1 TIMOTI 1 - Ngowili Yekpei Numu Kpɛlɛɛ Va

¹ Nya Pɔɔl, tomɔ a nge Yesu Kristi va kia mu Bawomɔi Ngewɔ kɛɛ mu liivalamɛi Kristi i ndeni.

² Nya mia ngi kɔlɛi ji nyɛinga Timoti gama, nya hindoloi vulii a tɔnya mua ta mu langɔ a Ngewɔ. Mu Kɛkɛ Ngewɔ kɛɛ mu Lemɔi Yesu Kristi i bi gɔ a ngauwanda kɛɛ manuma kɛɛ ndiilɛli.

Ndahii Welava Ndɛɛ Gaaisia Ma

³ Nya longɔ bi yɛ Ɛfisɔs, kia lɔɔ ngi liigbani bi ma pieva ji ngi yɛ pelei hu nga li Masidonia. Nungaa lɛɛngaa ti na tiaa ndɛɛ gaaisia gɛma a nungaa, tawao mahoungɔ bi nde ti ma a kpaya ti gbe.

⁴ Nde ti ma ti loko gbua dɔmi gbualei nasia hu kɛɛ maadani ti laa gbawala guhaguhai nasia ta wa a ndabla gbamanga lekee; tɛɛ kpɔma gbi wie hugbatɛi na ma Ngewɔ pienga, na wu kɔɔngɔ jifa wu langɔ a Ngewɔ.

⁵ Nungɛi nasia mabalila yeesabui lɔ a ndomɛi na mahoungɔ i gbua ndiigolengɔ hu, kɛɛ kiliya sɛwɛsɛwɛ, kɛɛ lanaya lɔnyangɔ hu.

⁶ Nungaa lɛɛnga ti wounvenga jisia ma, ti gbulanga pele wɔnangɔi ma ti loko wilinga baaba lablangaa hu.

⁷ Ti longɔ ti yɛ a Ngewɔ jawei yeekamɔnga, kɛɛ tɛɛ tia yekpe ti layieisia vulii yeembui gɔɔ ɔɔ hindei nasia ta yɛpɛ kɔlooni ma bi tɔa bɛɛ ti hugɔɔlɔ wa.

⁸ Mu kɔɔlɔ kɛ Sawei gbekpengɔe ina nungaa ti ngayengeilɔ kia mahoungɔ ti ngayenge.

⁹ Mahoungɔ vulii i yɛ wu nɛmahu kɛ Saweisia tii na numu yekpeisia va, kɛlee sawa nyaniblɛisia kɛɛ pienyamubleisia kɛɛ nasia tii gbeweni Ngewɔ va kɛɛ nasia jumbu wielei i ti gɔɔngɔ kɛɛ nasia tɛɛ hɛɛ Ngewɔ ma tawao tii gbeweni ti yafei bawola va kɛɛ nasia ta ti kɛkɛ-ni waa ɔɔ ti njeni kɛɛ numu waableisia,

¹⁰ kɛɛ puegbuableisia, kɛɛ sɔɔ-nyamu wieblɛisia kɛɛ nasia ta nuuvuisia hou a kpaya kɛɛ ndɛɛ guaalablɛisia kɛɛ nasia ta ndɛɛ jelisia wuaa kɛɛ nasia ta hinda weka gbi wie tia kaa yekpei ti blangɔ nga.

¹¹ Yeekaai na i Ngowili Yekpei na hu lɔ toko wuaangɔ nya yeya nga nde, Ngowili Yekpei na i gbuani Ngewɔ wɔlɔngɔ lubangɔi gama.

Pɔɔl Lɔ Siɛgbuama Ngewɔ Manumɛi Va

¹² Nyaa siɛgbuama mu Lemɔi Yesu Kristi ma, na i kaahu venga mbɛ nya yengei va. Ngi siɛgbua ngi ma giliva la kɛ nya mahoungɔ yengeva ngi wɛ kɛɛ jifa i loko loni nya ma fa,

¹³ kia bɛɛ ngovama wɔɔ ngi yɛlɔ a ngi yia-nyamu le, nga hitɛ ngi wooma a juwuya kɛɛ mbɛlɛnyani. Kɛɛ Ngewɔ i manuilɔ nya ma, ajifa ngii yɛ lani lɛ a ngie tawao jifa ngii yɛ kɔɔ gbɛmia ngi piema.

¹⁴ Mu Lemɔi i ngi yauwandei yeilɔ nya ma kpotongɔ waa, tawao i lanayei ve mbɛ kɛɛ ndomɛi na mu woo le ji mua Yesu Kristi-ni mu wilingɔ hu.

¹⁵ Tɔnya yia lɔ a ji, kungɔ a kulula kɛɛ lava la kɛ Yesu Kristi i wani dunyei hu jumbubleisia bawova lɔ. Ngi nyamuni jumbubleisia kpɛlɛɛ ma,

¹⁶ kɛɛ Ngewɔ i manuilɔ nya ma aako Kristi i ngi liihouyii gɛ nya hinda hu, nya hii nya lewengɔ jumbubleisia gbi ma, aako i tɔmaseli gɛ a nasia kpɛlɛɛ ti wama lama a ngie ti kunafɔ lɛɛvui majɔɔ.

¹⁷ Mbɛlɛhei kɛɛ ngɔɔlɔya i yɛ kunafɔ Mahɛi ma, na ɛɛ haa tawao numu ɛɛ ngi lɔ, Ngewɔ Yakpei, kunafɔ kɛɛ kunafɔ! Amiina.

¹⁸ Nya loi Timoti, nyaa fɛimawoi ji loko wuama bi yeya, na ngoo i yakpe tia Ngewɔ lutuisia ti layie ti ndeni wɔɔ kɔlooni bi ma. Yee njɛpɛwoi nasia yayenge kia ndapi hakangaa aako bi ndapi gɔ pandawanda,

¹⁹ bi langɔ tuuŋ a Ngewɔ tawao kiliya sɛwɛsɛwɛ bi hu. Nungaa lɛɛnga tii yaa wooloni ti giliyei ma, ti ti layii a Ngewɔ hunyaninga.

²⁰ Haiminiɔs kɛɛ Alɛksanda tia yeenungɛi jisia lia tawao ngi kpalɛ langa ti ma a ji ngi ti wuanga Seitana gbayei bu; ji a pielɔ ti gbe a Ngewɔ bɛɛnyanila.