Números 16 - Sharanahua: Diospan Tsain

Nan nocofunun Coré Moisés potapaini

^1-2 Ascatan chipo Leví ahuun funa Izhar ahuun facu Coré futan nan mani futsafo Rubén ahuun funafoan Eliab ahuun facu rafu Datán non Abiram non Pelet ahuun facu On nanfoan shinanchacanifo. Nanfo fasi cacapaimisi inifo. Ascashon Moisés chaca huanifo. Ascano Israeli niaifo patasharinoa dos cientos cincuenta futsafo ichanan huashon ato yoini nanfoanrifi Moiséshuunoa shinanchacanonfo.

³ Ascatan Moisés yafi Aarón ano fonifo ato yoiquin isca huanifo, —Manfin nantifi finonpaicain. Nantifi Israelifofin nocon Ifo Diosin catoanquin ato yonoshquin. Mato fustimaquian. Nocon Ifo Diosin nantifi noco fu ica. ¿Ahuuscaimun man shinanquin noco niaifocoin man itiro noco yonoshquin? Nonfin nantifi nocon Ifo Diosin ahuun yorafoquin, —ishon nannori yoinifo.

⁴ Nannori yoiaifoan nicain Moisés maiqui fuopacuni.

⁵ Ascatan funinacahuan Moisés Coré yafi ahuun tanamisifo yoini isca huaquin, —Funamari iyoconaino nocon Ifo Diosin ratofomain ahuun yoracoinfo isharamisiquin oin. Nocon Ifo Diosin icanocai ahuara chaca a fu itiroma. Ascan nan ato aficoin catoanfin a fu ishquiquin.

^6-7 Coré, min non min tanamisifoanri isca huacahuun. Funamari pala uhuapamashta nan ininshara coaiton nan pala murannoa fiicahuun nocon Ifo Diosi ahuun ointaifin ismashcaquin matomain catoanquin. Man ascaiton non tapitiro ratofomain nocon Ifo Diosin catoanquin ahuun yora sharafo inon. Uncai tsoa shutipaima. Diosin mato anori yonoyamafia manfin Levitafoan man noco shutipaicain, —ishon Moisés ato yoini.

⁸ Ascano afanan Moisés Coré yafi ahuun tanamisifo yoini isca huaquin, —Levitafoan ua nicacahuun.

⁹ Diosin mato catoan a fu man inon noco yorafo ato amapaiyai cusca ahuunshon man ichananti pano pushu murannoa ato tapimanon. ¿Man shinanmun nanfo ahuama?

¹⁰ Upa Diosin mia non Levita futsafori catoan a fu rafunonfo. Ascafia min non mia tanamisifoanri Upa Diosin mato yonoama cusca man huapai. Ascashu nocon caifo Diosi cufinshomisifori man ipai.

¹¹ Ascafia nan Aaróncai ahuama. Man shinan nan man potapai. Man Aarón potapaifiaquicai man potaima. Ascatamarocon nan nocon Ifo Diosi man potapairan, —ishon Moisés ato yoini.

¹² Ascashon Moisés Eliab ahuun facu rafu Datán yafi Abiram cunani aqui funonfo. Ascafia nan rafutan cumanifo isca huaquin, —¡Ma! Noncai miqui capaima.

¹³ Minfin nan mai shara ano non ahuara yopatiroma anoshon min noco ihuuaquin tsoa istaipamanoashu non naanon. Ascacun natian min yonomatifo min noco imapai.

¹⁴ Ascatan tsain futsari non mia yoinon. Mincai nan mai shara tsoa ahuara yopatiroma ano min noco ihuuama. Mincai mau yafi fana futsafo noco inanmisima. Minfin noco parapaicain. Nanscacun non miqui capaimaran, —ishon yoinifo.

¹⁵ Nannori huaifoan nicaquin Moisés atoqui sinaquin nocon Ifo Diosi cufini isca huaquin, —Nafoan mia ahuarafo ismapai min ato catonon. Ascafia ato catonyamahuu, Ifon. Uncai ato ahuara fustishta fianmisima. Aton burro fustishtacai un ato fianmisima. Uncai ato chaca huamisimaran, —ishon Moisés nocon Ifo Diosi cufini.

¹⁶ Ascashon Moisés Coré yoini isca huaquin, —Funamari uqui fucahuun min non min tanamisifo futan nocon Ifo Diosi ismashcaquin. Ascano Aarón arifin nuno matoqui oi.

¹⁷ Min non nan mia tanamisifo nan doscientos cincuenta yorafo maton pala uhuapamashta ahuara inin shara coaiton pala muran fucahuun nocon Ifo Diosi ahuun ointaifin ismashcaquin matomain catoanquin. Ascano Aarón arifin ahuun pala uhuapamashtaya oiran, —ishon Moisés Coré yoini.

