Números 20 - Sharanahua: Diospan Tsain

Toquirininhuan murannoashu unu afani

¹ Ascan nan oshu abril Israelifo tsoa istaipama ano noconifo. Ahuun anu Sin. Nanno mai ahuun anu Cades ano aton pano pushufo huanifo. Nanno icafoanno Moisés ahuun chipi María naacun mai huanifo.

² Nannoshon unu fuchiyamacaicaquin Israelifoan Moisés yafi Aarónqui tsain chaca huanifo.

³ Ascashon ato yoiquin isca huanifo, —Matohuunfin nuaquin non nuno unu maisi ica. Nocon yorafo nocon Ifo Diosin ointaifi nayamuafo cusca norifi nan icafo cusca non naa shara icuana.

⁴ Nonfin Ifo Diosin yorafoquin. ¿Ahuuscai min nuno tsoa istaipama ano ihuuamun noco inafoya non naanon?

⁵ ¿Ahuuscai min noco ihuuamun Egipcio mai anoashu na mai chacacoin ano non oa? Nunocai non ahuarafo fanatiroma. Trigo yamacain fimi higuera yamaino uva yamacain granados yamacain unuri yamacoin. Noncai ahuashta ayatiromaran, —ishon tsain chipunifo.

⁶ Nannori nicacatan Moisés fu Aarón pano pushu ichananti shoi caincaiti ano fonifo. Ascatan maiqui fuopacunifo. Fuohuafoanno nocon Ifo Diosin fasi chashasharacoiainton oianfo atoqui niriscatani.

⁷ Ascatan nocon Ifo Diosin Moisés yoini isca huaquin,

⁸ —Aarón poquiti tsomashon maton caifofo nantifi ichanan huacahuun. Ascatan min yorafoan oiainfoanno nan toquirininhuan yoihuun unu afanon. Min yoiai cusca nan toquirininhuan murannoashu unu ichapacoin afaiquin. Ascano nantifi min caifofo non maton inafoanri ayatiro nomi shatucoinshcaquin, —ishon Ifo Diosin Moisés yoini.

^9-10 Nocon Ifo Diosin yonoa cusca Moisés huani. Nocon Ifo Dios fu ichananti pushu murannoa Moisés Aarón poquiti fini. Fitan tsomashu Diosin icanoshon Israelifo nan toquirininhuan anoshon ato cunani nanno ichananonfo. Ascashon Moisés oi ashcafinin ato yoiquin isca huani, —Nicayosmamisifoan ua nicacoincahuun. ¿Non mato na toquirininhuan murannoa unu afamashoshquimun man ayanon? —ishon ato yoini.

¹¹ Asca huatan Moisés poquitinin toquirininhuan tsacaquin rafu huani. Asca huatanaino unu ichapacoin afani. Ascaino nantifi Israelifo non aton inafoanri ayacani mayacoinifo.

¹² Ascano nocon Ifo Diosin Moisés yafi Aarón yoini isca huaquin, —Mancai ua icoinra huama. Un mato yonoa cuscacai man aama. Un mato yonoa tsain fusti toquirininhuan yoihuun unu afanon. Ascafia nantifi maton caifofo aton ointaifin man ato ismama unfin shara fustiquin uhuun tsainman un ahuamamishti huatiro. Man ascatamarocon sinaquin min aton ointaifin toquiri tsaca. Man ascahuaquin maton caifo nan mai shara un ato inain mancai ato ano iyotiroma, —ishon Ifo Diosin ato yoini.

¹³ Ascashon nanno anunifo Meriba onicoinnin tsainman na unu anoashu yorafo nocon Ifo Dios fu fochishmanantanancatan chaca huanifo. Nannoshon nocon Ifo Diosin ato ismani nan sharacoin fustishon.

