Números 11 - Sharanahua: Diospan Tsain

Nocon Ifo Diosin Israelifo yoiyoni, —Un mato nami inanshquiran, —ishon yoini

¹ Nannori ato yoifianicun Israelifoan tsain chipunifo. Ascashon yoinifo, —Nonfin fasi omitsiscaicain, —ishon tsain chipuaifoan nocon Ifo Diosin ato nicain atoqui fasi sinani. Ascashon atoqui chiihuan otani coononfo. Nan pasoato icafori atirifi cooi futsunifo.

² Ascaiton oincani fasi fiisiyanan ratucoincaquin Moisés cunanifo. Ascano Moisés ato Upa Diosi cufinshoni. Moisés cufiainton nicaquin Upa Diosin chiihuan noca huani nantifi coononfoma.

³ Ascashon nanno anunifo Tabera huanifo. Onicoinnin tsainman —Chiihuanun yorafo cooaran, —ishon nannori anunifo.

⁴ Nan Israelifo foaifoanno yora futsafori ato fu fonifo. Afocai Israelifoma. Caifo futsafo. Nanfoanfin ahuara sharafo fusti Egipcio mai ano fasi fuchipaicaniquin. Ascashu nanno fasi nasopaicani. Nanscaifoan oincani Israelifoanri tsain chipunifo. —¡Ohua! Noncai nami ayama.

⁵ Non Egipcio mai ano ipaonitiancai non shiman yopapaonima. Nonfin shiman ichapa cashman fipaoniquin. Noncai tushu futsa futsatapafo ointiaquimamisima. Ascano non pepinon pifain mirasia afain puerro pifain cebolla pifain ajosri non pipaoni.

⁶ Natiancai ascarafo non piama. Non fonin nai. Natian manán fusti non piiran, —ishon tsain chipunifo.

⁷ Nan manánfin cilantro ahuun ushu ointsa chashnaquin.

⁸ Israelifoan shafatifi manán maicamaquinoa topishon tiimacaquin. Nan manán roroshon pichafain misi sapa cuscarafo huanifo. Nan shuniya misi huamua mutsa shara huanifo.

⁹ Nan yamutifi nifi pacuaino nantiari Israelifo icano Diosin manán ato nai muranshon niriashopaoni pinonfo.

¹⁰ Nantian Israelifo pushuti icafoannoashu uaicaifoan Moisés nicani. Nocon Ifo Diosin arifi nicain fasi sinacoin. Ascano Moisés arifi ahuun nomuran fucashcoin muuni.

¹¹ Ascashon Moisés nocon Ifo Dios yoini isca huaquin, —Ifon, unfin min yonomatiquin. ¿Ascacun ahuuscaimun mian isca huaicai? Un ahuara chaca huamainquin mian catoan na yora shinanchacamisifoan ato niaifo un inon.

¹² Na yorafocai uhuun facufoma. Uncai ato cainmanama. ¿Ahuuscai min ua yonoamun ainfoan ahuun facu chishtotiro cusca urifin na yorafo un chishtoi cafisca huanon? ¿Nan mai shara min noco shunifo yoiyoni cusca min ato inain un nanno ato iyoicaimun?

¹³ ¿Raquiamun un nami fuchitiroquin ato pimashquin? Uaiyanan ua yocafafaicani, “Noco nami pimahuu,” ishon ua yoifafaincani.

¹⁴ Urus fusticai na yorafo un ato iyotiroma. Nan shinanchacaifo cusca fasi uhuun nomuran ua shinanchacamanafo. Uncai afanan tunutiroma.

¹⁵ Uhuun Ifon, min ua nanscara huapaiquin natian ua namahuun. Min ua noicoianmainquin ua namahuun un afanan na yorafohuunoashu omitsiscanonma, —ishon Moisés nocon Ifo Diosi yoini.

¹⁶ Nannori huaiton nicaquin nocon Ifoan cumani isca huaquin, —Min caifofo nan atohuunoa shinansharamisifo setenta niaifo patasharinoafo catonhuun. Nanfo uqui ihuuhuun. Nan pano pushu ichananti ano min ato ihuuano nanno mi fu ninonfo.

¹⁷ Ascano un matoqui fotoshquin mato yoishquin. Nan Uhuun Yoshin Shara mi fu imisi cusca huaquin un ato furi uhuun Yoshin Shara rafumani. Ascano nanfoan mi futan min yorafo ashoshquin mincai afanan mirus fusti ato yonoima.

¹⁸ Nantifin min caifofo yoihuun isca huaquin, “Itisharacahuun. Ascashon maton chaca shatucahuun. Nocon Ifo Diosin man mato nican man uaicaiton. Uaiyanan man yoia, ‘Nonfin Egipcio mai ano isharapaoniquin. Nunocai ascarama. Noncai afanan nami piyamaran,’ ishon uaiyanan man tsain chipufafainni. Ascacun na funanmanri man man nami pii.

¹⁹ Mancai shafa fusti nami pima. Natianfin man shafatifi nami pifafainnicain nan oshu fusti matoqui iquiai chain.

