MAAKI 1 - Ngowili Yekpei Numu Kpɛlɛɛ Va

Ngowili Na Jɔn Nguamɔi Ndeni

¹ Ngowili Yekpei lɔ kɔlooni Yesu Kristi, Ngewɔ Hindoloi ma.

² I lɔtoni na ma lɔ Ngewɔ lutui Aisaya i nyɛini wɔɔ yɛ, “Ngewɔ yɛ, ‘Nyaa nya lutui yoyoma bi gulɔ aako i pelei la bi gulɔ.’

³ Numu yila lɔ yiama ngeleya ndɔgbɔ lambɛi ma yɛ, ‘A pelei gbatɛ Ndemɔi i wama jiama la, wu yeepelei wɔna!’ ”

⁴ Faale Jɔn i gbuɛilɔ nga ndɔgbɔ lambɛi ma, a jumbui wua nungaa ma, a Ngewɔ layie la a hee yɛ, “A wounve wu jumbuisia ma, ngi wu wua, aako Ngewɔ i manu wu ma wu jumbuisia va.”

⁵ Numu gboto ti gbuɛilɔ Judia lɔlei hu gbi kɛɛ Jelusalɛm ti li wolova Jɔn ma, ta gaye a ti jumbuisia, a ti wua Jɔdan yɛi hu.

⁶ Jɔn malomɛi vɛlɛngɔ yɛla wɔɔ a nyɔma yomboi lɔ, hua-gɔlɛi yeehakpɛi i ngi lia, tawao ngi mɛhɛɛ lɔ wɔɔ a kondeisia kɛɛ ndɔgbɔ gɔmii.

⁷ I hugɛilɔ na a nungaa yɛ, “Numui na i wama nya wooma i leweni nya ma poloŋ, ngi gɔwɛi vulii ngii gbekpeni mawɛɛva ngi fulo.

⁸ Njɛi lɔ nga wu wua la kɛɛ ta, a wu wua a Ngewɔ Yafei lɔ.”

Yesu Wualei Kɛɛ Ngi Gɔlɛlei

⁹ Hu ii guhani na wooma kɛ Yesu i gbuanga Nasalɛti, Galili lɔlei hu, i wa Jɔn gama, kɛ Jɔn i ngi wuanga Jɔdan hu.

¹⁰ Kia lekee i gbuani njɛi hu, kɛ i ngelei lɔnga ndawongɔ, Ngewɔ Yafei a yei ngi ma kia bomukulo.

¹¹ Kɛ ngoo i gbuanga ngelegoohu yɛ, “Bia lɔ nya liima Hindoloi a bie, bi hinda i nya goohu nɛngɔ wa le.”

¹² Hugutungɔ na wooma Ngewɔ Yafei i pieilɔ Yesu i li yakpe ndɔgbɔ lambɛi ma.

¹³ I yɛ yeendɔgbɔ lambɛi na ma njii numu fele gbɔyɔngɔ va Seitana a ngi gɔlɛ tawao tia ndɔgbɔ-huangeisia lekee lɔ ti yɛ na; kɛɛ malikeisia ti yɛlɔ a ngi magbewe gbua.

Yesu Lɔ Nyɛɛgbɛbla Naani Lolima

¹⁴ Na wooma kia ti Jɔn houni ti ngi wu kpindiwɛlei bu, Yesu i wailɔ Galili lɔlei hu a Ngewɔ Wowili Yekpei le yɛ,

¹⁵ “Watii i hitinga, kɛ i ndea, tawao Ngewɔ mahayɛi walei lɔ na kpla. A wounve wu jumbuisia ma, wu la a Ngowili Yekpei ji.”

¹⁶ Kia Yesu i yɛ lewema Galili Wopei gbla kɛ i Saimɔn lɔnga tia ngi ndewei Andru ta nyɛi gbɛ a mboomɛi ajifa nyɛɛ gbɛbla lɔ wɔɔ a tie.

¹⁷ Kɛ Yesu i ndenga ti ma yɛ, “A to nya ma, nga wu gaalɔ a walaa a nungaa nya gama kia wa wa a nyɛi wua yekpe va.”

¹⁸ Ngamɛi na ti ti bomɛisia loilɔ ti to ngi ma.

¹⁹ Kia i gbɔma lini kulo kɛ i ndewengaa weka fele lɔnga, Jemisi kɛɛ Jɔn, kenɛi Jɛbidi leengeisia, ti ti lɛndɛi hu ta ti bomɛisia hugbatɛ.

²⁰ Kia lekee i ti lɔni kɛ i ti lolinga; kɛ ti ti kɛkɛ Jɛbidi longa ndɛndɛi hu taa pawa-yengebleisia, ti to ngi ma.

Yesu Lɔ Ngafa Nyamui Gbuama Taamɔ Yila Hu

²¹ Yesu taa ngi gaalopoisia ti liilɔ Kapaniɔm, kɛ i wuanga hɛɛ wɛlei bu Juubleisia ti Lɛɛvu Volei ma, i tɔtoo a nungaa gaala na.

²² Kɛ nungaa ti wuhu i wunga kaa na va i kɛni, jifa i ti gaalɔ kia numui na i na kpaya i ngi wɛ; ii wieni kia Sawei Yeekaamɔisia ti yɛ na.

