1 KƆLINTIBLƐISIA 1 - Ngowili Yekpei Numu Kpɛlɛɛ Va

¹ Nya Pɔɔl, Ngewɔ i loko longa nya ma yɛva a tomɔi Yesu Kristi va, nya lɔ ngi kɔlɛi ji nyɛima, kɛɛ mu mbaa Kristimɔi Sɔstɛnisi,

² Ngewɔblei nasia gama ti Kɔlinti, nasia gbi Ngewɔ i loko longa ti ma yɛva a ngi woo, tia Yesu Kristi-ni ti wilingɔ hu, kɛɛ nungei nasia kpɛlɛɛ hinda gbi lekee ta hɛɛ mu Lemɔi Yesu Kristi ma, mua tieni mu Lemɔi.

³ Nyaa mu Kɛkɛ Ngewɔ vɛlima kɛɛ mu Lemɔi Yesu Kristi aako i ti Ngauwandei kɛɛ ndiilɛli ve wu wɛ.

Kpekpeisia Ngewɔ A Pie Muɛ Kristi Va

⁴ Nga siɛgbualɔ Ngewɔ ma kpema gbi ngauwandei va i fɛnga wu wɛ Yesu Kristi sabui hu.

⁵ Jifa wua Kristi-ni wu wilingɔ hu, Ngewɔ i pienga wu magbatɛnga pelei gbi hu kpɛngɔ ngowili hugɛlɛi ma pandawanda kɛɛ ndelei nungaa ma pandawanda.

⁶ Kristi hindei nasia ti hugɛnga a wue, wu langa la a wu lii gbi

⁷ famia wuii yaa baani a kpekpeya yakpe bɛɛ majɔɔla, kia wu Ngewɔ mawuloma Ndemɔi Yesu Kristi magɛva.

⁸ A gbɔma pielɔ wu loo kpauŋ i to kɛlɛmɛi, aako sabu gbi aa yɛ na wu lɛɛva Kpɛmbo Volei na ma mu Lemɔi Yesu Kristi a wa.

⁹ Mahoungɔ mu la la kɛ hinda gbi Ngewɔ i ndengaa yɛ a pielɔ, a pielɔ huɛɛŋ, Ngewɔ na i loko loni wu ma aako wua ngi Hindoloi, mu Lemɔi Yesu Kristi wu wili hu.

Nduahugɔlei Kristimableisia Lia

¹⁰ Kpayei na va mu Lemɔi Yesu Kristi i feni mbɛ, nyaa ndema wu kpɛlɛɛ ma, nya mbaa Kristimableisia, wu woo i yɛ yila na gbi hu wa nde aako wu luahu aa gɔlɛ kulo bɛɛ. Wu woo i yɛ vulii yakpe, wu giliyii kɛɛ wu lii-hu-hindei i yɛ yakpe.

¹¹ Gbamaile Kloi bondɛisia lɛɛngaa ti ndenga nya ma leiŋ nya mbaa Kristimableisia, tɛɛ wu luahu i gɔlɛkɔlɛnga.

¹² Na nya lii i ma ndeva tamia a ji numu gbi wu lia ngi layie i gba pekeisia ti ndeisia ma. Nungaa lɛɛngaa ta ndelɔ tɛɛ, “Mu toma Pɔɔl lɔ ma;” pekeisia tɛɛ, “Mu toma Apɔlɔs lɔ ma”; yeepekeisia tɛɛ, “Mu toma Pita lɔ ma;” yeenasia tɛɛ, “Mu toma Kristi lɔ ma.”

¹³ Yesu gɔlɛkɔlɛngɔe? Pɔɔl lɔ haani Krɔsii ma wu va? Ti wu wuani a Ngewɔ yei Pɔɔl biyei hu lɔ?

¹⁴ Ngi siɛgbua Ngewɔ ma jifa ngii numu weka gbi wuani a Ngewɔ yei kɛlee Klipɔsi kɛɛ Gayɔs.

¹⁵ Numu gbi ii wu lia hɔɔ aa gu a ndela yɛ ti ngi wuailɔ a Ngewɔ yei nya biyei hu.

¹⁶ (Ngi Stɛfanɔs taa ngi wɛlɛbubleisia bɛɛ wuailɔ kɛɛ na wooma ngii lani la kɛ ngi numu weka gbi wuailɔ.)