²⁰ Nocon Ifo Diosin mato cushufiano man ahuunoa shinanchacamisi. Ascashu ahuun ointaifi man uaica. Uaiyanan man yoia, ‘¿Ahuuscaimun non Egipcio mai anoashu nuno oaquin?’ ishon man yoia. Natian man oshu fusti nan shafatifi man nami pii nan man namihuun shucasmanaitian. Ahuun inoncai man afanan nan nami oinpaishquimaran,” —ishon nocon Ifo Diosin Moisés yoini.

²¹ Ascatan Moisés cumani, —Nunofin seis cientos mil nocofunufoquin. Ascafia min yoia nan oshu fusti shafatifi min ato nami pimai. ¿Ahuuscaimun non ascaicai?

²² ¿Raniamun non chashoanfo non moifo fuchitiroquin rutushquin na yorahuanrasi pimashquin? Noncai nantifi tushu itiroma. Non shiman ichapacoin ununhuan murannoa fiifiacai nantifi itiroma non ato pimaino, —ishon Moisés nannori nocon Ifo Diosi yoini.

²³ Ascaiton nocon Ifo Diosin cumani, —¿Unmun ahuamamishti huatiroma? Natianfin min oincai un mia yoia cusca icomainquin, —ishon nocon Ifo Diosin Moisés yoini.

Israeli niaifo patasharinoafo Diospan Yoshin Sharahuunshon ahuun tsain yoinifo

²⁴ Moisés nannori nicatan ahuun yorafo ichanan huani nocon Ifo Diosin yoia cusca atorifin nannori tapimashquin. Ato yoiquin unutan nan setenta niaifo patasharinoafo ichanan huani. —Nuno ichananti pano pushu tarati huayacucahuun. Ascashu nanno niyocahuun, —ishon Moisés ato yononi.

²⁵ Ascatan nocon Ifo Diosin nai coinmanhuan muran fotoni. Ascashon Moisés yoiaitian nan Diosin ahuun Yoshin Shara Moisés ya rafumamisi cusca huaquiri nan setenta niaifo patasharinoafo ahuun Yoshin Shara ato ya rafumani. Ascano nantifi nan setenta niaifo patasharinoafoan Diospan Yoshin Shara aton nomuran ato shinanmana cusca yoinifo. Nanscara yoiquin fusti huanifo.

²⁶ Ascano nantiacai niaifo patasharinoa rafu pano pushu ichananti ano fonifoma. Nan rafutan aton anu Eldad yafi Medad. Nan rafutan Diospan Yoshin Sharahuunshon nan niaifo patasharinoa futsafoan yoiaifotiancai nan rafu ato fu ano inima. Ascafia nan ahuun caifo icano nan rafutari Diospan Yoshin shara aton nomuran shinanmanai cusca arifi yoinifo.

²⁷ Nanscaiton oin nan furonanfacu Moisés ano ichoni aqui chani cai. Nocotan yoiquin isca huani, —Eldad futan Medad non icanoshon Diospan Yoshin Sharahuunshon yoicaniran, —icashu Moisésqui chanipacuni,

²⁸ Nan nicatan Nunpan ahuun facu Josué nan pushcoaitian Moisés fu rafumisi nan ahuun oinmati cuscaran ipaoniton yoiquin isca huani, —Uhuun niaifo, Moisés, Eldad yafi Medad yoihuun afanan tsain yoinonfoma, —ishon Josué Moisés yoini.

²⁹ Ascafiaiton Moisés Josué cumani, —¿Min shinan urus fusti un Diospan Yoshin Sharahuunshon yorafo yoipaimun? Ma. Nocon Ifo Diosin ahuun Yoshin Shara nantifi nocon caifoya rafumapainon ahuun tsain noco yoinonfo, —ishon Moisés cumani.

³⁰ Ascatan Moisés niaifo patasharinoafo fu yorafo icano nasonifo.

Nocon Ifo Diosin comahuarasi Israeli icafoanno ato fumashoni

³¹ Ascashon nocon Ifo Diosin yononi ninhuunhuanun ununhuan aria comahuan rasi Israelifo icano atoqui fumani. Nan Israelifo icano fasi chaicunoashu comahuan rasi funifo. Fari oaiquirinoashu fucain fari iquiaiquirinoashu fucain fari oai istafaririnoashu fucain fari cai istafaririnoashuri funifo. Nan Israelifo icano chai pacunifo. Nan coma un metro masoafo ini.

³² Ascano Israelifo nan shafatishon coma ato pushu ano fiifain yamutishon fiifain iyoconainori fiinifo. Nantifi yorafoan coma ichapacoin fiiqui futsanifo. Nan yora fustiton mucu rafuti machiqui huashon fiiquin futsanifo.

³³ Ascano nan coma piyaifoan oin nocon Ifo Diosin atoqui sinaquin pau isincoin ato fuchimani.

³⁴ Ascashon nantian nanno anunifo Kibrot-hataava. Onicoinnin tsainman, —Tushu futsan fusti pipaiquin shinainfo man naa. Ascacun ato mai huaforan, —ishon anunifo.

³⁵ Nan Kibrot-hataava anoashu Israelifo mai futsa ahuun anu Hazerot ano fonifo. Ascashu nanno iyopaonifo.