²³ Ngamɛi na kɛ taamɔ yila i wuaanga ti hɛɛ wɛlei na bu ngafa nyamu i ngi hu; kɛ i yelei gulanga yɛ,

²⁴ “Gbɛe bi loko wilima mu mahinda hu, bia bi Yesu Nasalɛtimɔi? Bi wanga mu jukuluva lɔ? Ngi bi gɔɔlɔ, Ngewɔmɔi yeemagayemangɔ mia a bie.”

²⁵ Kɛ Yesu i gbandɛnga ngi la yɛ, “Londo, bi gbua taamɔi ji hu!”

²⁶ Kɛ ngafa nyamui i taamɔi gulanga, i yele wa gula, i gbua ngi hu.

²⁷ Kɛ numui gbi ti wuhu i wunga, ta ti nyɔunyɔ mɔli tɛɛ, “Gbɔɔ a ji? Kaa nina! Taamɔi ji a hinda la a kpaya ngafa nyamuisia vulii bɛɛ yeya ta golo ngi wɛ!”

²⁸ Kɛ Yesu malɔwɔi i vayanga ngama Galili yee taateisia kpɛlɛɛ hu.

Yesu Lɔ Numu Gboto Bawoma

²⁹ Na wooma Yesu taa ngi gaalopoisia, Jemisi kɛɛ Jɔn ti ti lia, ti gbuailɔ hɛɛ wɛlei bu ti li yakpe Saimɔn kɛɛ Andru ti yeepɛlɛbu.

³⁰ Kɛɛ Saimɔn ngi yemɔi i yɛ lanilɔ kɔlɛvula wa i ngi ma. Kia lekee Yesu i foni, kɛ ti hugɛnga a ngie.

³¹ Kɛ i ya nyapoi gama, i ngi lokoi hou, i ngi wumbu, kɛ kɔlɛi i gbuanga ngi ma; kɛ yeenyapoi i mɛhɛɛ venga ti wɛ.

³² Kpɔkɔi na, ji foloi i gulani, nungaa ti wailɔ Yesu gama a heegbɛbla gbi kɛɛ nasia ngafa nyamuisia ti yɛ ti hu.

³³ Tei na hublaa gbi ti yaandɔɛilɔ pɛlei la.

³⁴ Kɛ i heegbɛ laasi gboto bawonga numu gboto ma, i ngafa nyamu gboto gbua nungaa hu, tawao ii yɛ luma yeengafeisia taa yɛpɛ ajifa ti yɛ kɔɔlɔ ye lɔ a ngie.

Yesu Lɔ Ngewɔ Yiɛi Lema Galili

³⁵ A ngewohui, huguhangɔ pɛiŋ ngele i ya wo, Yesu i hiyeilɔ i gbua tei hu, i li mia na yaa louŋ, i Ngewɔ vɛli na.

³⁶ Kɛɛ Saimɔn taa ngi mbaangɛisia ti hitɛilɔ ngi gɔkɔlima,

³⁷ tawao kia ti ngi lɔni, kɛ ti ndenga ngi ma tɛɛ, “Nungaa gbi lɔ bi gɔkɔlima.”

³⁸ Kɛɛ i ndeilɔ ti ma yɛ, “A mu lewe mu li fuula wekeisia hu ti mbei galangɔ aako ngi Ngewɔ yiɛi le na bɛɛ, ajifa na va lɔ ngi wani.”

³⁹ Yesu i jiɛilɔ Galili lɔlei hu gbi, a Ngewɔ yiɛi le ti hɛɛ wɛleisia bu, a ngafa nyamuisia gbua nungaa hu.

Yesu Lɔ kpɔukpɔumɔ Yila Bawoma

⁴⁰ Kɛ kpɔukpɔumɔ yila i wanga ngi gama, i wombi gbakpa, i ngi manɛnɛ gbouŋ yɛ, “Bi lumangaa, ba gulɔ bi nya bawo ngi yɛ sɛwɛ.”

⁴¹ Kɛ ngi mamamau i Yesu lɔnga wa, i ngi lokoi lambo, i jaa a ngie yɛ, “Nya lumangɔe, bawo bi yɛ sɛwɛ.”

⁴² Kɛ kpɔukpɔui i bawonga ngi ma ngama, ngi luwui i yɛ sɛwɛ.

⁴³ Kɛ Yesu i ngi laahinga kpɔtukpɔtu, i pie i li yakpe,

⁴⁴ i nde ngi ma pɛiŋ i ya li yɛ, “Wote mbei, baa ji hugɛ a numu gbi, kɛɛ li yakpe Saa Gbuamɔi gama i bi gbe, bi saai na gbua Mojisi i ndani wɔɔ a sawa, seliva kɛ bi bawonga.”

⁴⁵ Kɛɛ taamɔi i gbuailɔ i tɔtoo a yeevei ji vayala hu gbi, na hii Yesu ii yɛ yaa gu aa wuaa taa hu foofo hu; i yɛ na mia lɔ na yaa louŋ. Na hu gbi nungaa ti yɛlɔ a wa ngi gama ta gbua Galili luwuma gbi.