¹⁸ Ascano iyoconaino nantifi nan yorafo ichananti pano pushu caincaiti ano funifo aton pala uhuapamashtafo muran chii yafi nan inin shara osia coaino nanfoya funifo. Ascano nanno Moisés yafi Aarón niafo ini.

¹⁹ Coré nantifi Israelifo Moisés yafi Aarónqui shinanchacamani. Ascatan nantifi ahuun tanamisifo pano pushu ichananti caincaiti ano ato ichanan huani. Natianri nocon Ifo Diosin fasi sharacoiashu chashariscatanaino atoqui niriscatani.

²⁰ Nantianri nocon Ifo Diosin Moisés yafi Aarón yoini isca huaquin,

²¹ —Na yorafomaquinoashu foriscatacahuun un ato namarisca huaiquin, —ishon Upa Diosin Moisés yafi Aarón yoini.

²² Nannori nicacatan Moisés fu Aarón fuopacucahuan nocon Ifo Diosi cufinnifo isca huaquin, —Nocon Diosin, min nantifi yora niimamisi. Mia maisicai tsoa nipatiroma. ¿Ascafia nan nocofunu fustiton chaca huafiamun min nantifiqui sinaicai? —ishon nannori fasi curushcai cufinnifo.

²³ Ascaiton nocon Ifo Diosin Moisés cumani isca huaquin,

²⁴ —Ascacun min caifo Israelifo nantifi ato yoihuun Coré non Datán non Abiram ato pano pushu anoashu foriscatanonfo, —ishon yoini.

²⁵ Ascaino Moisés funinacahuatan Datán non Abiram aton pano pushu ano atoqui ichoni. Israeli niaifo patasharinoafoanri mufainnifo.

²⁶ Atoqui nocotan Moisés nantifi Israelifo yoini isca huaquin, —Na yora chaca icanoashu foriscatacahuun. Ato ahuarari muunyamacahuun. Man ato ahuara muaino marifi aton chacahuunoashu man nai futsushquinran, —ishon Moisés ato yoini.

²⁷ Nannori nicacatan Coré non Datán non Abiram non afo icanoashu atomaqui shucunifo ato fucai afanan inifoma. Ascano Datán yafi Abiram aton pano pushu murannoashu chifi caincaiti ano aton ahuinfo non aton facufori nanno ato fu niafo ini.

²⁸ Ascano afanan Moisés nantifi Israelifo yoini isca huaquin, —Manfin samamashta oincai nanscashofin man tapitiroquin un amisi cuscacai unfincoin ahuara huatamarocon nocon Ifo Dioshuunshon un mato ashomisi. Nocon Ifo Diosin ua matoqui nichia un mato ashonon.

²⁹ Ascano nan nocofunu futsafo namisi cusca aforifi nai nanscai nan man tapitiro nocon Ifo Diosin ua nichiama.

³⁰ Ascacun nai ascatamarocon nocon Ifo Diosin tsoan oinyomisima cuscaran mai cuatanaino nantifi nan yorafo non nantifi ato ahuarafo non aton pushufori nan mai cuatanaino a muran mumafiashu pacuriscatashcani ascano nantifi nai futsushcani. Nanscaifoan man tapitiro nanscara yorafoanfin, “Diosi ahuamaran,” ishon ahuunoa shinanmisifoquin, —ishon Moisés ato yoini.

³¹ Nan Moisés afin ato yoiquin unuamano Coré yafi ahuun tanamisifo icanoashu mai cuariscatani.

^32-33 Nan mai cuariscatanaino Coré yafi ahuun yorafo non nanno niafori ato main shuai cafisca huatani. Nantifi nan ahuara ayafo cusca atofoya mai cuatanaino pacui futsunifo. Nan niafoanno mai cuatanaino a muran nantifi pacunifo. Ato ahuarafori mai muran pacuni. Pacutanaifoanno mai afanan atoqui fupotanaino yamariscatanifo.

³⁴ Nan mai cuatanaino a muran pacucani fiisiquin futsuaifoan nicacanashu Israeli futsafo fasi ratucoinifo. Ascashon oi ashcani yoinifo, isca huaquin, —Nocoquiri nocon Ifo Diosin mai cuamatanaino nocon shuai cafisca huairan, —ishon Israelifoan nannori yoinifo.

³⁵ Nantianri nan doscientos cincuenta nocofunufo pala uhuapamashta murannoa inin shara coaino Ifo Diosin nai muranshon aton puchi camaqui chii uruai potatanaino nai cuyocoinnifo.

