesu mu wilingɔ hu, nya gbɛngɔe wu ma mɔnɛi hu a la wu ma kɛɛ ngi mahayɛi bɛɛ hu kɛɛ hinda gbɔugbɔu hu. Ti nya loilɔ tii yila hu na laa a Patmɔs Ngewɔ layie va ngi ndeni kpɛlingɔ tɔnyɛi le la ma na Yesu magɛni.

¹⁰ Ndemɔi voloi ma lɔ Ngewɔ Yafei i yeini nya ma, kɛ ngi ngo lakpawa mɛninga a nya woma wee, kpuangɔ a bulu vɛwoi.

¹¹ Kɛ i ndea yɛ, “Na nyɛi bi hulɔma, bi yee kɔlɛi yoyo sɔsii wɔflei jisia gama: mia Ɛfisɔs, Simana, Paagamɔm, Taitira, Saadisi, Filadɛfia, kɛɛ Laodisia.”

¹² Kɛ ngi wotea tɔva yemia yɛpɛma nya gama. Humia ngi kanigbɔlu lambo vɛ wɔfla lɔni ti looni.

¹³ Numu yɛlɔ ti lia ngi gbuangɔ a nuu hindoloi, bombani guhɛi ngi ma fongɔ ngi gɔwɔlaa kɛɛ kanigbɔlu gulei beebeengɔ ngi liima.

¹⁴ Ngi wundiei golengɔ yɛla fo kia fande gowei na, kolengɔ fo kia hakɔi na, tawao ngi yaamɛisia bɛɛ ta voo dauŋ kia ngɔmbui voi na.

¹⁵ Ngi gɔwɔisia mayɛlɔ a voo kia blasi gɔlu mayiangɔi na ta guaa kuliya ti kpua, tawao ngi woi gbuangɔ yɛla a njaveisia ti jundu woi.

¹⁶ Tumbeka wɔfla ti yɛlɔ houni ngi yejama lokoi ya, kɛ kɔbowa laama houngɔ felei i gbuanga juaŋ ngi laa.

¹⁷ Ji ngi ngi lɔni, ngi gulɛilɔ ngi gɔwɔbu ngi wie kia nuu haangɔ. Kɛ i ngi yejama lokoi wumbunga i nda nya ma, yɛ “Baa luwa! I lɔtoi nyalɔ ma, tawao ga a kpua nyalɔ ma.

¹⁸ Nya mia ndɛvu nya yeya ngi haani wɔɔ, kɛɛ kpe lɛ, ngi vulunga kunafɔ ta ngi nda kunafɔ. Kpaya lɔ nya yeya hee maahu kɛɛ ndɔu.

¹⁹ Faale jiahui nasia nyɛi ba hu lɔ, yee jisia ti wiema kiahuna kɛɛ nasia ta wie ji woma.

²⁰ Kanakoi yeembui lɔ a ji kɔlooni tumbeka wɔfleisia ma bi tɔni nya yejama lokoi ya kɛɛ kanigbɔlu lambo vɛ wɔfleisia; tumbeka wɔfleisia ti looni malika wɔfleisia lɔ va ti sɔsii wɔfleisia maahu, tawao lambo vɛ wɔfleisia ti sɔsii gomɛ wɔfleisia lɔ va.