¹⁷ Kristi ii nya looni nungaa wuava. I nya looni Ngowili Yekpei lɔ leva, tawao ngii ndema a nuuvu nɛmahulewe yɛpɛ, aako Kristi haalei krɔsii ma aa yɛ a gbama hinda.

Kristi, Ngewɔ Gbayei Kɛɛ Ngi Nɛmahulewei

¹⁸ Gbamaile Kristi haalei krɔsii ma yeengowili i yɛni a baaba hinda lɔ nasia wɛ tii mbawoya weleima; kɛɛ mua mu bawoma, i yɛni a Ngewɔ gbayei lɔ mu wɛ.

¹⁹ Ngewɔ Gɔlɛi yɛ, “Nga nɛmahuleweblɛisia ti nɛmahulewei yɛlɔ a gbama fuŋ, ngi kaableisia ti hinda hugɔɔlei wote a baaba hinda.”

²⁰ Faale naa, njɛpɛ gbi ii nɛmahuleweblɛisia la kɛɛ kaableisia kɛɛ nasia ti bɛɛngɔ a dunyama laablɛi wiela. Ngewɔ i kɛnga kɛ dunyablaa ti nɛmahulewei i yɛni a baabaa hinda lɔ!

²¹ Ngewɔ nɛmahulewe wai i pieilɔ nungaa tɛɛ gu taa ngi gɔɔ a ti nda nɛmahulewe. Kɛɛ nɛɛilɔ Ngewɔ wɛ nasia bawova ta la a “Baaba” wowili ji ma nde.

²² Juuisia ti longɔ kabande hindanga ti wie kɛva kɛ mu wowili i gbuanga vulii Ngewɔ gama lɔ. Nasia Juu yaa tie tia nɛmahulewe gɔlila lɔ kpewengɔ ti ma.

²³ Kɛɛ mua, Kristi na ti kpakpani krɔsii ma tamia ma ngi hinda hugɛ, yeengowili a gbalɛ Juuisia ma, tawao nasia Juu yaa tie a babaa;

²⁴ kɛɛ nasia wɛ Ngewɔ i ti lolinga, ti yɛ a Juungaa ɔɔ nasia Juu yaa tie, Ngowili Yekpei ji kɔloongɔ Kristi lɔ ma, na Ngewɔ gbayei a ngie kɛɛ ngi nɛmahulewei.

²⁵ Gbamaile Ngewɔ wiehindei na kpuangɔ a baaba hinda, nɛmahulewe i hu i lewe nuuvu nɛmahulewe gbi ma tawao na kpuangɔ a faakaalewe i gbayani nuuvu gbaya gbi ma.

²⁶ Nya ndeengɛisia, a gili lɛɛ a yɛyii wɔɔ wu yɛ hu pɛiŋ Ngewɔ i wu loli. Kia nungaa ti yɛyiisia ti na dunyei hu, wuii yɛ gbotoni wu nɛmahulewengɔ, wuii yɛ gbotoni kpaya i wu wɛ, wuii yɛ gbotoni wu gbuani maha wɛlɛ laa.

²⁷ Nungɛi nasia dunyableisia ti ti wumbungɔ a baabaa, tia vulii lɔ Ngewɔ i ti wumbuni, nɛmahuleweblɛisia yawufeva, tawao i nasia lɔ wumbuni ta ti loli a faakaalewe kpayableisia yawufeva.

²⁸ I nungei nasia lɔ wumbuni dunyablaa ti lɛɛngɔ ti hu tawao gbɛogbɛ yaa a tie, nungei nasia yawufeva dunyablaa ti baa gɔngɔ ti ma.

²⁹ Ji a kɛlɔ kɛ numu gbi ɛɛ lawo Ngewɔ yaama.

³⁰ Kɛɛ Ngewɔ i wanga a wue wua Yesu Kristi-ni wu wilinga hu, tawao i Kristi yɛnga a mu nɛmahulewe. Ngi sabui hu lɔ Ngewɔ i mu yɛnga a pɔnablaa i mua tieni luahu gbatɛnga, mu yɛnga a ngi nda nungeisia, i mu gbuanga jumbui luwɔyɛi hu.

³¹ Faale naa, kia Ngewɔ Gɔlɛi i ndeni la yɛ, “Numu gbi lekee ngi longɔ i lawo, i lawo a na Ndemɔi i pienga.”