FILIPAIBLƐISIA 1 - Ngowili Yekpei Numu Kpɛlɛɛ Va

¹ Nya Pɔɔl, kɛɛ Timoti, Yesu Kristi yengeblaa a mue, nya mia ngi kɔlɛi ji nyɛima Kristimablei nasia gama ti Filipai, tia Yesu Kristi-ni ti wilingɔ hu vulii kɛɛ tokulɔisia tia nasia ta gbɔ ti ma.

² Mu Kɛkɛ Ngewɔ tia mu Lemɔi Yesu Kristi ti wu gɔ a ngauwanda kɛɛ ndiilɛli.

Pɔɔl Lɔ Ngewɔ Vɛlima Kɔlɛi Ji Gaablɛisia Va

³ Nga siɛgbualɔ nya Yewɔɛi ma wu va watii gbi wu hinda a hitɛ nya wɛ;

⁴ tawao watii gbi ngi yaa Ngewɔ vɛlima wu kpɛlɛɛ va nga ngi vɛli a kohunɛ waa lɔ,

⁵ pelei nasia va wu gbɔnga la nya ma Ngowili Yekpei vayava hu i hiye folei na vulii ma wu lani a Yesu Kristi i to folei ji ma.

⁶ Faale nya langɔe la kɛ Ngewɔ na i ngenge yekpei ji lɔtoni wu hu, a lolɔ piema i kpɔyɔ Folei na ma Yesu Kristi a yama.

⁷ Wu hinda lɔ Tuuŋ nya lii hu! Faale pɔɔnangɔ nya va giliva hii kɔlooni wu ma; ajifa wu gbɛɛnga nya ma mua ngengei na wiema Ngewɔ i fenga nya wɛ gba pieva kiahuna na ngi kpindiwɛlɛ bu kɛɛ watii na nya hugbɛmbongɔ yɛla kɛva kɛ tɔnya lɔ a Ngowili Yekpei kɛɛ pieva nungaa ti la la kiti gbi aa yɛ ti ma.

⁸ Ngewɔ lɔ nya jeli le kɛ tɔnyɛi mia nga nde wu ma ji nga nde ngɛɛ nya longɔe a wu kpɛlɛɛ kia lɔɔ Yesu Kristi vulii ngi longɔ a wue.

⁹ Nyaa Ngewɔ vɛlima aako i pie ndoma lii na i wu goohu wu nyɔunyɔ va i ya a gbaya Tuuŋ kɔɔ wu gu a tɔnyɛi gɔla, tawao wu yɛ a kiti lewe pɔɔnangɔ,

¹⁰ aako hindei na kpekpengɔ tewengɔ hinda yekpei kpɛlɛɛ ma wu gu a mbumbula pieva. Na wiengaa wu sɛwɛsɛwɛngɔ a yɛla tawao tɔwanyani ɛɛ yɛ wu ma Folei na ma Kristi a yama.

¹¹ Na gbi wa pie a yɛ a hinda yekpe waa lɔ tawao Yesu Kristi yakpe lɔ a pie wu ji wie, aako nungaa ti Ngewɔ wɔlɔ, ti ngi lato.

Yɛla Na Kristi Valɔ Ndɛvui Le

¹² Nya mbaa Kristimableisia, nya longɔ wu kɔɔ kɛ hindei nasia ti nya wienga ti pienga numu gboto lɔ lekee lama a Ngowili Yekpei.

¹³ Famia sojei nasia gbi ta Rom Maha Wai wɛlei mahugbe kɛɛ pekei nasia gbi ti mbei ti kɔɔlɔ kɛ jifa Kristi yengemɔ a nge famia ti nya wuni kpindiwɛlei bu.

¹⁴ Tawao nya wuava kpindiwɛlei bu i pienga Kristimableisia gbotoma ti lii valanga panda Ndemɔi ma na hii ti lii lɔ lekee gbaama Ngowili Yekpei leva a ngaulewe.

¹⁵ Tɔnya le kɛ ti lɛɛnga ta Ngowili Yekpei lelɔ kɔlooni Kristi ma tolo gbuava kɛɛ jifa ti longɔ a njianjia, kɛɛ pekeisia ta pie vulii a ndii yekpe lɔ ti longɔ kpekpeya i gbua hu.