Edom ano icafoan aton mai anoshon Israelifo finonmacasmani

¹⁴ Ascano Israelifo chipo focanashu Moisés nocofunufo mai futsa ahuun anu Edom ano ato nichini aton niaifo ahuun tsain tapimashquin isca huaquin, —Niaifon, nonfin mato yora futsa Israelifoquin. Man min tapia non foanfafainni fasi omitsiscamisi.

¹⁵ Nocon shunifo Egipcio mai ari fonifo nanri min tapia. Non nanno Egipcio mai ari fari ichaparasi aton yonomatifo icano fasi noco omitsisca huamisifo.

¹⁶ Ascano non nocon Ifo Diosin fasi cufini noco numanon. Nocon Ifo Diosin noco nicaquin ahuun oinmati a fu nai muran ica nocoqui nichini noco Egipcio mai anoshon iyonon. Natian non Cades ano nocoa. Nan pushurasi mato mai chaima ica.

¹⁷ Non maton mai finonsharapai. Ascacun maton mai ano noco finonmacapun. Non maton maufo muran cayamacain maton fimi fanafo ano non cayamacain maton pozoricai non ayashquima. Niaifon, min mau fai fustitofin non caicain. Nan fai fustiton non cai. Nonfin mato mai chaicoin non finontiroquin, —ishon Moisés ahuun tsain Edom aton niaifo fomani.

¹⁸ Acafia Edom niaifoan cumani isca huaquin, —Nocon mai anocai man iquitiroma. Nuri fuyamacahuun. Man nocoqui nocoaiton uhuun ranushumuafo matoqui nichishquin mato rutunon, —ishon cumani.

¹⁹ Ascan afanan Israelifoan cumani, —Nonfin mau fai fustiton caicain. Nocon inafoan maton unu ayacun non mato ahuun rafanan inain. Noncai maton mai ano nitupaima. Non finonpai fusti. Nocohuun shinanpun, —ishon Israelifoan yoinifo.

²⁰ Ascashon afanan Edom niaifo cumani, —Ma. Mancai nocon mai ano futiromaran, —ishon cumani. Nantianri ahuun ranushumuafo ichananhuani Israelifo aton mai ano iquinonfoma.

²¹ Ascano ato finonmayamaifoanno Israelifo naso furanifo.

Aarón nani cuscan

²² Ascan nantifi Israelifo Cades anoashu focanashu machi Hor ano noconifo.

²³ Machi Hor Edom mai chaimashta ini. Nannoshon nocon Ifo Diosin Moisés yafi Aarón yoini isca huaquin,

²⁴ —Natian Aarón man nai. Ahuun shunifo nai muran icano ato fu ishquin. Man rafu unu Meriba nan unu afain anoshon un mato yononi cusca man nicacasmayamua. Ascan nan mai shara un maton caifofo inain anocai Aarón iquitiroma.

²⁵ Moisés, min ochin Aarón yafi furun Eleazar machi Hor mamaqui ato iyotahuun.

²⁶ Ascatan Aarón ahuun sahuutifo nan ichananti pano pushu muranshon nutamisi un fu tsainshquin nan pucahuun. Ascashon furun nan apan sahuumisi sahuumahuun. Ascano nannoashu Aarón naitian ahuun shunifo fu iquicairan, —ishon nocon Ifo Diosin yoini.

²⁷ Ascatan nocon Ifo Diosin yononi cusca Moisés huani. Nantifi Israelifoan oiainno Aarón yafi furun fu Moisés machi Hor mamaqui fonifo.

²⁸ Machi mamaquinoa Aarón sahuutifo nan ichananti pano pushu muranshon sahuumisi Dios fu tsainshquin Moisés pucashon nanfo furun Eleazar sahuumani. Ascatan nan machi mamaquinoashu Aarón naani. Ascano Moisés yafi Eleazar machi mamaquinoashu fotonifo.

²⁹ Ascano atoqui nococatan Israelifoqui chaninifo Aarón man naa tapinonfo. Nicacatan nantifi Israelifoan oshu fusti Aarón manocoinnifo.