2 JƆN 1 - Ngowili Yekpei Numu Kpɛlɛɛ Va

¹ Nya Kpakolei a nge, nya mia ngi kɔlɛi ji nyɛima Baama Nyahɛi na gama nya liimamɔi le taa ngi leengei nasia nya longɔ a tie vulii a tɔnya. Nya yaangɔ ii le, nasia gbi ti tɔnyɛi gɔɔngɔ ti longɔe a wue,

² ajifa tɔnyɛi lɔ mu hu tawao a lolɔ mu hu kunafɔ va.

³ Mu Kɛkɛ Ngewɔ taa ngi Hindoloi Yesu Kristi ti ngauwanda gɛ a mue, ti mu gɔ a manuma, kɛɛ ndiilɛli, ti yɛ a mu woo tɔnya hu kɛɛ ndoma.

Tɔnyɛi Kɛɛ Ndomɛi

⁴ Nya goohu i nɛɛilɔ hulewengɔ tɔva bi leengeisia lɛɛnga ti toma tɔnyɛi ma kia lekee Kɛkɛi i sawei veni la mu wɛ.

⁵ Faale, nya liima Baama Nyahɛi, nyaa ndema bi ma: mu gbi a mu lo a mu nyɔunyɔu. Sawa nina yaa ji ngaa yɛ nyɛima bi gama; sawei ji lɔ mu majɔɔni i hiye tɔɔtomɛi.

⁶ Ndomɛi ji ngi yɛpɛma kɔlooni ma i yɛni a ji lɔ ma Ngewɔ jaweisia hou kpema gbi. Yeesawei, kia wu gbi wu mɛninga la i hiye tɔɔtomɛi, ta lɔ a ji wu gbi wa yɛ heini ndoma hu.

⁷ Numu wɛlɛblaa gboto ti hitɛnga dunyei hu gbi, tɛɛ nde leiŋ taa yɛma Yesu Kristi i wailɔ kia nuuvu na. Numu wɛlɛmɔ mia a numui na nyɔkɔ kɛɛ Kristi juwui.

⁸ A wu mahugbe aako waa baa a na wu yengenga fa tawao wu wu pawɛi majɔɔ ndavengɔ.

⁹ Numu gbi lekee ɛɛ gɛlɛ kaai na ma Yesu i kɛni, a windɛ maahu i kaa weka gɛ, Kɛ Ngewɔ ii ngi hu. Numu gbi lekee a kaai na lekee gɛ Kristi i kɛni, Kɛkɛi taa ngi Hindoloi veenjɔɔ kpɛlɛɛ lɔ ngi hu.

¹⁰ Numu gbi i wangaa wu gama a kaa weka Yesu ndɛi wooma, waa loko hei ngi bu wu guwuisia hu; waa va ngi ma lɛ pɛiŋ.

¹¹ Ajifa numui na a va yeenumui na nyɔkɔ ma a yɛ a ngi mbaa lɔ nyamui nasia hu i piema.

Kɛlɛma Yɛpɛisia

¹² Kia bɛɛ hinda gboto i na ndeva bi ma kɔlɛi ji hu, ngii yaa loni ngi kɔlɔ-gole hunyani, ajifa nya lii lɔ ma wava mua wueni mu lɔ, mu hei yaama, ngi yɛpɛ wu gama aako mu goohunɛɛi laa i ve.

¹³ Bi liima ndeenyahaloi leengeisia tɛɛ ta va bi ma.