¹⁶ Kɛlɛmayei jisia ta pielɔ hii jifa ti longɔ a nge ajifa ti kɔɔlɔ kɛ Ngewɔ kɛnga a nya yenge ndeva leiŋ kɛ tɔnya lɔ a Ngowili Yekpei.

¹⁷ Pekei nasia ti lolongɔ tɛɛ Ngowili Yekpei le kɔlooni Kristi ma a ndii yekpe, ta ndelɔ aako ti kpekpeya jɔɔ hu tia yekpe va; ti lii lɔ ma tɛɛ ta hinda gboto huwulɔ nya yeya kia lɛ ngi mbei kpindiwɛlei ji bu.

¹⁸ Njia gbi ii na ma ti longɔ ti pie a nge! Na kpewengɔ nya ma ta mia a Ngowili Yekpei lelei a pele gbi lekee, i yɛ lema sabu yekpe ma ɔɔ ndɛhu. Tawao nga goohunɛɛlɔ Tuuŋ,

¹⁹ ajifa ngi kɔɔlɔ kɛ Ngewɔ na wa fɛli nya va kɛɛ kpɔmɛi na a gbua Yesu Kristi Yafei gama ta pielɔ mahubleisia ti gbe nya ma.

²⁰ Na kpewengɔ waa nya ma tawao nya lii i ma ta mia a ji kunafɔ ngaa gbaha a nya yengei wiela, tawao waati gbi, kakayee ngamɛi ji, ngi ndiilo waa majɔɔ aako nya layie hu kɛɛ nya wiehindei ngi pie nungaa ti Kristi mbɛlɛhei gɔɔ, ngi haa bɛɛ ɔɔ ngi vulu.

²¹ Gbamaile gbɔɔ ndɛvui yeesabui le? Nya nya wɛ, ndɛvui yeesabui lɔ a yengela Kristi wɛ. Nya haala ta, a walɔ a nafa wa nya gama.

²² Kɛɛ ngi lɛmbingaa nga gulɔ a ngenge yekpe mato wiela, faale ngii kɔɔ ina nga nya haalɛi lɔ wumbu ɔɔ nya lɛmbilɛi.

²³ I wienga bi tɔaa bɛ tia nya laalama a leenga ngejahu we kɛɛ kɔwɔhu. Nya longɔ waa le ngi gbua ndɛvui ji hu ngi yɛ Kristi gama, tawao ji nyandengɔ polouŋ nya va.

²⁴ Kɛɛ aako ngi gbɔ wu ma, baagɔma lɔ nya yɛla ma ndɛvu hu i lewe nya haalɛi ma.

²⁵ Nya langɔe a ji, faale ngi kɔɔlɔ kɛ ngi yɛmaa lɛ na gbɔva wu gbi ma, aako wu lalei a Kristi kɛɛ wu goohunɛɛ mato.

²⁶ Nga ji wielɔ kɔɔ ngi wangaa gbɔma wu gama wu sabu matongɔ jɔɔ mata gbuava a nge tuvei va wu piema wua Yesu Kristi-ni wu wilingɔ hu.

²⁷ Kiahuna hinda yakpei na baagɔma i ma tamia a ji wa luva kia Ngowili Yekpei kɔlooni Kristi ma i ndeni yɛ wu pie, kɔɔ ngi gungaa a wala wu gama ɔɔ ngii guni, nga mɛnilɔ kɛ wuaa looni kpaŋ, wu lii i hani yakpe ma tawao wa lapi a ngooyila kɛɛ wu liima hindei yakpe lalei na va a gbua Ngowili Yekpei hu,

²⁸ tawao waa luwa nasia ma ti lolongɔ a wu yengei. Wu lii i loo watii gbi; ji lɔ a kɛ a tie kɛ ta gbahalɔ tawao kɛ wua wa temaya majɔɔlɔ, jifa Ngewɔ lɔ a teemayɛi ve wu wɛ.

²⁹ Gbamaile wua wu sabu yekpe waa majɔɔnga gbama yɛva a Kristi yengeblaa, wu lava lekee ii le a ngie, kɛɛ jifa gbɔma kpaalɛ a la wu ma ngi va.

³⁰ Wa gulɔ na a gbɛɛla nya ma yeendapii ji hu. Ndapi yakpei na wu yɛ tɔ wɔɔ nga kɔ ta mia, kia wu tɔma la, ngi kɔma kiahuna bɛɛ.