1 JƆN 1 - Ngowili Yekpei Numu Kpɛlɛɛ Va

Ndɛvu Ve Yiɛi

¹ Mua kɔlɛi ji nyɛima wu gama kɔlooni ndɛvu ve Yiɛi ma, na i na wɔɔ gba i hiye hindei gbi lɔto-gbelei ma. Mu yee-Njiɛi mɛninga, mu tɔnga a yaama, mu kpenga, mu jaanga la a loko.

² Ji yeendɛvui ji i gɛni numu a gu a tɔla, mu tɔilɔ; famia mu seli wuaama fa, ma kunafɔ lɛɛvui na gona wu ma i yɛ Kɛkɛi gama i gɛni a mue.

³ Na mu tɔnga tawao mu mɛninga, mua konama wua bɛɛ ma kɔɔ wu gbɛɛ mu ma ngoyilɛi na hu mua Kɛkɛ-ni mu hu kɛɛ ngi Hindoloi Yesu Kristi.

⁴ Mua kɔlɛi ji nyɛima wu gama aako mu goohunɛɛi laa i ve.

Ngewɔ Lɔ Foofo Le

⁵ Ngowili a ji lɔ mu mɛninga a ngi Hindoloi, mu konama wu ma, kɛ Ngewɔ i yɛni a foofo lɔ, tawao kpindi gbi ii ngi hu kulo bɛɛ.

⁶ Mu ndengaa hɔɔ muɛɛ mua tieni lɔ ngoyila hu kɛɛ ma jia kpindi hu, kɛ mu ndɛɛ gualanga, tawao kɛ muii jiama a tɔnya welei.

⁷ Kɛɛ mu jiangaa fofoi na hu Ngewɔ i hu, ma yɛlɔ ngoyila hu a mu nyɔunyɔ, tawao ngi Hindoloi Yesu ŋamɛi a jumbui gbi wualɔ mu ma mu yɛ sɛwɛ.

⁸ Mu ndengaa muɛɛ jumbu gbi ii mu hu kɛ mu mua yekpe wɛlɛnga tawao kɛ tɔnyɛi ii mu hu.

⁹ Kɛɛ mu gayengaa Ngewɔ gama muɛɛ mu jumbu hinda wienga, Ngewɔ ɛɛ wotewote tawao ngi wɔnangɔ: a manulɔ muma mu jumbuisia va, i mu nyamuisia kpɛlɛɛ wua mu ma i mu yɛ sɛwɛ.

¹⁰ Mu ndengaa muɛɛ muii yaa jumbu hinda gbi wieni, kɛ mu Ngewɔ yɛnga a ndɛɛ gualamɔ tawao kɛ ngi laayiɛi ii mu hu.