JEMISI 1 - Ngowili Yekpei Numu Kpɛlɛɛ Va

¹ Nya Jemisi, Ngewɔ yengemɔ a nge kɛɛ Ndemɔi Yesu Kristi bɛɛ, nya mia ngi kɔlɛi ji yoyoma Ngewɔ nungei nasia kpɛlɛɛ gama ti vayafayangɔ dunyei hu gbi. Nga va wu kpɛlɛɛ ma.

Lala A Ngewɔ Kɛɛ Nɛmahulewei

² Nya mbaa Kristimableisia, a koohunɛɛ waa wie ji hinda gbɔugbɔu gɛwɛgɛwɛngaa ta wu male,

³ ajifa wu kɔɔlɔ kɛ wu longaa houni wu lalei ma wu yeehinda gbɔugbɔisia huvo, kɛ wu kɛnga kɛ wa gulɔ hinda gbɔugbɔu bu.

⁴ Tawao a pie wu hinda gbɔugbɔu huhoulɛi hu aa lewe tawao waa gbaha, aako wu yɛ a Kristimablaa lavengɔngaa, wu nyamu gbi aa yɛ na!

⁵ Nɛmahulewe ii yɛlɔ wu yilaye wɛ, i Ngewɔ vɛli, na ngi lokohu lambongɔ hani majiava numu gbi ma, kponyɛ wooma ii le, Ngewɔ a nɛmahulewe velɔ ngi wɛ.

⁶ Kɛɛ mahoungɔ i Ngewɔ vɛli ngi langɔ la vulii kɛ Ngewɔ a ngi hɛɛwoi mɛnilɔ, tawao sekahu gbi aa yɛ ngi lii hu, gbamaile numui na a sekahu wie ngi gbuangɔ a gboyei yeenjagatei lɔ fɛfɛi a ngi hɔwɔhɔwɔ hu.

^7-8 Yeenumui na nyɔkɔ, a wotewote ngi giliyii hu kɛɛ ngi wiehindei, aa gili la kɛ a hani gbi majɔɔlɔ a Ndemɔi.

Fɛɛli Kɛɛ Kpatɛi

⁹ Mahoungɔ Kristimamɔi na ngi vɛlingɔ i goohunɛɛ ji Ngewɔ a ngi lɛ,

¹⁰ tawao Kristimamɔi na ngi gbatɛngɔ i goohunɛɛ ji Ngewɔ a ngi yei. Ajifa kpatɛblaa ta haalɔ hugutungɔ kia kpitii yeepuɛi a haa.

¹¹ Gbamaile folei a gbualɔ kpandingɔ waa i kpitii mɔ kɛ yeepuɛi i logbonga i gula, kɛ ngi nyandei i jukulunga. Hii kpatɛblaa jukulu watii na ti wugbakpangɔ a yɛla ti navoo gɔlilei hu.

Hugɔɔmahindei Kɛɛ Kɔlɛyei

¹² Numui na goohu nɛngɔe ɛɛ gbe a lala a Ngewɔ ji hinda gbɔugbɔngaa ta ngi male, ajifa i hugɔɔmahindei nasia huvoongaa pandaa, Ngewɔ a ngi pawalɔ a kunafɔ lɛɛvui na i Lahei wumbunga feva nasia wɛ ti longɔ a ngie.

¹³ Hinda gbɔugbɔu bondɛi nasia ti numu gɔlɛngaa jumbu hinda wieva, maa ii houni i nde yɛ, “Ngewɔ mia i nya gɔlɛma;” ajifa numu gbi ɛɛ gu aa Ngewɔ gɔlɛ hinda nyamu wieva, tawao ta vulii ɛɛ numu gbi gɔlɛ.

¹⁴ Kɛɛ numu gbi ngi liima hinda nyamuisia mia ta ngi laala ti ngi wili jumbui hu.

¹⁵ Kɛɛ numu i golongaa ngi liima hinda nyamui wiela wɛ, a jumbui lɔ wie tawao numu i nɔɔngaa jumbui wiela ma, ngi yafei a haalɔ kunafɔ va.

¹⁶ Nya mbaa Kristimableisia, numu gbi aa wu wɛlɛ.

¹⁷ Mboya hani yekpe gbi kɛɛ hani gbi lekee ma majɔɔ gbama, a gbua ngelegoohu lɔ; a gbua mu Kɛkɛ Ngewɔ gama lɔ na i ngelema voofoisia gbatɛni, ɛɛ wotewote tawao ɛɛ wounve mu ma aa mu lo kpindi hu.

¹⁸ I nɛni Ngewɔ vulii lɔ wɛ pieva ngi wowili lɔnyangɔe i pie ti mu le a nina jifa ngi longɔ mu gbekpe mu lewe ngi gbatɛ-hanii kpɛlɛɛ ma.

Ngowili Yekpei Mɛnila Kɛɛ Piela

¹⁹ Ji i yɛ wu nɛmahu, nya mbaa Kristimableisia, numu gbi ngi hu i vula a wolola, kɛɛ ngi hu i lɛli a yɛpɛla kɛɛ liileweva.

²⁰ Ndiilewe ɛɛ gu a wala a pɔɔnɛi na Ngewɔ lii i ma ngi nungeisia va.

²¹ Faale a gbe numu nɔhɔ hindei nasia kpɛlɛɛ ma piela gungɔ wu hu kɛɛ tuva nyamui gbi. A golo Ngewɔ wɛ wu njɛpɛi na gulu i hiima wu liisia hu, njɛpɛi na a gu a wu bawola.

²² Waa wua yekpe wɛlɛ a ji wa wolo lekee Ngowili Yekpei ma; kia aa yɛ hii, a na wie Ngowili Yekpei a wu gaa la.

²³ Numu gbi lekee a wolo gbama Ngowili Yekpei ma kɛɛ ɛɛ na wie a nde, ngi wiengɔe kia numui i na a mɛmɛɛ hugbee i ngi yɛyii yeetɔnyangɔi lɔ.

²⁴ A ta yekpe gbelɔ vulii pandawanda kɛɛ ngi gbuangɔ lekee kɛ i lema ngi yɛyii ma ngaama.

²⁵ Kɛɛ numui na a sawei gaa vulii pandawanda kpekpengɔ tewengɔ sawei gbi ma, sawei na a nungaa gbua nduwɔya hu, i nɔɔ kaala ma tawao ɛɛ mɛni lekee gbama aa lema ma, kɛɛ a na wie yeesawei i ndeni, Ngewɔ a ngi nafalɔ hinda gbi hu a pie.

²⁶ Numu gbi langɔe la yɛ Kristimamɔ yekpe lɔ a ngie? Ina yeenumui na ii guni ngi nɛi ma, kɛ baabaa-hinda gbama mia a ngi Yewɔ-hindei tawao kɛ taa ta yekpe wɛlɛma.

²⁷ Ngewɔ-hindei na sɛwɛsɛwɛngɔ tawao kpekpengɔ mu Kɛkɛ Ngewɔ yaama ta lɔ a ji: poleengeisia tia ponyahangeisia mahugbela ti hinda gbɔugbɔi hu kɛɛ numu bia yekpe mahugbela aako baa yɛ a dunyei ji yeejumbu wieblɛisia yilayee.