³⁶ Ascaino Ifo Diosin Moisés yoini isca huaquin,

^37-38 —Aarón ahuun yorafohuunoa ua cufinmisi. Ahuun facu Eleazar yoihuun nantifi a pala uhuapamashta coaifo murannoa ahuun shaqui murannoafo uhuapamafo chii murannoa nusfinon. Nanfo un yonoa ua cufinon. Maton yorafohuunoa ua cufinshomisi fusti pano pushu ichananti muran itiro. Ascano nan chaca huanfohuunshon nan aton pala uhuapamafo fiitan a murannoa chii yafi inin shara osia Eleazar yoihuu chaimashara potanon. Asca huatan pala uhuapamafo masta mastahuu sapa huashquin. Ascano sapa huatan toquirifo putsamuinia camaqui huahuu. Ascan min caifo Israelifoan nan oinquin shinantiro isca huaquin, “Nan cuno sapa yora chacafo aton pala uhuapamashtafo. Nanfoan chaca huafo cusca musucoin. Norifi non asca huaifin nan icaifo cusca non nariscatiroquin,” ishon shinantiro chaca huashcaquima, —ishon Moisés ato yoini.

³⁹ Ascano Moisés yonoa cusca Eleazar huani. Nan doscientos cincuenta pala uhuapamashta ahuun cuno bronce yora chacafoan Dios ismapaiyaifo nanfori Diosi futsafo yonoa cusca nanscatirofo. Ascafiacai Diosin ato yonoama. Ascano nan chaca huafo cusca Diosin atoqui chii potaino nai cuyonifo. Ascatan nan pala uhuapamashtafo Eleazar mastatinin nanfo sapa huashon toquirifo putsamuinia camaqui huani.

⁴⁰ Israelifoan nan oincashon shinantirofo, —Nan nocon Ifo Diosin yonoamano Aarón ahuun funafoshomacai nan pala uhuapamashta murannoa inin shara nocon Ifo Diosi ointaifin coatirofoma. Tsoa nocon Ifon catoncunma Coré yafi ahuun tanamisifo naa cusca nanforifi natiroquin, —ishon Israelifoan shinannifo. Ascano Ifo Diosin Moisés yononi cusca Eleazar huani.

⁴¹ Nansca huafiacatan iyoconaino afanan Israelifoan Moisés yafi Aarónqui tsain chaca huanifo isca huaquin, —Nan man rafutafin Ifo Diospan ahuun yorafo rutuaquin, —ishon yoinifo.

⁴² Ascan nan ichanancashon Moisés yafi Aarónhuunoa tsain chaca yoinifo nanfoan ichananti pano pushu oinnifo. Nantian Ifo Diosin nai coin murannoashu atoqui oni. Ascaiton oianfo fasi chashasharacoian ini. Tsoan ascara oinyomisima oincaquin tapinifo Ifo Diosi fusti nanscara sharacoin.

⁴³ Ascano Moisés fu Aarón pano pushu ichananti ahuun shoi caincaiti ano funifo nanno nan rafu niafo ini.

⁴⁴ Ascatan Ifo Diosin Moisés yoini isca huaquin,

⁴⁵ —Na yorafomaquinoashu fotacahuun un ato namariscanon, —ishon Ifo Diosin yoini. Nicacatan Moisés yafi Aarón Ifo Dios ointaifi maiqui fuoshon pacunifo.

⁴⁶ Ascatan Moisés Aarón yoini, —Cariscatahuun pala uhuapamashta fiitahuun. Toquirifo putsamuniano Ifo Diosi cufinti camaquishon pala uhuapamashta muran inin shara yafi chii osia nanuhuu. Ascatan nan pala uhuapamashtaya yorafo muran catahuun Diosin aton chaca rauhuanon. Noco tsain chaca huafo cusca nocon Ifo Diosin nan nicain atoqui sinacointana. Ascano natian ato pau isincoin ato fuchimaniran, —ishon Moisés Aarón yoini.

⁴⁷ Ascano Moisés yonoa cusca Aarón aton caifo icano cariscani. Nan pala uhuapamashta murannoa ininti coaino Aarón Ifo Dios ismani ahuun caifofo aton chaca rauhuashon ato namanonma. Asca huafia atirifi pau fuchinifo.

⁴⁸ Aarón ato muran pala uhuapamashta ya cani aton chacahuunoashu naashquima. Ascacun Diosicai afanan ato pau isincoin fuchimanima. Ascafia nan pau unuataima 14,700 yora naanifo. Coré yafi ahuun tanamisifo nani nan 14,700 yorari nanifo.

^49-50 Ascatan pau isincoin unuano Aarón afanan Moisésqui nasoni. Nan rafu pano pushu ichananti shoi caincaiti ano niafo ini.